Ngaba Uyathetha Nabanye Ngeenkolelo Zakho?

“NGABA ikho inyaniso engangxengwanga?” Lowo yayingumxholo wesincoko ekwakukhutshiswana ngaso kwilizwe lasePoland. Imiyalelo yolu khuphiswano yayisithi: “Asiyifuni inyaniso engangxengwanga. Akakho umntu oyifunayo. Ngapha koko ayikho inyaniso engangxengwanga.” Umfundi ogama linguAgata oneminyaka eli-15 ubudala ofunda kumabanga aphakamileyo okwaliNgqina likaYehova, wagqiba ekubeni axhakamfule eli thuba ukuze axelele abanye ngeenkolelo zakhe.

Xa wayelungiselela esi sincoko, uAgata waqala ngokuthandaza kuYehova ecela ukhokelo Iwakhe waze emva koko wenza uphando ngalo mbandela. Wafumana inkcazelo exubusha lo mbandela kwiMboniselo kaJulalyi 1, 1995. Wacaphula umbuzo owabuzwa nguPontiyo Pilato kuYesu othi: “Yintoni inyaniso?” (Yohane 18:38) Watyatyadula wathi, loo mbuzo, wantama isimo sengqondo sokungakholelwa, ngokungathi uthi: ‘Inyaniso? Yintoni leyo? Ayikho into enjalo!’ UAgata walek’ umsundulo wathi lo mbuzo kaPilato wamkhumbuza ngesincoko awayesibhala nemiyalelo yaso.

Waxubusha umxholo othi inyaniso ixhomekeka kumntu ngamnye into eyinyani komnye umntu isenokuba bubuxoki komnye kwaye zombini “zinokuchana.” Wabuza imibuzo enjengothi: “Ngubani kuthi obenokuhamba ngenqwelo moya ukuba besingazi ukuba imithetho yokubhabha ichanile?” Waze emva koko wathethelela iBhayibhile esithi: “ILizwi likaThixo lixhaswa zizibakala ezinokuthenjwa.” Isincoko sakhe wasiqukumbela ngamazwi athi unethemba lokuba abo bayifuna ngokwenene inyaniso engangxengwanga kuza kufuneka babenomonde, ukuze bayifumane.

UAgata waphumelela emagqabini, kwakhona wafumana ithuba lokuba athethe neklasi yonke ngesi sincoko. Iqela labantwana afunda nabo basamkela isicelo sakhe sokuba abafundise iBhayibhile. UAgata unombulelo ngokuba eye wasebenzisa elo thuba ukuze achazele abanye izinto azikholelwayo. Ewe, ukuba siwasebenzisa kakuhle amathuba okuthetha nabanye ngenkolelo zethu siya kuzala amaduna namathokazi. Ngawaphi amathuba onokuwaxhakamfula?