Kutheni Abantu Besenza Izinto Ezimbi?
BAMBALWA abantu abanokuyiphikisa into yokuba sonke asifezekanga yaye senza iimpazamo size sizisole ngazo kamva. Kodwa ngaba loo nto ingunobangela wezinto ezininzi ezimbi, ezincinane nezinkulu, esizibona nesiziva phantse umhla nezolo ngabanye abantu okanye ezindabeni?
Abantu bayavuma ukuba nangona singafezekanga, zikho izinto esingafanele sizenze yaye abantu banokukwazi ukungazenzi izinto ezimbi. Kwakhona, inkoliso yabantu iyavuma ukuba kukho umahluko phakathi kokuthi ungaqondanga uthethe into engeyonyani ngomntu othile, nokungcolisa igama lakhe ngabom okanye phakathi kokwenzakalisa umntu ngempazamo nokumbulala ngabom. Izinto ezimbi zidla ngokwenziwa ngabantu abaziwayo ekuhlaleni. Ibangelwa yintoni le nto? Kutheni abantu besenza izinto ezimbi?
IBhayibhile ichaza izizathu. ILizwi likaThixo lizichaza kakuhle ezona zizathu zokuba abantu besenza izinto abaziyo ukuba zimbi. Khawuve ukuba lithini.
▪ “Ingcinezelo nje isengasiphambanisa isilumko.”—INTSHUMAYELI 7:7.
IBhayibhile iyavuma ukuba maxa wambi abantu banyanzelwa ziimeko ezithile ukuba benze izinto ebebengazimiselanga kuzenza. Abanye banokude bophule umthetho kuba bezama ukulwa nengcinezelo ethile. Incwadi ethi Urban Terrorism ithi “amaxesha amaninzi into eyenza abantu babe ngabagrogrisi yimeko ecinezelayo yezopolitiko, yezentlalo neyezoqoqosho.”
▪ “Ukuthanda imali yingcambu yazo zonke iintlobo zobubi.”—1 TIMOTI 6:10.
Abanye abantu bathi nabantu abalungileyo bayawophula umthetho xa benikwa imali eninzi. Nabantu abanobubele bayatshintsha xa bebona imali. Cinga nje ngolwaphulo mthetho olubangelwa kukubawa, njengobugrogrisi, ukuqhatha, ukuxhwila abantu nokubulala.
▪ “Ngenxa yokuba isigwebo nxamnye nomsebenzi ombi singaphunyezwa ngokukhawuleza, ngoko intliziyo yoonyana babantu izele ngaphakathi kwabo kukwenza okubi.”—INTSHUMAYELI 8:11.
Esi sibhalo sibonisa ukuba abantu baye bacinge ukuba bangenza nantoni na xa bengabonwa ngabasemagunyeni. Kunjalo ngabantu abaqhuba ngesantya esiphezulu, abakopayo kwiimviwo, abeba imali karhulumente nabenza ezinye izinto ezingekho mthethweni. Xa abasemagunyeni bengekho ngqongqo okanye abantu bengakoyiki ukubanjwa, nabantu abadla ngokuwuthobela umthetho bayaqaqadeka. Iphephancwadi elithi Arguments and Facts lithi “nabanye abahlali baye benze izinto ezimanyumnyezi xa bebona izaphuli mthetho zingohlwaywa.”
▪ “Ngamnye ulingwa ngokutsalwa nokuwexulwa ngumnqweno wakhe. Wandule ke umnqweno, xa uthe wakhawula, uzale isono.”—YAKOBI 1:14, 15.
Bonke abantu bayakwazi ukucinga izinto ezingalunganga. Silingwa mihla le ukuba senze izinto ezimbi. Ngamaxesha okubhalwa kweBhayibhile kwathiwa kumaKristu: “Akukho sihendo sinibambileyo ngaphandle koko kuqhelekileyo ebantwini.” (1 Korinte 10:13) Kodwa ke isono senzeka xa umntu eqhubeka ecinga ngaloo nto alingwa ngayo aze ayivumele ukuba ikhule entliziyweni yakhe. Lo mbhalo kaYakobi ungasentla ulumkisa ngelithi umntu ovumela iminqweno ephosakeleyo ukuba ‘ikhawulwe,’ ekugqibeleni wenza isono.
▪ “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.”—IMIZEKELISO 13:20.
Asinakuyikhanyela into yokuba abahlobo bethu banokusakha okanye basichithe. Abantu badla ngokwenza into abangazimiselanga kuyenza ngenxa yokuqhutywa ngabahlobo babo abangalunganga. EBhayibhileni igama elithi ‘isiyatha’ alibhekiseli kubantu abangekho krelekrele kodwa libhekisela kubantu abangasinanziyo isiluleko sobulumko seLizwi likaThixo. Kungakhathaliseki ukuba sibadala okanye sibancinane, siya “kwehlelwa bububi” ukuba asiyivumeli iBhayibhile isalathise xa sikhetha abahlobo.
Ezi vesi zeBhayibhile zingasentla kunye nezinye ezininzi zisichaza kakuhle isizathu sokuba abantu abalungileyo besenza izinto ezimbi. Nangona kuluncedo ukuqonda isizathu sokuba abantu benze izinto ezimbi, ngaba likho ithemba lokuba izinto ziza kutshintsha? Ewe likho kuba kaloku iBhayibhile ayipheleli nje ekuchazeni isizathu sokuba abantu benze izinto ezimbi kodwa iphinda ithembise nokuba izinto ezinjalo ziza kuphela. Ziziphi ezi zithembiso? Ngaba ziza kuphela zonke izinto ezimbi ezenziwa emhlabeni? Iimpendulo zifumaneka kwinqaku elilandelayo.