Ngaba IEden Yayilikhaya Labantu Lantlandlolo?
YIBA nomfanekiso ngqondweni wakho usemyezweni. Akukho zinto ziphazamisayo, njengesiphithiphithi sasezidolophini. Lo myezo mkhulu kwaye ayikho into ephazamisa uxolo. Ngaphezu koko, akukho nto ikuxhalabisayo, ungumqabaqaba awubikwa nowempumlo. Amehlo, iindlebe, impumlo, namanye amalungu asebenza kakuhle.
Amehlo akho abona iintyatyambo ezimibalabala, umlambo ocwengileyo, amagqabi aluhlaza emithi nengca ehlatywe lilanga nesethunzini. Uva impepho etsho kamnandi uze usezele nevumba elimnandi leentyatyambo. Uva ukurhwashaza kwamagqabi namanzi abetheka ematyeni, ukuntyiloza kweentaka, nentsholo eyenziwa zizinambuzane. Njengokuba unomfanekiso ngqondweni wale ndawo, awukulangazeleli ukuba kuyo?
Ehlabathini jikelele abantu bakholelwa ukuba ekuqaleni abantu babephila kwindawo enje. Ukutyhubela iinkulungwane, amaYuda, ingqobhoko namaSilamsi aye afundiswa ngomyezo wase-Eden, apho uThixo abeka khona uAdam noEva. Ngokutsho kweBhayibhile babephila eluxolweni yaye bonwabile. Babeseluxolweni nezilwanyana noThixo owabanika ithemba lokuphila ngonaphakade.—Genesis 2:15-24.
NamaHindu ayakholelwa ukuba yakhe yakho iparadesi. AmaBhuda akholelwa ukuba iinkokeli zawo zokomoya okanye ooBhuda bavela ngelo xesha xa umhlaba wawunjengeParadesi. Uthotho lweecawa zaseAfrika zifundisa izinto ezifana nezo zikwibali lika-Adam noEva.
Imfundiso yokuba kwakhe kwakho iparadesi iyafumaneka kwiinkonzo neenkolelo ezininzi zabantu. Omnye umbhali wathi: “Iimpucuko ezininzi zikholelwa ukuba mandulo kwakukho iparadesi ekwakuphila abantu abafezekileyo kuyo, abakhululekileyo, abaseluxolweni, abonwabileyo, abangaswele nto, kungekho nto ibakhathazayo, ukujongana ngezikhondo zamehlo neengxabano. . . . Le nkolelo yenza abantu basoloko benyeke ngasemva kule paradesi ingasekhoyo kuba beyilangazelela.”
Makube mhlawumbi loo mabali nezi nkolelo ziphuma kumthombo omnye? Ngaba kunokwenzeka ukuba bonke abantu baphenjelelwa yinto eyayenzeke ngokwenene? Ngaba ngokwenene wawukho umyezo wase-Eden, uAdam noEva?
Abagculeli bayikhaba ngawo omane le nkolelo. Kweli xesha lenzululwazi abantu abaninzi bathi yintsomi leyo. Into emangalisayo kukuba asingobahedeni kuphela abathetha loo nto. Iinkokeli ezininzi zonqulo zikhuthaza ukungakholelwa kumyezo wase-Eden. Zithi ayizange ibekho indawo enjalo. Zithi eli bali yintsomi okanye umfuziselo.
Kakade ke, iBhayibhile inayo imizekeliso. NoYesu ngenkqu wenza eyona idumileyo. Noko ke, iBhayibhile ithetha ngeli bali lase-Eden, njengembali yokwenene kungekhona umzekeliso. Ukuba iziganeko ekuthethwa ngazo apha azizange zenzeke, inokuthenjwa njani yonke iBhayibhile? Makhe sihlole isizathu sokuba abanye bewuthandabuza umyezo wase-Eden size sibone enoba izizathu zabo ziyavakala. Emva koko, siza kubona isizathu sokuba le ngxelo ibalulekile kuthi.