Yintoni Abafanele Bayifunde Abantwana?
“Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni.”—2 TIMOTI 3:16.
ABANTWANA kufuneka bafundiswe inyaniso ngoThixo. Banokuyifunda phi inyaniso? Kweyona ncwadi ihlonelwa kakhulu ehlabathini, iBhayibhile.
IBhayibhile injengeleta evela kuThixo. Kuloo leta uThixo utyhila ubuntu bakhe aze achazele bonke abantwana bakhe, abadala nabancinane, imilinganiselo yokuziphatha. Nazi ezinye iimfundiso eziseBhayibhileni ezinokufundwa nangabantwana abancinane.
Yintoni uThixo afuna siyazi ngaye?
◼ Oko kufundiswa yiBhayibhile: “Wena, ogama linguYehova, nguwe wedwa Oyena Uphakamileyo phezu komhlaba wonke.”—INdumiso 83:18.
Isifundo: UThixo akangomandla nje amakhulu, kodwa ungumntu wokwenene nonegama.
◼ Oko kufundiswa yiBhayibhile: “Uyazigocagoca zonke iintliziyo, akuqonde konke ukutyekela kweengcamango. Ukuba uthe wamfuna, uya kumfumana.”—1 Kronike 28:9.
Isifundo: UYehova uThixo usikhathalele sonke, kuquka nabantwana abancinane. (INdumiso 10:14; 146:9) Ufuna sifunde ngaye.
◼ Oko kufundiswa yiBhayibhile: ‘Nize ningayixhwalekisi inkwenkwe engenayise. Ukuba uthe wayixhwalekisa nangayiphi na indlela, yadanduluka kum, ndosiva ngenene isikhalo sayo.’—Eksodus 22:22-24.
Isifundo: UYehova uphulaphula nemithandazo yabantwana abancinane. Sinokuthetha noThixo rhoqo siphalaze imbilini yethu kuye.
◼ Oko kufundiswa yiBhayibhile: “Izihlandlo ngezihlandlo babemvavanya uThixo, bemenza buhlungu Lowo uyiNgcwele kaSirayeli.”—INdumiso 78:41.
Isifundo: Amazwi nezenzo zethu zinokuchaphazela iimvakalelo zikaYehova, ngoko simele sicinge ngaphambi kokuba sithethe size senze.
Simele sibaphathe njani abantu abahlukileyo kuthi?
◼ Oko kufundiswa yiBhayibhile: “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”—IZenzo 10:34, 35.
Isifundo: Ukuba uThixo wamkela abantu bazo zonke iimvelaphi, asimelanga sicalule abantu ngokwebala okanye iimpawu zobuso babo.
◼ Oko kufundiswa yiBhayibhile: “Nisoloko nikulungele ukuzithethelela phambi kwakhe wonk’ ubani ofuna kuni isizathu sethemba elikuni, kodwa nisenjenjalo ngomoya wobulali nentlonelo enzulu.”—1 Petros 3:15.
Isifundo: Xa sithetha ngonqulo, simele sithethe ngolweyiseko kodwa asimele sibe krwada. Kwakhona simele sibahlonele abantu abaneenkolelo ezingafaniyo nezethu.
Simele siwaphathe njani amalungu eentsapho zethu?
◼ Oko kufundiswa yiBhayibhile: “Bantwana, bathobeleni abazali benu ezintweni zonke, kuba oko kukholekile eNkosini.”—Kolose 3:20.
Isifundo: Abantwana abathobelayo ababonisi nje ukuba bathanda abazali kodwa babonisa nokuba bafuna ukukholisa uThixo.
◼ Oko kufundiswa yiBhayibhile: “Qhubekani ninyamezelana yaye nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani.”—Kolose 3:13.
Isifundo: Abanye abantu, kuquka amalungu eentsapho zethu, maxa wambi baya kusiphoxa. Kodwa ukuba sifuna uThixo asixolele, nathi simele sixolele.—Mateyu 6:14, 15.
Kutheni simele sinyaniseke size sibe nobubele?
◼ Oko kufundiswa yiBhayibhile: “Ekubeni nikulahlile ukuxoka, ngamnye kuni makathethe inyaniso nommelwane wakhe.”—Efese 4:25.
Isifundo: Xa sithetha inyaniso, sixelisa uThixo yaye loo nto iyamonwabisa. Xa siziqhelisa ukuxoka, siya kufana notshaba lukaThixo uMtyholi ‘onguyise wobuxoki.’—Yohane 8:44; Tito 1:2.
◼ Oko kufundiswa yiBhayibhile: “Phatha abanye ngendlela ofuna bakuphathe ngayo.”—Mateyu 7:12,“iContemporary English Version.”
Isifundo: Simele sicingele amalungu eentsapho zethu nabanye abantu. Xa ‘sivelana’ nabanye, nabo baya kusiphatha ngobubele.—1 Petros 3:8; Luka 6:38.
Njengoko le mizekelo ibonisa, izifundo eziseBhayibhileni zinokunceda abantwana babe nombulelo, intlonelo baze babe novelwano xa bebadala. Kodwa ngubani omele afundise abantwana?