2 UThixo Akakhathali—Ngaba Yinyaniso?
Mhlawumbi wakhe weva kusithiwa: “Ukuba uThixo ebebakhathalele abantu, ebeza kuphelisa ubungendawo nokubandezeleka ehlabathini. Enoba ubakhathalele abantu, kodwa mna akandikhathalelanga.”
Oko kufundiswa yiBhayibhile: UYehova uThixo akanguye unobangela wobungendawo. (Yakobi 1:13) Nangona enokubuphelisa nanini na, uyabuvumela ukuba bubekho okwexeshana ukuze kuphendulwe imibuzo eyabuzwa ekuqaleni kwembali yoluntu. Ekugqibeleni uza kungenelela kwimicimbi yabantu aze alungise wonke umonakalo obangelwe ngabantu abangafuni ukulawulwa nguye.—Genesis 3:1-6; Isaya 65:17.a
Nangona ebakhathalele bonke abantu, uThixo unomdla kumntu ngamnye. UMateyu 10:29-31 ubonisa ukuba wazi izinto ezincinane ngathi esingazaziyo kwanathi: “Ngaba oongqatyana ababini abathengiswa ngengqekembe exabiso lincinane na? Kanti akukho namnye kubo oya kuwela emhlabeni ngaphandle kolwazi lukaYihlo. Nina ke, kwaneenwele ezi zentloko yenu zibaliwe zonke. Ngoko ke musani ukoyika: Nixabiseke ngaphezu koongqatyana abaninzi.”
Indlela ekukunceda ngayo ukwazi inyaniso: Sidla ngokuzinxwema kubantu abangqwabalala nabangakhathaliyo. Ayothusi into yokuba ubuxoki bokuba uThixo akakhathali benze abantu abaninzi abaziduba ngokufuna ukumazi okanye basondela kuye kuphela xa beziva benyanzelekile. Ukwazi ukuba uYehova uThixo uyakhathala kunokukwenza ufune ukufunda okungakumbi ngaye uze ube nobuhlobo obusenyongweni naye.
Ngokomzekelo, kusenokwenzeka ukuba ukhe wathandaza kuThixo kodwa uzibuze enoba ukuphulaphule okanye uza kukuphendula kusini na. IBhayibhile iyasiqinisekisa ukuba ‘uMphulaphuli wemithandazo’ ubaphulaphula ngokunyanisekileyo ngalo lonke ixesha abo bathandaza kuye ngokunyanisekileyo.—INdumiso 65:2.
UThixo ukumema ukuba ‘uliphose kuye lonke ixhala lakho, kuba ukukhathalele.’ (1 Petros 5:7) Sinokukholosa ngaye kwanaxa sixinezelekile kuba iLizwi lakhe lithi: “UYehova usondele kwabo baphuke intliziyo; Yaye abo bamoya utyumkileyo uyabasindisa.”—INdumiso 34:18.
[Umbhalo osemazantsi]
a Ukuze ufumane inkcazelo engakumbi ngesizathu sokuba uThixo avumele ukubandezeleka, funda isahluko 11 sencwadi ethi Yintoni Ngokwenene Efundiswa YiBhayibhile?
[Amagama acatshulweyo akwiphepha 5]
Ukuba uThixo akakhathali, kutheni esimema ukuba sithandaze kuye?