Imibuzo Yabafundi . . .

Ngaba Iintsana Zimele Zibhaptizwe?

▪ UVictoria uthi, “Ndandisoyika ukuba umntakwethu, uJohn umphefumlo wakhe wawuza kubhadula esithubeni.” Yintoni le yayimenza oyike? Uthi: “UJohn wafa ngaphambi kokuba abhaptizwe yaye omnye umfundisi wamaKatolika wathi ngenxa yaloo nto, umphefumlo kaJohn wawuza kubhadula esithubeni ngonaphakade.” Yoyikisa ngokwenene loo mfundiso, kodwa ngaba iyaxhaswa ziZibhalo? Ngaba iBhayibhile ifundisa ukuba abantwana abafa bengabhaptizwanga baya kuhlala kwindawo yentlambululo-miphefumlo ngonaphakade?

IBhayibhile iyafundisa ukuba amaKristu afanele abhaptizwe. UYesu wayalela abalandeli bakhe wathi: “Hambani ke ngoko niye kubenza abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bazigcine zonke izinto endiniyalele zona.” (Mateyu 28:19, 20) Phawula ukuba abo babhaptiziweyo bafanele babe ngabafundi bakaYesu. Ngamanye amazwi, ngabantu abaye bafunda ngoYesu baza bakhetha ukumlandela—nto leyo ezingenakukwazi ukuyenza iintsana.

Nakuba kunjalo, abaninzi bathi umyalelo kaYesu uyasebenza nasebantwaneni. Umfundisi wecawa yamaLuthere uRichard P. Bucher uthi: “Wonke umntu umele abhaptizwe kuquka neentsana.” Wongez’ esithi: “Ukungababhaptizi kuya kubenza bangaxolelwa baze bagwetywe.” Ezo mfundiso ziphikisana neemfundiso zikaYesu ngeendlela ezintathu.

Okokuqala, uYesu akazange afundise ukuba iintsana zifanele zibhaptizwe. Kutheni ibalulekile loo nkalo? Phawula ukuba: UYesu wabafundisa ngokucokisekileyo abafundi bakhe ngezinto ezifunwa nguThixo. Maxa wambi wayephindaphinda iimfundiso ezibalulekileyo. Kwakutheni? Wayefuna ukuqinisekisa ukuba abafundi bakhe bayaziqonda. (Mateyu 24:42; 25:13; Marko 9:34-37; 10:35-45) Sekunjalo, akazange nakanye afundise ukuba iintsana zimele zibhaptizwe. Ngaba mhlawumbi uYesu walibala? Nakanye! Ngokuqinisekileyo, ukuba iintsana zazimele zibhaptizwe, uYesu ngewayetshilo.

Okwesibini, uYesu akazange afundise ukuba abantu bayabandezeleka besakufa. Wayezikholelwa iZibhalo ezithi: “Abaphilayo bayazi ukuba baya kufa; kodwa abafileyo, abazi nto konke.” (INtshumayeli 9:5) UYesu wayesazi ukuba abantu abafileyo abayi kwindawo yentlambululo-miphefumlo, isihogo somlilo nakuyo nayiphi na enye indawo. Kunoko wafundisa ukuba abekho zingqondweni, ngokungathi balele.—Yohane 11:1-14.

Okwesithathu, uYesu wafundisa ukuba “bonke abo bakumangcwaba enkumbulo” baza kuvuswa babuyiselwe ebomini. (Yohane 5:28, 29) Ngokungathandabuzekiyo, oku kuya kuquka izigidi ezingazange zibhaptizwe. Emva kokuba bevusiwe, baya kufumana ithuba lokufunda izinto ezifunwa nguThixo baze baphile ngonaphakade kumhlaba oyiParadesi.a—INdumiso 37:29.

Kucacile ke ukuba, iBhayibhile ayifundisi ukuba iintsana zifanele zibhaptizwe.

[Umbhalo osemazantsi]