Imibuzo Evela Kubafundi
Ngaba sinokulazi elona xesha lingqalileyo losuku awabethelelwa ngalo uYesu Kristu?
Lo mbuzo uphakama ngenxa yokungadibani okubonakala phakathi kweengxelo eziphefumlelweyo ezingokufa kukaYesu ezibhalwe ngababhali beVangeli, uMarko nompostile uYohane. UMarko uthi: “Ke kaloku kwakulilixa lesithathu, yaye [amajoni] ambethelela.” (Marko 15:25) Kodwa ke uYohane uthi, “kwakumalunga nelixa lesithandathu” xa uPilato wanikela uYesu kumaYuda ukuze ambethelele. (Yoh. 19:14-16) Abaphengululi beBhayibhile baye benza amalinge okukuchaza ngokweenkcukacha ukungadibani okubonakala kwezi ndinyana. Kodwa ke, akukho nkcazelo yaneleyo ingokweZibhalo enokuchaza umahluko ophakathi kwezi ngxelo zimbini. Sekunjalo, ukuhlola indlela abantu ababelijonga ngayo ixesha ngezo mini kunokusinceda.
Kwinkulungwane yokuqala yeXesha Eliqhelekileyo, amaYuda ayesahlula imini ibe ziiyure ezili-12, ebala ukususela ekuphumeni kwelanga. (Yoh. 11:9) Ngoko ‘ilixa lesithathu’ lalisusela kweyesibhozo ukusa kweyesithoba kusasa yaye ‘ilixa lesithandathu’ lona lalisusela kweyeshumi elinanye ukuya kutsho ngemini enkulu. Kakade ke, ilanga laliphuma lize litshone ngamaxesha ahlukeneyo ebudeni bonyaka. Ngenxa yoko, ubude bemini babusahluka yaye buxhomekeka kumaxesha onyaka. Ngaphezu koko, ilixa losuku ngalunye lalisaziwa ngokujongwa kwelanga ukuba limi ndawoni na. Ngenxa yoko, ixesha laliqikelelwa. IZibhalo zamaKristu zesiGrike zidla ngokuthetha ngeziganeko ezenzeka ngelixa lesithathu, elesithandathu, okanye elesithoba—nto leyo edla ngokuthetha ukuba zenzeka malunga nelo xesha. (Mat. 20:3, 5; IZe. 10:3, 9, 30) Kwakubhekiselwa kwixesha elingqalileyo, ‘njengelixa lesixhenxe,’ kuphela xa ixesha libalulekile kwingxelo ekuthethwa ngayo.—Yoh. 4:52.
Iingxelo zeVangeli zithetha into enye kumba wexesha leziganeko zasebudeni bosuku lokugqibela uYesu esemhlabeni. Zone zibonisa ukuba ababingeleli namadoda amakhulu ahlanganisana ngonyezi aza asa uYesu kwiRhuluneli yamaRoma uPontiyo Pilato. (Mat. 27:1; Marko 15:1; Luka 22:66; Yoh. 18:28) UMateyu, uMarko, noLuka bonke bathi ukususela ngelixa lesithandathu, xa uYesu wayesele exhonywe esibondeni, kwabakho ubumnyama elizweni “de kwalilixa lesithoba.”—Mat. 27:45, 46; Marko 15:33, 34; Luka 23:44.
Enye into ebalulekileyo ekusenokwenzeka ukuba yayichaphazela indlela elabalwa ngayo ixesha lokubethelelwa kukaYesu yile: Ukutywatyusha kwakugqalwa njengenxalenye yokubethelelwa komntu. Maxa wambi umntu wayetywatyushwa de afe. Kwimeko kaYesu, kusenokwenzeka ukuba kwakukubi kakhulu kuba kwada kwanyanzeleka ukuba athwalelwe isibonda sakhe sentuthumbo yenye indoda emva kokuba ekhe wazama ukusithwala ngokwakhe. (Luka 23:26; Yoh. 19:17) Ukuba ukutywatyusha kwakujongwa njengenxalenye yokubethelelwa komntu, kumele ukuba kwadlula ixesha elithile ngaphambi kokubethelelwa kukaYesu kwisibonda sentuthumbo. Ngoko abantu abahlukahlukeneyo banokuchaza amaxesha angafaniyo okubethelelwa, kuxhomekeka kwinqanaba lexesha abaligqala njengelona lixa lokubethelelwa.
Umpostile uYohane wabhala ingxelo yakhe kumashumi eminyaka emva kwabanye ababhali beVangeli. Ngoko wayezazi ezabo iingxelo. Liyinyaniso elokuba uYohane wachaza ixesha elibonakala lahlukile kwelo lachazwa nguMarko. Kodwa ke, oku kunika ubungqina obucacileyo bokuba uYohane akazange nje akhuphele ingxelo kaMarko. Bobabini uYohane noMarko babephefumlelwe nguThixo. Nangona kungekho nkcazelo yaneleyo isuka kwiZibhalo echaza lo mahluko, simele sizithembe iingxelo zeVangeli.