Okuphuma Koovimba Bethu
‘Yandenza Ndajongwa Ngumntu Wonke’
Xa umshumayeli wexesha elizeleyo uCharlotte White wafika eLouisville, eKentucky, eUnited States erhuqa isutkheyisi enamavili, waphawulwa ngabantu abaninzi.
KWAKUNGOWE-1908, yaye ngokuqinisekileyo uDade White wayifumana ingqalelo yabantu baloo dolophu njengoko wayenemveliso entsha kraca—iDawn-Mobile. Wathi: “Abantu babethetha ngayo yaye yandenza ndajongwa ngumntu wonke.”
AmaNgqina kaYehova, awayebizwa ngokuba ngaBafundi BeBhayibhile ngelo xesha akubona kufanelekile ukuxelela abanye ngenyaniso exabisekileyo awayeyifumene ekuphandeni iZibhalo ngokuzimisela. Abaninzi bafumana ulwazi lweBhayibhile ngokufunda ungcelele lweencwadi ezinomxholo othi Millennial Dawn (nezathi kamva zabizwa ngokuba ziiStudies in the Scriptures). Loo maKristu akhutheleyo aya kwiindawo ezikude—enqumla iidolophu, iilali namaphandle—enika abantu abathanda ukufunda ezi ncwadi zikwabizwa ngokuba “Zizandla Zokunceda Abafundi BeBhayibhile.”
Ngowe-1908, uDade White nabanye abavakalisi boBukumkani abakhutheleyo banika abantu le miqulu mithandathu, ngexabiso elizii-$1,65 (zaseUnited States). Kunokuba bakhawuleze banike umninimzi iincwadi, babethatha iiodolo baze kamva babuye bazizise ezo ncwadi—ngokuqhelekileyo xa umninimzi enemali. Enye indoda eyayichasa yakhalaza ngokubancinci kwemali ehlawulwa ngabantu xa benikwa ezi ncwadi!
UMalinda Keefer uthi ngeny’ imini kwafuneka athathe iiodolo zeencwadi ezingamakhulu amabini ukuya kwamathathu ngeveki. Kodwa umdla omkhulu owabonakaliswayo kwiiDawns wabangela ingxaki. Kuba, umqulu wesithandathu uwodwa wawunamaphepha angama-740! IThe Watch Tower iyavuma ukuba “iincwadi ezingamashumi amahlanu zazinobunzima obuziikhilogram ezili-18 yaye lowo yayingumthwalo onzima kakhulu,” ingakumbi koodade.
Ukuze kuconjululwe ingxaki yokuhambisa iincwadi ezibumba iDawn, uMzalwan’ uJames Cole wenza inqwelwana enamavili amabini ukuze kubekwe isutkheyisi enezi ncwadi ize iqiniswe ngezikhonkwane. Njengoko wayengasanyanzelekanga ukuba athwale iibhokisi ezizele iincwadi nezinzima, umzalwana owenza le nqwelwana wathi: “Andisazityobozi magxa.” Esi sixhobo sitsha wasibonisa okokuqala abaphulaphuli ababenemincili kwindibano yesithili yaBafundi BeBhayibhile eCincinnati, eOhio. Kumaqhosha akwincam nganye ekwintsimbi engaphantsi, kwakubhalwe igama elithi Dawn-Mobile, ekubeni eyona nto yayikuloo sutkheyisi yayiyimiqulu yeMillennial Dawn. Nangona kwakufuneka umntu aqhelisele kancinane, kwaba lula noko ngoku ukuhamba nesutkheyisi ezele qhu ziincwadi, kulula nokuyibamba ngesandla esinye. Wawunokuyihlisa okanye uyinyuse xa uthanda, yaye amavili ayo ayekwazi ukuhamba kwisiporo senqwelo. Emva kokushumayela imini yonke amavili wawunokuwagobela ecaleni lesutkheyisi xa ugoduka uhamba ngenyawo okanye ukhwele uloliwe.
Oodade abakwinkonzo yexesha elizeleyo babeyifumana simahla iDawn-Mobile. Ngaphandle koko, yayixabisa ii-$2,50 (zaseUnited States). UDade Keefer, okumfanekiso okweli phepha, wayesele elichule lokusebenzisa iDawn-Mobile kangangokuba wayekwazi ukuqhuba isutkheyisi ezeleyo ngesandla esinye aze aphathe enye ibhegi eneencwadi ngesinye. Njengoko wayefumana abantu abaninzi abanomdla kwenye idolophu eyayinemigodi yasePennsylvania, eUnited States, wayeyiwela kathathu okanye kane ibhulorho xa ilusuku lokusa iincwadi.
Xa yayisiya ngasekupheleni iminyaka yee-1980, omnye umqhubi wenqwelo-moya wenza inqwelwana yomthwalo esele iqhelekile kwizikhululo zeenqwelo-moya nakwizixeko eziphithizelayo. Kodwa malunga nekhulu leminyaka eladlulayo, kubonakala ngathi aBafundi BeBhayibhile babekuthanda ukujongwa ngabantu abafun’ ukwazi, njengoko babeqhuba iiDawn-Mobiles zabo esidlangalaleni besasaza imbewu exabisekileyo eyinyaniso yeBhayibhile.
[Amagama acatshulweyo akwiphepha 32]
UDade Keefer wayeyiwela kathathu okanye kane ibhulorho xa ilusuku lokusa iincwadi
[Amagama acatshulweyo akwiphepha 32]
Yayicombulula ingxaki yokuhambisa iincwadi ezibumba i-Dawn