Ngaba Ubusazi?
Sasiyintoni “isihlalo sokugweba” awasiwa kuso umpostile uPawulos?
▪ Ingxelo ebhalwe kwiZenzo 18:12, 13 ithi amaYuda aseKorinte atyhola uPawulos ngokushumayela ngokungekho mthethweni yaye amsa “kwisihlalo sokugweba,” okanye ibeʹma (igama lesiGrike elithetha “indawo yokunyuka”). KwiKorinte yamandulo kwakukho iqonga eliphakamileyo kwindawo yemarike eyayisembindini wesixeko, ekusenokwenzeka ukuba yayikufutshane nendlu yesikhungo. Eli qonga lalisetyenziswa xa kuthethwa nabantu. Lalakhiwe ngelitye lemabhile elinombala oblowu nomhlophe yaye lihonjisiwe, apho kwakukho namagumbi amabini awayenezitulo ezenziwe ngelitye lemabhile ababehlala belinde kuzo abantu yaye enemigangatho emihle.
Kubonakala ukuba loo ndawo sasithetha simi kuyo isithethi yayi sisihlalo sokugweba awathi umpostile uPawulos waziswa kuso phambi kwebamba uGaliyo, irhuluneli yaseAkhaya engumRoma. Amagosa ayehlala kule ndawo ukuze amamele amatyala nokuze awise izigwebo phambi kwenginginya zabantu ezazihlanganisana apho.
Kwizixeko zamaGrike, kwakuyinto eqhelekileyo ukuba abantu bahlanganisane kwindawo enjengebeʹma, apho ushishino lwaluqhutyelwa khona. Kwiingxelo eziphathelele ukuxoxwa kwetyala likaYesu, imibhalo yesiGrike ekuMateyu 27:19 nakuYohane 19:13 ibhekisela kuPontiyo Pilato njengothetha nesihlwele ekwibeʹma.—IZenzo 12:21.
Kwakutheni ukuze akhubeke amanye amaYuda yindlela awafa ngayo uYesu?
▪ Umpostile uPawulos wathetha la mazwi ngokuphathelele amaKristu enkulungwane yokuqala: “Thina sishumayela uKristu ebethelelwe, nto leyo esisikhubekiso kumaYuda nebubudenge kwiintlanga.” (1 Korinte 1:23) Kwakutheni ukuze abanye bakhubeke yindlela awafa ngayo uYesu?
Ngokuphathelele indlela uYesu awafa ngayo nezithethe zabo babehlala eMbindi Mpuma ngenkulungwane yokuqala, umhlalutyi weBhayibhile uBen Witherington III uthi “kwakulihlazo elikhulu ukubulawelwa ukholo ngaloo ndlela, kubantu balapho.” Lo kaWitherington uphinda athi: “Abantu belo xesha babekholelwa ukuba indlela umntu asweleke ngayo ibonisa uhlobo lomntu ebe lulo. Kwimeko enjalo uYesu wajongwa njengonqevu, indoda eyangcatsha ilizwe neyayifanele yohlwaywe ngendlela ekwenziwa ngayo xa kusohlwaywa amakhoboka avukelayo.” Sinale ngxelo engemvelaphi yesithethe, kubonakala kungekho ngqiqweni ukuthi amaKristu enkulungwane yokuqala aziqweba ngokwawo iingxelo ezithetha ngokufa novuko lukaYesu.