Okuphuma Koovimba Bethu
“Ndifunda Ukuwuthanda Ngakumbi Umsebenzi Wobu-colporteur Suku Ngalunye”
Ngowe-1886, iikopi ezilikhulu zeMillennial Dawn, Umqulu I, zasuka kwiBible House, eAllegheny, ePennsylvania, eUnited States, zisiya eChicago, eIllinois. UCharles Taze Russell wayenethemba lokusasaza le miqulu mitsha kwiivenkile ezithengisa iincwadi. Omnye umzi-mveliso omkhulu waseUnited States ohambisa iincwadi elunqulweni wavuma ukuyithatha uze uyihambise iMillennial Dawn. Kodwa emva kweeveki ezimbini, wonke loo mthwalo wabuyela kwiBible House.
Kuthiwa omnye umfundisi owaziwayo wacaphuka akubona iMillennial Dawn ibekwe kunye neencwadi zakhe. Eligqabi ngumsindo wathi, ukuba le ncwadi iqhubeka ikweli thala, yena nabanye abahlobo bakhe abaziwayo abangabefundisi baza kuthatha iincwadi zabo—namashishini abo—bawase kwenye indawo. Umntu weli thala wazibuyisa ezi Dawns kodwa emadolw’ anzima. Ukongezelela, kwakusele kwenziwe izibhengezo kumaphephandaba. Kodwa abachasi baqinisekisa ukuba izivumelwano zokubhengeza ziyarhoxiswa. Noko ke, le mpapasho intsha yayiza kufikelela njani kubantu abafuna inyaniso?
Abo babizwa ngokuba ziicolporteurs, baba luncedo kakhulu.a Ngowe-1881, iZion’s Watch Tower yayifuna abashumayeli abali-1 000 ababeza kusasaza uncwadi lweBhayibhile ixesha elizeleyo. Nangona iicolporteurs zazingamakhulu ambalwa, zasasaza imbewu yenyaniso ngeencwadi eziprintiweyo nakwezona ndawo zikude. Ngowe-1897, zazimalunga nesigidi iiDawns ezasasazwa ngokubanzi ziicolporteurs. Uninzi lwazo lwaluphila ngemalana oluyifumana ngomrhumo ngamnye weMboniselo okanye iincwadi oluzihambisileyo.
Zazingoobani iicolporteurs ezinenkalipho? Ezinye zaqala zisekwishumi elivisayo, kanti ezinye zaqala sele zikhulile ngeminyaka. Uninzi lwazo lwalungatshatanga, kanti ezinye zazitshatile kodwa zingenabantwana yaye zaziliqela iintsapho ezazisenza lo msebenzi. Iicolporteurs zexesha elizeleyo zazisebenza imini yonke yaye ezo zingabancedani zazisebenza iyure okanye iiyure ezimbini ngosuku. Asingomntu wonke owayesempilweni okanye eneemeko ezimvumelayo ukuba enze umsebenzi wobucolporteur. Kodwa kwindibano yowe-1906 abo babenako baxelelwa ukuba akuyomfuneko ukuba babe “zizifundiswa okanye babe nesiphiwo esithile okanye bathethe iilwimi zeengelosi ukuze bakwazi ukwenza lo msebenzi.”
Phantse kwilizwekazi ngalinye, abantu abaqhelekileyo benza umsebenzi omhle ngendlela engathethekiyo. Omnye umzalwana waqikelela ukuba kwiminyaka esixhenxe wahambisa iincwadi ezili-15 000. Kanti wathi: “Andizange ndibe yi-colporteur kuba ndifuna ukuthengisa iincwadi kodwa kungenxa yokuba bendifuna ukuba lingqina likaYehova nelenyaniso yakhe.” Naphi na apho zazisiya khona iicolporteurs, imbewu yenyaniso yatyaleka yaye iqela laBafundi beBhayibhile laqalisa ukwanda.
Abefundisi babehlekisa ngeecolporteurs, bezibiza ngokuba ngabathengisi beencwadi. Ngowe-1892 iMboniselo yagqabaza yathi: “Bambalwa ababezazi njengabona bameli beNkosi, okanye abasiqondayo isidima iNkosi esibonayo ekuthobekeni nasekuzincameni kwazo.” Eneneni, ubomi beecolporteurs “babunzima” njengokuba omnye watshoyo. Kwakuhanjwa ngezihlangu ezomeleleyo neebhayisikile. Kwiindawo ekunqabe kuzo imali, iicolporteurs zazinika abantu iincwadi baze bona bazinike ukutya. Emva kokuhamba imini yonke entsimini, zidiniwe kodwa zonwabile zazibuyela ezintenteni nakwiindawo ezaziziqeshile. Kamva kwabakho iColporteur Wagon, uzenzele wekharavani owawusonga ixesha nemali eninzi.b
Okokuqala kwiNdibano eyayiseChicago ngowe-1893, ucwangciso lwaquka inxalenye eyayithetha ngeecolporteurs ezikhethekileyo. Kule nxalenye kwakutshintshiswana kubaliswa amava, kuthethwa ngamacebiso eendlela zokushumayela namanye amacebiso aluncedo. UMzalwan’ uRussell wakhuthaza abashumayeli abasebenza nzima ukuba batye isidlo sakusasa esinesondlo, ebudeni bentsasa basele iglasi yobisi baze ngemini eshushu basele i-ice-cream soda.
Iicolporteurs ezazifuna umntu eziza kusebenza naye zazinxiba iribhoni emthubi. Ezo zisaqalayo zazihamba nezingamagqala. Olo qeqesho lwalufuneka kuba enye icolporteur esaqalayo, isoyika yathi xa yayihambisa iincwadi, “Uyazifuna ezi ncwadi?” Okuvuyisayo kukuba umninimzi wathi uyazifuna waza kamva waba ngudade.
Omnye umzalwana wabuza, ‘Ngaba ndifanele ndiqhubeke nale meko ndikuyo ndize ndinikele ngee-$1 000 (zaseUnited States) ngonyaka kulo msebenzi, okanye ndifanele ndibe yi-colporteur?’ Waxelelwa ukuba iNkosi izixabisa zombini ezo zinto, kodwa ukunikela ngexesha lakhe kwiNkosi kwakuza kumzisela iintsikelelo ezingakumbi. UMary Hinds wabona ukuba yicolporteur “njengeyona ndlela yokwenza okona kulungileyo kubantu abaninzi.” Yaye uAlberta Crosby oneentloni wathi: “Ndifunda ukuwuthanda ngakumbi umsebenzi wobu-Colporteur suku ngalunye.”
Namhlanje, inzala eninzi yokwenyama neyokomoya yeecolporteurs ezinenzondelelo isabambelele ngokuqinileyo kwilifa layo lokomoya. Ukuba ayikabikho icolporteur okanye uvulindlela kwintsapho yakho, sebenzela ekubeni wena ube nguye. Nawe uya kufunda ukuwuthanda ngakumbi umsebenzi wokushumayela ixesha elizeleyo suku ngalunye.
[Imibhalo esemazantsi]
a Emva kowe-1931, ibinzana elithi “colporteur” lathatyathelw’ indawo lelithi “uvulindlela.”
b Kwenye yeenkupho ezilandelayo kuza kuthethwa ngeekharavani ngokweenkcukacha.
[Amagama acatshulweyo akwiphepha 32]
Kwakungeyomfuneko ukuba babe “zizifundiswa okanye babe nesiphiwo esithile okanye bathethe iilwimi zeengelosi”
[Umfanekiso okwiphepha 31]
Icolporteur uA. W. Osei eGhana, malunga nowe-1930
[Imifanekiso ekwiphepha 32]
Ngasentla: Iicolporteurs uEdith noGertrude Morris eNgilani, malunga nowe-1918; ngezantsi: uStanley Cossaboom noHenry Nonkes eUnited States, neebhokisi ezingenanto ezazineencwadi abazihambisayo