UYehova Ukuthiyile Okungekho Sikweni

“UMNTU alawule umntu iba kukwenzakala kwakhe.” (INtshumayeli 8:9) Lo mazwi, awabhalwa kwiminyaka engama-3 000 eyadlulayo, alichaza kakuhle ihlabathi esiphila kulo namhlanje. Abantu batyekele ekulisebenziseni kakubi igunya, enoba bangoobani okanye bahlala phi. Amaxesha amaninzi badla ngokuxhaphaza abo bangenakuzinceda nabangathath’ intweni. Uvakalelwa njani uYehova ngokungabikho kokusesikweni okunjalo? Impendulo yalo mbuzo siyifumana kuHezekile 22:6, 7, 31.—yiFunde.

KuMthetho awawunika amaSirayeli, uYehova wenza kwacaca ukuba abo bakwizikhundla eziphezulu babengamele balisebenzise kakubi igunya labo. Uhlanga wayeza kulusikelela kuphela xa iinkokeli zalo zibaphatha ngobubele nolwazelelelo abantu abaphantsi nabahlelelekileyo. (Duteronomi 27:19; 28:15, 45) Noko ke, ngemihla kaHezekile izikhulu zaseYerusalem nakwaYuda zazilisebenzisa kakubi ngendlela egqith’ emgceni igunya lazo. Kwakusenzeka ntoni?

Izikhulu zazisebenzisa ‘iingalo zazo ngenjongo yokuphalaza igazi.’ (Vesi 6) Ibinzana elithi ‘ngeengalo’ lithetha amandla okanye igunya. Kanti yona enye inguqulelo iliguqulela ngokuthi: “Iinkosana zakwaSirayeli . . . ziye zasebenzisa igunya lazo ukuze ziphalaze igazi.” Kunokubakho njani okusesikweni xa iinkokeli ezimele zilondoloze zize zikhuthaze ukuthotyelwa komthetho zilisebenzisa kakubi igunya lazo ukuze zibulale abantu abamsulwa?

Emva kokuthetha la mazwi ngezikhulu zakwaSirayeli, kucacile ukuba uHezekile umangalela abantu abaxelisa ezi nkokeli ngokungathobeli uMthetho kaYehova. UHezekile uthi: “Uyise nonina babaphethe ngendelelo.” (Vesi 7) Ngokungabahloneli abazali, babechitha isiseko sohlanga—intsapho.—Eksodus 20:12.

Abantu abonakeleyo babexhaphaza abantu abahlelelekileyo phakathi kwabo. Sihlandlo ngasinye bengawuthobeli uMthetho babebonisa ukungaluxabisi uthando olwalukuMthetho uThixo awayewunike amaSirayeli. Ngokomzekelo uMthetho kaThixo wawuyalela amaSirayeli ukuba abe novelwano kubantu abangengomaSirayeli ababehlala phakathi kwawo. (Eksodus 22:21; 23:9; Levitikus 19:33, 34) Kodwa abantu ‘baye babaqhatha’ abantu basemzini.—Vesi 7.

Abantu babeyiphatha kakubi “inkwenkwe engenayise nomhlolokazi.” (Vesi 7) UYehova umkhathalele ngokukhethekileyo umntwana oyinkedama okanye umntu obhujelwe liqabane lakhe. UThixo wathi uza kubagweba abo baphatha kakubi umntwana ongenakuzinceda okanye umhlolokazi.—Eksodus 22:22-24.

Ngezi ndlela nangezinye, amaSirayeli omhla kaHezekile ophula uMthetho kaThixo aza alunyhasha uthando olwalukuwo. Wayeza kwenza ntoni uYehova? Wathi: “Ndiya kusiphalaza isiqalekiso sam phezu kwabo.” (Vesi 31) Wanyaniseka kwilizwi lakhe, wavumela amaBhabhiloni ukuba atshabalalise iYerusalem aze athimbe abantu bayo ngowama-607 B.C.E.

Amazwi kaHezekile asifundisa izifundo ezibini ngoYehova nokungekhosikweni: Okokuqala, ukuthiyile: okwesibini, unovelwano ngamaxhoba okungekho sikweni. UThixo akatshintshanga. (Malaki 3:6) Uthembisa ukuba kungekudala uza kuphelisa okungekho sikweni nabo bakubangelayo. (IMizekeliso 2:21, 22) Kutheni ungafundi okungakumbi ngoThixo ‘ongumthandi wokusesikweni’ nendlela onokusondela ngayo kuye?—INdumiso 37:28.

Izibhalo onokuzifunda ngoAgasti:

◼ Hezekile 21–38

[Amagama acatshulweyo akwiphepha 27]

UYehova wenza kwacaca kwabo basemagunyeni ukuba bangaze balisebenzise kakubi igunya