INdibano YeSithili “Yabathunywa Boxolo Lobuthixo” Yowe-1996
1 Ngokuqinisekileyo ucwangciso lwendibano yesithili lwalo nyaka luza kusinceda sihlale sinoxolo lobuthixo, yaye luza kucacisa indima yethu ekuncedeni abanye bafumane uxolo olunjalo. Njengoko kwazisiwe kwiMboniselo kaMeyi 1, 1996, lunomxholo othi “Abathunywa Boxolo Lobuthixo.” Ngaba uwenzile amalungiselelo ukuze ungaphoswa lolu cwangciso?
2 Ucwangciso Lweentsuku Ezintathu: Siyazi ukuba uza kuyinandipha kakuhle indibano yalo nyaka kwaye uza kubuyela ekhaya uhlaziyekile emandleni. (2 Kron. 7:10) Nakulo nyaka siza kuba nocwangciso lweentsuku ezintathu. Ngaba sele uwenzile amalungiselelo okufumana ikhefu emsebenzini ukuze ubekho kulo lonke ucwangciso ngalo lonke elo xesha?
3 Kwesi sihlomelo kudweliswe imihla neendawo eziqinisekisiweyo zeendibano ezingama-45 kule ntsimi yesebe loMzantsi Afrika. Xa kungoku unobhala webandla lenu unixelele ngendibano eniza kuya kuyo. Ukongezelela kwisiNgesi, kuza kuqhutywa iindibano ngesiBhulu, isiKwanyama, isiPedi, isiPhuthukezi, isiSuthu, isiTsonga, isiTswana, isiVenda, isiXhosa nangesiZulu. INtetho Yezandla iza kubakho kwiindawo ezimbini.
4 Kuzo zontathu ezi ntsuku ucwangciso luza kuqala nge-9:30 kusasa luze luqukunjelwe ngeCawa malunga neye-4:00 emva kwemini. Ngaba siza kubonakalisa ububele kubazalwana bethu abakhulileyo nabagulayo ngokubashiyela izihlalo kwiindawo abanokukwazi ukufikelela lula kuzo neziya kubenza bahlale kakuhle? Khumbula ukuba “uthando . . . alufuni ezalo izilangazelelo.”—1 Kor. 13:4, 5; Fil. 2:4.
5 Ngaba Uza Kuloleka? Emva kokucaphula IMizekeliso 27:17, ethi “Isinyithi silola isinyithi,” IMboniselo ka-Agasti 15, 1993, yathi: “Sifana nezixhobo ezifuna ukulolwa ngokuthe rhoqo. Ekubeni ukubonakalisa uthando ngoYehova nokwenza izigqibo ezisekelwe kukholo lwethu kuthetha ukuba ngowahlukileyo ehlabathini, ngokuzingisileyo sifanele sithabathe ikhondo elahlukileyo, ngokungathi kunjalo, kwabaninzi.” Singasisebenzisa njani eso siluleko?
6 Sahlukile ehlabathini yaye sifanele sihlale sinjalo. Ukuze sizondelele imisebenzi emihle simele sihlale sisenza umzamo wokwenjenjalo. (Tito 2:14) Kungenxa yoko inqaku lale Mboniselo elicatshulwe ngasentla lahlabela mgama lisithi: “Xa sikunye nabanye abathanda uYehova, siyalolana—sikhuthazana eluthandweni nasemisebenzini emihle.” Indibano yesithili lelinye lamalungiselelo kaYehova okusinceda sihlale sibukhali ngokomoya. Asimele siphoswe yiyo nayiphi na intetho yocwangciso.
7 Isilumko Siza Kuphulaphula: Ukuphulaphula bubugcisa obumele buhlakulelwe. Kuthiwa nawuphi na umntu ukhumbula nje isiqingatha soko akuvileyo—ingakhathaliseki indlela acinga ukuba uphulaphule ngenyameko ngayo. Ekubeni siphila kumaxesha aneziphazamiso, maxa wambi kusenokuba nzima ukunikela ingqalelo ixesha elide. Ngaba singazama ukuphucula umonde wokuphulaphula, ingakumbi xa sihleli phakathi kwabaphulaphuli abaninzi siphulaphule ubani ethetha? Ukuba ubuya kucelwa ukuba ushwankathele ucwangciso losuku ngalunye wakuba ubuyele ekhaya usuka endibanweni, ngaba ubuya kukwazi ukwenjenjalo? Sinokuyiphucula njani sonke indlela esiphulaphula ngayo nesinikela ingqalelo ngayo kwintetho nganye enikelwa kucwangciso lwendibano?
8 Kufuneka umdla ongazenzisiyo, kuba isipho sikaThixo sokukhumbula asinakusebenza ngaphandle kwawo. Ngokomzekelo, xa umntu enomdla kumbandela othile, kuba lula ukukhumbula iingongoma eziziintloko zentetho okanye zenxalenye yocwangciso. Nakuba kunjalo, okuninzi kuxhomekeke ekunikeleni kwethu ingqalelo engakumbi kuneqhelekileyo kwizinto esinelungelo lokuziphulaphula kwiindibano zesithili. Ukuba nomdla ongazenzisiyo nokunikela kwethu ingqalelo kwintetho nganye yocwangciso lwendibano kuchaphazela ubumoya bethu namathemba ethu ngekamva. Ezindibanweni sifundiswa iindlela zikaYehova yaye sinikwa nemiyalelo yokuphumeza umsebenzi wokusindis’ ubomi. (1 Tim. 4:16) Khawuzithelekelele uyinqanawa kulwandle olubhudlwa ziinkqwithela. Amadinga kaYehova ayiankile eyomeleleyo yethemba. Ukuba umntu akanikeli ngqalelo kucwangciso lwamaKristu aze avumele ingqondo yakhe ibhadule, usenokuphoswa ziingongoma ezibalulekileyo zesiluleko neemfundiso ezisenokumkhusela ekwaphukelweni yinqanawa yokomoya.—Heb. 2:1; 6:19.
9 Kwiindawo ezininzi zehlabathi, abazalwana bethu baxhamleka kakhulu xa besiza kwiintlanganiso. Kuyamangalisa ukubabona benikele ingqalelo epheleleyo ezindibanweni. Ukanti, kwezinye iindawo, abantu abathile baye baphazamisa abanye ngokubhadula kumabala endibano ebudeni bocwangciso. Kanti abanye bafika emva kwexesha. Kwezinye iindibano ezidluleyo, kwakunzima ukuphulaphula kwimizuzu embalwa yokuqala yocwangciso ngenxa yabaninzi ababesihla benyuka phakathi kwezihlalo nangasemva. Aba ayisoloko ingabazalwana ababelwe ukusebenza okanye oomama abanyamekela iintsana zabo. Eyona nto iphazamisayo ngabantu nje abancokolayo. Kulo nyaka iSebe Labalindi liza kunikela ingqalelo engakumbi kule ngxaki, yaye siyathemba ukuba, sonke siza kuhlala phantsi xa usihlalo esicela ukuba senjenjalo. Intsebenziswano yakho kule nkalo iya kuxatyiswa.
10 Ngawaphi amacebiso asebenzisekayo aya kusinceda sinikele ingqalelo engakumbi kucwangciso lwendibano size sivune lukhulu koko kunikelwayo? Oko besikuthetha kwiminyaka edluleyo sisakuphinda: (a) Khumbula isizathu esiyintloko sokuya kwisixeko esinendibano. Asikokuzihlaziya, kodwa kukuphulaphula nokufunda. (Dut. 31:12) Zama ukulala ngokwaneleyo kubusuku ngabunye. Ukuba uza endibanweni udinwe kakhulu, kuya kuba nzima ukunikela ingqalelo. (b) Ziphe ixesha elaneleyo lokumisa inqwelo-mafutha yakho uze uhlale phantsi ngaphambi kokuqalisa kocwangciso. Ukuxhabashela ezihlalweni ngomzuzu wokugqibela kuya kukubangela uphoswe yinxalenye yokuvula. (c) Bhala amanqaku amafutshane ngeengongoma eziziintloko. Ukubhala amanqaku ngokugqithiseleyo kunokukuphazamisa ekuphulaphuleni kakuhle. Xa ubhala, qiniseka ukuba awuphoswa zezinye iingongoma ngenxa yokunikela ingqalelo kumanqaku akho. (d) Xa kuchazwa intetho yendibano, yilindele ngolangazelelo olukhulu. Zibuze, ‘Yintoni endiza kuyifunda kule ntetho eya kwandisa uxabiso nothando lwam ngoYehova? Le nkcazelo iza kundinceda njani ndibonakalise ubuntu obutsha ngokuzele ngakumbi? Oku kuza kundinceda njani ndiphucule kubulungiseleli bam?’
11 Ihambo Ehombisa Ubulungiseleli Bethu: UPawulos wakhuthaza uTito esithi makazibonise ‘engumzekelo wemisebenzi emihle.’ Ngemfundiso yakhe enyanisekileyo, uTito wayeya kubanceda abanye ‘bayihombise imfundiso yoMsindisi wethu, uThixo, ezintweni zonke.’ (Tito 2:7, 10) Nyaka ngamnye, sifumana amazwi obubele asikhumbuza ngesizathu sokuba ibaluleke kangaka ihambo yokuhlonela uThixo xa sisiya naxa sibuya kwindibano, naxa sikwiihotele nakwiivenkile zokudlela nakwindibano ngokwayo. Kunyaka ophelileyo siye saphinda seva amagqabaza amnandi esingathanda ukunichazela wona.
12 Omnye umphathi wehotele wathi: “Kusoloko kumnandi ukunika amaNgqina indawo ngenxa yokuba anomonde, anentsebenziswano, yaye aneliso elibukhali kubantwana bawo.” Omnye umabhalana wehotele wathi kuwenza umsebenzi wakhe “ube lula kakhulu xa amaNgqina engena naxa ehamba, kuba nangona kufuneka elinde emgceni, asoloko enobubele, enomonde, yaye enolwazelelelo.” Elinye ibhinqa lachukumiseka kakhulu yihambo yamaNgqina aselula awayehlala kwakwimotel elalihlala kuyo kangangokuba lacela uncwadi oluxubusha ngentlangano yethu.
13 Kwelinye icala, kukho iinkalo ekusafuneka kuphuculwe kuzo. Singathanda ukunichazela ngamanye amagqabaza aye athunyelwa kuMbutho. Omnye umveleli ohambahambayo wanikela ingxelo yokuba abantwana bamaNgqina kaYehova bafuna ukubekw’ esweni ngakumbi kwiihotele. Abanye baye babonwa bebaleka ezipasejini, besihla benyuka ngezinyusi, befundekela ngasequleni lokuqubha, baze bahlale equleni kude kube semva kwexesha lokuvala, ngaloo ndlela bephazamisa ezinye iindwendwe ezileleyo. Kufuneka sibaqeqeshe abantwana bethu ukuze baqonde ukuba ihambo yamaKristu ayibekelwanga amathub’ athile. Ayipheli nje xa sishiya indawo enendibano. Imele ihlale iiyure ezingama-24 ngemini. Ihambo yethu ehotele, kwiivenkile zokudlela, nasezitratweni ifanele ibekeke kanye njengaxa sihleli nabazalwana bethu ebudeni bocwangciso, sifundiswa nguYehova.—Isa. 54:13; 1 Pet. 2:12.
14 Kwakhona sithanda ukunikhumbuza ngobubele ngokunyengeza nje amaqithi-qithi. Maxa wambi iiweyitala, abasebenzi basehotele, nabanye abakwanemisebenzi enjalo baxhomekeka ekunyengezelweni amaqithi-qithi ukuze baziphilise.—Bona iAwake! kaJuni 22, 1986, iphepha 24-7.
15 Nangona lingasekho ilungiselelo lokutya kwiindibano zethu, zisekho iindleko ezinkulu ezibandakanyekileyo ekuhlawulweni kwendawo leyo, ekulungiselelweni kwendawo yokumisa iinqwelo-mafutha nasekusingatheni eminye imicimbi eyahlukeneyo. Iminikelo yethu yokuzithandela ihlawula ezi ndleko. Omnye udade owayenabantwana abakwishumi elivisayo weza endibanweni enemalana nje encinane. Noko ke, yena nabantwana bakhe banikela uncedo ngomnikelo omncinane. Oko umntu agqibe ukukwenza kule nkalo kungumbandela wobuqu, kodwa siyazi ukuba niyakuxabisa ukukhunjuzwa.—IZe. 20:35; 2 Kor. 9:7.
16 Ukuqondwa Ngendlela Esinxiba Ngayo: Indlela esinxiba ngayo ityhila lukhulu ngathi nendlela esivakalelwa ngayo ngabanye. Inkoliso yabakwishumi elivisayo noninzi lwabakhulileyo lungqongwe ziindlela zokunxiba zokungakhathali esikolweni okanye emsebenzini. Nyaka ngamnye iindlela zokunxiba ziya zithabath’ unyawo ukugabadela, yaye zide zibangel’ iintloni. Ukuba asilumkanga, sinokuphenjelelwa lula ngabahlobo behlabathi ukuba sinxibe njengabo. Ezinye iimpahla azikufanelekelanga ukunxitywa kwiintlanganiso zonqulo. Amagqabaza awafunyanwa kwenye yeendibano zalo nyaka uphelileyo avakalisa uxabiso ngocwangciso kodwa ongezelela athi: “Ndiye ndazibuza isizathu sokuba kubekho amantombazana amaninzi kangaka aselula awayenxibe iilokhwe ezimfutshane, izinto eziveza isifuba, nempahla esikwe kakhulu apha ngaphambili.” Ngokuqinisekileyo sonke sinqwenela ukunxiba ngendlela efanele abalungiseleli abangamaKristu kwindibano naxa sibuthelene emva kocwangciso. Ngamaxesha onke senza kakuhle ukucinga ngesiluleko sompostile uPawulos kumaKristu sokuba azihombise ‘ngesinxibo esilungiswe kakuhle, ngokuthozama nangengqondo ephilileyo.’—1 Tim. 2:9.
17 Ngubani omele agqibe ngoko kusisinxibo esilungiswe ngokuthozama, ‘nesilungiswe kakuhle’? Ukuthozama kuthetha ‘ukungabi ligagu okanye ukuzicingela.’ Kwakhona isichazi-magama sichaza ukuthozama ‘njengokungaceli njezu.’ UMbutho kunye nabadala ababeki mithetho ngesinxibo nokuzilungisa. Naxa kunjalo, ngaba azifanele zicace kumKristu iindlela zokunxiba ezingafanelekanga okanye ezingandilisekanga? (Thelekisa amaFilipi 1:10.) Indlela esizilungisa nesinxiba ngayo ayifanele itsale ingqalelo engafanelekanga. Imbonakalo yethu ifanele ibe ntle, ingabi yeyehlabathi okanye ibe yekhubekisayo. Njengabalungiseleli beendaba ezilungileyo, ukunxiba nokuzilungisa kwethu ngendlela efanelekileyo ngexesha sikwindibano yesithili kuzisa uzuko kuYehova yaye kwenza intlangano ijongwe kakuhle ngabantu. Ngenxa yoko, abazali baya kumisela umzekelo baze baqiniseke ukuba abantwana babo banxiba ngendlela efanelekileyo ukwenzela esi sihlandlo. Abadala kuya kufuneka bamisele umzekelo omhle baze bakulungele ukunikela isiluleko ngobubele xa kuyimfuneko.
18 KwiiHotele: Ngaphambilana siye sacaphula abasebenzi basehotele abathi bachukunyiswa kukuba abazalwana benomonde, benobubele yaye benentsebenziswano. Kufuneka siqhubeke sibonakalisa ezi mpawu zamaKristu xa kufuneka silinde emigceni ukuze sibhalise. Sinombulelo kwiihotele eziye zabambisana kunye neSebe Lamagumbi ekulungiseleleni amagumbi ngexabiso elifikelelekayo. Nangona sisenokuba sidinwe luhambo, sifanele sikhumbule ukubaphatha ngobubele abasebenzi basehotele. Ngokwenjenjalo sinokwenza abathile bayihlolisise nzulu inyaniso. Ukongezelela, akumele kuphekwe kumagumbi asehotele ngaphandle kokuba kukho igumbi lokuphekela.
19 Iikhamera Nezixhobo Zokurekhoda: Kuvumelekile ukusebenzisa iikhamera nezinye izixhobo zokurekhoda, ukuba nje sinolwazelelelo ngabanye abantu abakhoyo. Ukuba siyaphithizela sifota ebudeni bocwangciso, asiyi kuphazamisa abanye abazama ukuphulaphula nje kuphela kodwa nathi siya kuphoswa lucwangciso. Sidla ngokungenelwa ngakumbi kwindibano ngokunikela ingqalelo epheleleyo kwizithethi nangokubhala amanqaku angamaninzanga. Sisenokuba sirekhodela umzalwana okanye udade olele ngendlu; noko ke, xa sizenzela, sisenokufumanisa ukuba xa sibuyele ekhaya emva kokurekhoda iiyure ezininzi zocwangciso, asiyi kuba nalo ixesha lokuhlolisisa oko besikurekhoda. Akukho zixhobo zokurekhoda zimele zixokonyezelwe kumbane okanye kwizandisi-lizwi, yaye ezi zixhobo azifanele zivale indlela okanye zisithe abanye.
20 Izihlalo: Siyaqhubeka siphawula ukuba kuye kwaphuculwa kumbandela wokugcina izihlalo. Kunyaka ophelileyo, inkoliso yenu iyithobele le miyalelo: IZIHLALO ZISENOKUGCINELWA KUPHELA AMALUNGU ENTSAPHO YAKHO NABASENOKUBA BAHAMBA NAWE KWINQWELO-MAFUTHA YAKHO. Mhlawumbi uya kufumanisa ukuba bekungekho ngxaki kangako ngenxa yokuba abaninzi bebethobela le miyalelo icacileyo. Okubaluleke ngakumbi, ukuthobela kwenu bekumkholisa uYehova ‘nekhoboka elithembekileyo,’ elinikela ukudla kokomoya.—Mat. 24:45.
21 Kukho inani elandayo labazalwana bethu abaneentswelo ezikhethekileyo zempilo. Abanye beza endibanweni behamba ngesitulo esinamavili yaye befuna ukunyanyekelwa ngamalungu entsapho. Kanti abanye banyangelwa izifo ezingapheliyo ezinjengesifo sentliziyo. Kuzivuyisa ngokwenene iintliziyo zethu ukubona aba bazalwana noodade abathandekayo endibanweni, bezimisele ukuba bangaphoswa kuko nakuphi na ukudla kokomoya. Phofu ke, maxa wambi, abantu abathile bebenengxaki yokugula ebudeni bendibano, kungekho malungu entsapho okanye ebandla anokunceda. Kwiimeko ezithile iofisi yolawulo yendibano yacelwa ukuba ibize isebe lonyango longxamiseko ukuba lise umzalwana okanye udade esibhedlele. Ngokuyintloko imbopheleleko yokunyamekela umntu onesigulo esingapheliyo ifanele ibe yeyamalungu entsapho okanye izalamane. ISebe Lonyango Lokuqala lendibano alikwazi kunyamekela umntu onesigulo esingapheliyo. Ukuba ilungu lentsapho yakho lifuna unyango olukhethekileyo, nceda uqiniseke ukuba alishiywa lodwa kuba kunokuvela imeko yongxamiseko. Ukongezelela, akuyi kulungiselelwa magumbi asecaleni kwiindibano ukwenzela ukufaka abo bangalungelwa yimeko-bume ethile nto leyo ebenza bangalungi ukuhlala kwiindawo ezihlala uwonke-wonke. Abadala kuya kufuneka babazi nabaphi na ebandleni labo abaneentswelo ezikhethekileyo zempilo baze benze amalungiselelo aqinisekileyo kwangaphambili ukuze banyanyekelwe.
22 Iintswelo Zokudla Endibanweni: Siye safumana amagqabaza amaninzi amahle ngokuphathelele iingenelo zokuziphathela ukudla. Omnye umzalwana wabhala: “Ndiyibona ngokucacileyo ingenelo enkulu yokomoya koku. Ngoku lonke elo xesha namandla linokusetyenziselwa izinto zokomoya. Andikeva magqabaza agxekayo.” Omnye udade wabhala: “Ngomzekelo wenu, nina bazalwana abathandekayo niyasikhuthaza njengamaKristu ngamanye ukuba sizihlolisise size sifune iindlela zokubenza lula ubomi bethu yaye sandise umsebenzi wethu wobuthixo.” Umveleli ohambahambayo wabhala ngelungiselelo lethu lokudla langaphambili: “Ilungiselelo langaphambili lalibangela inani elikhulu labazalwana liphoswe lucwangciso lwendibano lonke.” Ngokuphathelele ukudla okuphathwa ngabazalwana, omnye umdala wabhala: “Baphatha nje oko bakufunayo, yaye akuyomfuneko ukuba bakumele emigceni.” Okokugqibela, omnye udade wabhala wathi: “Emva kocwangciso kwakulawula uxolo nenzolo yaye kwakukho umoya wolonwabo.” Ewe, mntu ngamnye unokuziphathela umphako owaneleyo ukuze azixhase ukwenzela injikalanga yonke. Abaninzi bathi baba nexesha elininzi lokubona abahlobo.
23 Nakulo nyaka alizi kubakho ilungiselelo lokudla. Mhlawumbi unokuzipha nje imizuzu embalwa uhlolisise isihlomelo soBulungiseleli Bethu BoBukumkani bukaOktobha 1995, isiqendu 26, ukuze ufumane amacebiso ngokudla okulula, nokunesondlo okunokuphathwa endibanweni. Xa usiza neemveliso zenyama endibanweni, nceda ukhumbule ukuba ezo zinto ziyathanda ukonakala xa kushushu, ngaphandle kokuba unamacebo athile okuzigcina zibanda. Akumele kuziwe nezinto zegilasi okanye iziselo ezinxilisayo kwindawo enendibano. Ukuba kuza kufuneka uphathe iimantyi ezincinane, zimele zingene phantsi kwesihlalo sakho. Khumbula ukuba unexesha elaneleyo ebudeni besidlo sasemini lokudla nokusela oko uze nako. Njengasebudeni beentlanganiso kwiHolo yethu yoBukumkani, sisoloko sikuphepha ukutya ebudeni bocwangciso lwendibano. Ngaloo ndlela sibonakalisa intlonelo ngelungiselelo lonqulo nangokudla kokomoya esikulungiselelweyo.
24 Kungekudala kuza kuqalisa iNdibano YeSithili yokuqala “Yabathunywa Boxolo Lobuthixo.” Ngaba sele uwagqibile amalungiselelo okuya kuyo, yaye ngaba sele ukulungele ukunandipha iintsuku ezintathu zobudlelane obonwabisayo nezinto ezintle zokomoya? Ngokunyaniseka sithandazela ukuba uYehova ayisikelele imigudu yakho yokuya kwiindibano zehlobo zalo nyaka.
[Box on page 6]
Emasikukhumbule NgeNdibano YeSithili
Ubhaptizo: Abo Baza Kubhaptizwa Bafanele Babe Kwiindawo Zabo Ngaphambi Kokuqalisa Kocwangciso Ngomgqibelo Kusasa. Kuye Kwaphawulwa Ukuba Abanye Banxiba Impahla Engandilisekanga Nengasifanelanga Eso Sihlandlo. Ngamnye Oceba Ukubhaptizwa Ufanele Eze Nempahla Yokuqubha Endilisekileyo Kunye Netawuli. Abadala Bebandla Abahlolisisa Imibuzo Ekwincwadi Ethi Ubulungiseleli Bethu Kunye Nabantu Abaza Kubhaptizwa Kuya Kufuneka Baqiniseke Ukuba Ngamnye Wabo Uyaziqonda Ezi Ngongoma. Emva Kwentetho Yobhaptizo Nomthandazo Wesithethi, Usihlalo Wocwangciso Uya Kunikela Imiyalelo Emifutshane Kwabo Baza Kubhaptizwa Aze Abize Ingoma. Emva Komgca Wokugqibela, Abalindi Baya Kwalathisa Abo Baza Kubhaptizwa Kwindawo Yokuntywiliselwa. Ekubeni Ubhaptizo Olungumfuziselo Wokuzahlulela Komntu Lungumbandela Wobuqu Womntu Lowo NoYehova, Alikho Ilungiselelo Lokubhaptizwa Njengamaqabane Apho Ababhaptizwayo Ababini Okanye Ngaphezulu Begonana Okanye Bebambana Ngezandla Xa Bebhaptizwa.
Amaqweqwe Eebheji: Ncedani nifake iqweqwe lebheji lowe-1996 endibanweni nasendleleni eya nebuya kwindawo enendibano. Oku kudla ngokusenza sikwazi ukunikela ubungqina obuhle ngoxa siseluhambeni. Amaqweqwe eebheji nezingxobo zawo nifanele niwafune ebandleni lenu. Ncedani niwaodole kwangethuba kuba akayi kufumaneka endibanweni. Musani ukulinda kude kube ziintsuku ezimbalwa ngaphambi kwendibano ngaphambi kokuba nicele amakhadi enu neentsapho zenu. Ningalibali ukuphatha iqweqwe iAdvance Medical Directive/Release yakutshanje.
Amagumbi: Sicela intsebenziswano yabo bonke abasebenzisa iSebe Lamagumbi. Oonobhala bamabandla bafanele baqinisekise ukuba iifomu zeZicelo Zamagumbi zithunyelwa ngokukhawuleza kwikhelingi echanileyo yendibano. Ukuba akuzi kuphumelela kwindawo oyilungiselelwe liSebe Lamagumbi, ufanele ngokukhawuleza wazise umninimzi okanye ihotele neSebe Lamagumbi lendibano ukuze elo gumbi linikwe omnye umntu.
Iingoma: Njengoko ukucula kuyinxalenye yonqulo lwethu siyanikhuthaza nonke niqhelisele ezi ngoma zilandelayo eziya kuba yinxalenye yocwangciso: 159, 59, 26, 211, 215, 174, 123, 16, 207, 111, 42, 38, 127, 170, 8, 187, 15, neyama-212. Sincomela ukuba amabandla aqhelisele ubuncinane ingoma enye emva kwentlanganiso nganye.
Iinqwelana Zabantwana: ISebe Lomlilo lincomela ukuba ezi zinto zingangeniswa eholweni okanye zibekwe epasejini okanye phakathi kwezihlalo. Ekubeni izihlwele zabantu zisenokuxinana, ezi nqwelana zabantwana zisenokuba yingozi kungekuphela nje kusana kodwa nakumntu onokukhubeka kuzo. Ngoko ncedani ningazingenisi eholweni. Noko ke, izihlalo zeentsana okanye ezo zilungiselelwe iinqwelo-mafutha zamkelekile, ekubeni zisenokubotshelelwa ezihlalweni ecaleni kwabazali. Intsebenziswano yenu kulo mbandela iya kuxatyiswa.
Inkonzo Yamatsha-ntliziyo: Ekubeni lingasekho isebe lokutya, abaninzi ababefudula besebenza kwelo sebe basenokufumanisa ukuba banokusebenza ngokuzithandela kwenye indawo. Ngaba ungabekela ecaleni ixesha elithile endibanweni ukuze uncedise kwelinye lamasebe? Ukukhonza abazalwana bethu, kwanokuba ziiyure nje ezimbalwa, kunokuba luncedo kakhulu kuze kusenze saneliseke ngokwenene. Ukuba unokunceda, nceda uye kwiSebe Lenkonzo Yamatsha-ntliziyo endibanweni. Abantwana abangaphantsi kweminyaka eli-16 ubudala nabo banokuba negalelo ngokusebenza phantsi kolwalathiso lomzali okanye lomntu onenkathalo.
Izilumkiso: Hlala uziphaphele iingxaki ezisenokuvela ukuze uphephe ubunzima obungeyomfuneko. Amasela nabantu abangaqondakaliyo badla ngokuxhaphaza abantu abasuka kude namakhaya abo. Qiniseka ukuba inqwelo-mafutha yakho itshixiwe ngamaxesha onke, ibe ungaze ushiye nantoni na ibonakala enokutsala umntu aqhekeze. Amasela nabakhuthuzi bathanda iindawo ezinabantu abaninzi. Akuyi kuba bubulumko ukushiya izinto zakho ezixabisekileyo esihlalweni. Akunakuqiniseka ukuba wonke umntu okhoyo ngumKristu. Kutheni ubahenda nje? Siye safumana iingxelo zamalinge abantu bangaphandle okuba abantwana. ABANTWANA BAKHO MABAHLALE BEPHAMBI KWAKHO NGAMAXESHA ONKE.
Oomabonwakude neevidiyo zeehotele ezininzi zidla ngokubonisa imifanekiso eshukumayo engamanyala nengcolileyo. Wulumkele lo mgibe, yaye ungavumeli abantwana bakho babukele umabonwakude kwezi ndawo bebodwa.
Ncedani ningatsaleli umnxeba abaphathi bendawo eza kuba nendibano nifuna inkcazelo ngayo nayiphi na imicimbi yendibano. Ukuba loo nkcazelo ayifumaneki kubadala, ngoko bhalelani iKomiti yeNdibano emva kokuba nifumene ikhelingi yayo kunobhala webandla.