Isingxobo Semibuzo

◼ Yintoni efanele yenziwe xa intlekele eyehlileyo ichaphazela abazalwana bethu?

Xa Intlekele Intlitha Ummandla Okuwo: Musa ukuphakuzela. Hlala uzolile, uze ucinge nje ngoko kuxabiseke kunene—ubomi, kungekhona izinto zakho. Nyamekela iintswelo ezingokwasemzimbeni zentsapho yakho. Wandule ke wazise abadala ngemeko okuyo nangendawo ohlala kuyo ngoku.

Abadala nezicaka zolungiselelo banendima ebalulekileyo ekudluliseleni uncedo. Ukuba kuye kwakhutshwa isilumkiso sentlekele kwangaphambili, njengokuba kunjalo ngeenkqwithela ezinkulu, aba bazalwana bafanele baqiniseke ukuba wonk’ ubani ukwindawo ekhuselekileyo, yaye ukuba ixesha liyavuma, bafanele bafumane baze badlulisele izinto ezisenokufuneka.

Emva koko, abaqhubi bezifundo zencwadi bafanele bafune intsapho nganye baze baqonde impilo-ntle yayo. Umveleli owongamelayo okanye omnye umdala ufanele aziswe ngempilo yentsapho nganye, kwanokuba intle. Ukuba kukho umntu owenzakeleyo, abadala baya kuzama ukufuna unyango. Kwakhona baya kulungiselela zonke izinto ezinjengokudla, impahla, ikhusi, okanye izinto zendlu ezifunekayo. (Yoh. 13:35; Gal. 6:10) Abadala basekuhlaleni baya kunikela inkxaso yokomoya nentuthuzelo ebandleni yaye ngokukhawuleza kangangoko kunokwenzeka baya kulungiselela ukuba kuqaliswe ukuqhutywa kweentlanganiso zebandla. Emva kokuba enze uhlolisiso ngokucokisekileyo, umdala othile ufanele aqhagamshelane nomveleli wesiphaluka egameni lequmrhu labadala ukuze amazise ngabo bonke abantu abenzakeleyo, umonakalo owenzeke kwiHolo yoBukumkani, okanye umonakalo owenzeke kwizindlu zabazalwana, nangazo zonke izinto ezifuneka ngamandla. Umveleli wesiphaluka uya kutsalel’ umnxeba kwiofisi yesebe eyazisa ngale meko. Ukuba akukho ndlela eninokuqhagamshelana ngayo nomveleli wesiphaluka, ninokuqhagamshelana neofisi yesebe ngokuthe ngqo. Iofisi yesebe yona iya kulungiselela uncedo oluthe kratya olufunekayo.

Ukuba Intlekele Intlitha Enye Indawo: Khumbula abazalwana noodade xa uthandaza. (2 Kor. 1:8-11) Ukuba unqwenela ukunikela ngemali, usenokuyithumela kuMbutho, apho kukho ingxowa-mali yoncedo ebekelwe le njongo. Ikhelingi yile: Watch Tower, Private Bag X2067, Krugersdorp, 1740. (IZe. 2:44, 45; 1 Kor. 16:1-3; 2 Kor. 9:5-7; bona IMboniselo kaDisemba 1, 1985, iphepha 20-2.) Musa ukuthumela impahla kummandla wentlekele ngaphandle kokuba ucelwe ngokuthe ngqo ngabazalwana abajongene noku. Oku kuya kuqinisekisa ukuba umsebenzi wokunikela uncedo nokwabiwa kwezinto wenziwa ngocwangco. (1 Kor. 14:40) Nceda ungatsalel’ umnxeba kuMbutho ngokungeyomfuneko, ekubeni oku kunokuvalela iminxeba elindelweyo evela kummandla wentlekele.

Emva kokuba wenze uhlolisiso olufanelekileyo, uMbutho uya kugqiba enoba kufanele kuyilwe ikomiti yokunikela uncedo kusini na. Abazalwana abajongene noku baya kwaziswa. Sonke sifanele sisebenzisane nabadala abakhokelayo ukuze kuhlangatyezwane neemfuno ezingxamisekileyo zabo bonke abazalwana ngokufanelekileyo.—Bona incwadi ethi AmaNgqina KaYehova—Abavakalisi BoBukumkani BukaThixo, iphepha 310-15.