Hayi Indlela Ekukuhle Ngayo Ukusoloko Ukho!
1 Uninzi lwabazalwana bethu abathandekayo belungavunyelwa ukuba luhlanganisane esidlangalaleni kangangamashumi eminyaka eMpuma Yurophu. Khawuthelekelele uvuyo ababa nalo xa bavunyelwa bahlanganisane kwakhona ngemizimb’ engenaxhala!
2 Ethetha ngotyelelo lwakhe kwelinye laloo mabandla, omnye umveleli wesiphaluka wabhala: “Ngengokuhlwa yangoLwesibini, kanye xa ndithi ndiqalisa utyelelo lwam, konakala isixhobo sokufudumeza. Ngaphandle, amaqondo obushushu ayebetha kufutshane neqondo lokukhenkcisa, ibe ngaphakathi, yayilelama-40 ngokukaFahrenheit [elesi-5 ngokukaCelsius]. Abazalwana babambethe ootshotsh’ ufe, izikhafu, iiglavu, bethwele izankwane yaye befake amaquza. Akukho namnye owayekwazi ukuhambisana nesithethi xa sityhila iBhayibhile, kuba wawungenakuze ukwazi ukutyhila amaphepha. Ekubeni ndandimi eqongeni ndinxibe isuti yam, ndagodola ndoma, ibe rhoqo ndithetha, kwakuphokoka umphunga emlonyeni wam. Kodwa into eyandichukumisayo kukuba andizange ndive namnye okhalazayo. Bonke abazalwana bachaza indlela ekwakumnandi nekwakukuhle ngayo ukubakho!” Abo bazalwana abazange bayicinge kwaukuyicinga into yokuphoswa yiloo ntlanganiso!
3 Ngaba Nathi Sivakalelwa Ngolo Hlobo? Ngaba siyalixabisa ithuba lokuhlanganisana ngokukhululekileyo kwiintlanganiso zethu zeeveki ngeeveki? Okanye siye singazixabisi iintlanganiso xa iimeko zisivumela? Kusenokungabi lula ukuya rhoqo ezintlanganisweni, ibe maxa wambi sisenokuba nesizathu esibambekayo sokungabikho. Noko ke, masingaze silibale ukuba phakathi kwethu kukho abo bathi nangona baluphele, benempilo enkenenkene, beneziphene, bexakeke yimisebenzi yaye benezinye iimbopheleleko ezinkulu, bakubone ukubaluleka kokuya ezintlanganisweni baze basoloko bekho. Enjani ukuba mihle imizekelo yokuxeliswa!—Thelekisa uLuka 2:37.
4 Masikwenze umkhwa wethu ukuxhasa unqulo lokwenyaniso ngokuya kuzo zonke iintlanganiso zethu zamaKristu, ukususela kwisifundo sencwadi seqela esincinane ukuya kwindibano enkulu. Kutheni sifanele sikugqale njengento ebalulekileyo ukubakho kwezi ntlanganiso? Kungenxa yokuba kungumyalelo kaThixo ukuba sihlanganisane ndawonye. Kodwa zikho nezinye izizathu ezibalulekileyo. Sonke siyafuna ukungenelwa kwimfundo engokobuthixo nakuncedo lomoya oyingcwele, zinto ezo ezifumaneka kwiintlanganiso. (Mat. 18:20) Siyakheka ngenxa yokukhuthazana xa sidlelana nabazalwana bethu.—Heb. 10:24, 25.
5 Kumbono wokwenziwa kumila kumbi, uPetros wathi, “Myaleli, kuhle ngathi ukuba sibe lapha.” (Luka 9:33) Nathi sifanele sivakalelwe ngaloo ndlela ngazo zonke iintlanganiso zethu zamaKristu. Ngokwenene, hayi indlela ekukuhle ngayo ukusoloko ukho!