Banokubona Ukuba Sahlukile
1 Kunyaka ophelileyo, bangaphezu kwama-300 000 abantu abatsha abaye basithelela ngokuthi babhaptizwe. Yintoni ebonwe ngaba bantu kumaNgqina kaYehova ebenze bafuna ukuba yinxalenye yentlangano kaThixo? Kutheni sahlukile kwezinye iinkonzo? Nazi impendulo ezicacileyo:
—Sibambelela eBhayibhileni kungekhona kwiimbono zobuqu: Sinqula uYehova uThixo “ngomoya nenyaniso,” kanye njengokuba uYesu Kristu wathi makwenziwe. Oku kuye kwathetha ukugatya ubuxoki bonqulo nokusebenzisa iLizwi likaThixo elibhaliweyo.—Yoh. 4:23, 24; 2 Tim. 3:15-17.
—Siya ebantwini kunokuba silinde bona beze kuthi: Samkele uthumo lukaKristu lokushumayela nokufundisa, yaye silinganisa umzekelo wakhe wokukhangela abantliziyo zinyanisekileyo. Sibakhangela ezindlwini zabo, ezitratweni, okanye naphi na apho banokufumaneka khona.—Mat. 9:35; 10:11; 28:19, 20; IZe. 10:42.
—Sifundisa wonke umntu imfundo yeBhayibhile ngaphandle kwemali: Sichitha ubuncwane bethu namandla ethu ngesisa, sichitha ngaphezu kwewaka lesigidi zeeyure nyaka ngamnye kwinkonzo kaThixo. Singakhethi buso, sifundisisa iBhayibhile nazo zonke iintlobo zabantu.—Mat. 10:8; IZe. 10:34, 35; ISityhi. 22:17.
—Siqeqeshwe ngokusemagqabini ukuze sincede abantu ngokomoya: Ngofundisiso lobuqu lweBhayibhile nemfundiso elungiselelwe kwiintlanganiso zebandla, ezindibanweni ezincinane, nasezindibanweni ezinkulu, sifumana imfundo yobuthixo, ngaphandle kwemali esenza sikwazi ukukhanyisela abanye ngokomoya.—Isa. 54:13; 2 Tim. 2:15; 1 Pet. 3:15.
—Siyithabatha nzulu inyaniso, siyisebenzisa kubomi bethu bemihla ngemihla: Ngenxa yothando lwethu ngoThixo, senza iinguqulelo, sivisisanisa ubomi bethu nokuthanda kwakhe. Ubuntu bethu obutsha obufana nobukaKristu butsalela abanye enyanisweni.—Kol. 3:9, 10; Yak. 1:22, 25; 1 Yoh. 5:3.
—Sizabalazela ukusebenza nokuhlala ngoxolo nabanye: Ukuhlakulela iimpawu zobuthixo kuyasinceda ukuze silinde izenzo nentetho yethu. ‘Sifuna uxolo size silusukele’ nabantu bonke.—1 Pet. 3:10, 11; Efe. 4:1-3.
2 Umzekelo wamaKristu wokuphila obonwa ngabantu kwintlangano kaYehova ubashukumisela ukuba bamkele inyaniso. Ngamana umzekelo wethu unganomphumo ofanayo kwabo basaziyo nabasakhele umkhanya.