Ukukhunjulwa Kokufa KukaKristu Ehlabathini Lonke
1 UYehova usivave ngezipho ezininzi. Xa kudityaniswa ukulunga nobubele bakhe obungasifanelanga ezo zinto zichazwa ‘njengesipho sakhe sesisa esingachazekiyo.’ Ewe, ‘ububele obungasifanelanga bukaThixo’ buyamangalisa kangangokuba bugqwesa ubuchule bethu bokubuchaza.—2 Kor. 9:14, 15.
2 Isipho Sakhe Esibalaseleyo: UYesu Kristu, njengeNtlawulelo yoluntu, sesona sipho sibalaseleyo kuzo zonke. Ekubonakaliseni uthando lwakhe olubalaseleyo ngehlabathi loluntu, uYehova wanikela ngoNyana wakhe amthandayo nekuphela kwamzeleyo. (Yoh. 3:16) Intsikelelo enjalo ukungasifaneli evela kuThixo ifanele ikhunjulwe ehlabathini lonke. Nini yaye njani? Ngorhatya lwangoLwesine ngoAprili 1, 1999, amaKristu ehlabathini jikelele aya kukhumbula iSidlo SeNkosi Sangokuhlwa, esenza iSikhumbuzo seli dini likhulu ngaphezu kwawo onke amadini.—1 Kor. 11:20, 23-26.
3 UKristu wasifela “ngoxa sasisengaboni,” kwaye singawubonakalisa umbulelo wobuqu ngokwenza iSikhumbuzo sokufa kwakhe nangokumema abanye ukuba babe kunye nathi kweso siganeko sibaluleke kunene.—Roma 5:8.
4 Esona Siganeko Sibalulekileyo: Ukukhunjulwa kokufa kukaKristu ngokusisiseko kubalaselisa isibakala sokuba ulongamo lukaThixo waluphakamisa ngokungenabala. Sikwasikhumbuza ukuba singanandipha ukuma okucocekileyo phambi koYehova ngokuqhelisela ukholo kwidini likaYesu, ngaloo ndlela siqinisekiswa ngosindiso. (IZe. 4:12) Eneneni, esi sesona siganeko sibalulekileyo sonyaka!
5 Uthando ngabamelwane bethu lubonakaliswa ngokubamema ukuba beze kunye nathi kwisikhumbuzo seSidlo SeNkosi Sangokuhlwa. Iingenelo zedini lentlawulelo zisafumaneka kwizigidi ezifunda ngokubaluleka kwalo okugqwesileyo. (Fil. 3:8) Abo baqhelisela ukholo kwidini likaKristu banokuba nethemba elomeleleyo lobomi obungunaphakade.—Yoh. 17:3.
6 Ixesha leSikhumbuzo livelisa amathuba akhethekileyo okubonisa uxabiso ngobubele obugqwesileyo obungasifanelanga bukaThixo. Eli lixesha elifanelekileyo lokuba nenxaxheba ngenzondelelo ekushumayeleni iindaba ezilungileyo zoBukumkani bukaThixo. Bonke abo basicingisisa ngomthandazo isipho sikaYehova sesisa baze balungiselele ukuba babekho kwisikhumbuzo seSidlo SeNkosi Sangokuhlwa salo nyaka baya kuzuza iingenelo ezinkulu!