Iintlanganiso Zokunceda Abantu Abaselula
1 Enye intombazana ekwishumi elivisayo yathi: “Maxa wambi ndiye ndicinge ukuba abantu abaselula banelona xesha linzima ebomini. Siphila phakathi kwabantu abahenyuzayo, abasebenzisa iziyobisi nabaselayo.” Ngaba leyo yindlela ovakalelwa ngayo? Ukuba kunjalo, ucinga ukuba yintoni eya kukunceda ulwe le mpembelelo imbi? Kufuneka ube nokholo olomeleleyo ngokulunga kweendlela zikaYehova, kuba ngaphandle koko “akunakwenzeka ukumkholisa kakuhle.” (Heb. 11:6) Ukuya kwiintlanganiso zebandla kuya kukunceda womeleze iinkolelo zakho zobuKristu nozimiselo lwakho lokuphepha ububi.
2 Kuninzi Onokukuzuza Kwiintlanganiso: Yintoni eyenza ukuba ukutya isidlo esinencasa nabahlobo abasenyongweni kunandipheke? Asikokutya okunencasa nokuba nabantu obathandayo kwimeko-bume ekhululekileyo? Ngokufanayo, iintlanganiso zethu zinikela uyolo olufanayo, kodwa ngengqiqo yokomoya.
3 Izinto ezixutyushwa kwiintlanganiso ziyakha, zisusela kwizinto ezixubusha ngeengxaki zobomi bemihla ngemihla ukusa kwizifundo ezichulumancisayo zeziprofeto zeBhayibhile. Kudluliselwa imfundiso esebenzisekayo ekufundisa eyona ndlela isemagqabini yokuphila nokuhlangabezana nocelomngeni ojamelana nalo. Abahlobo abafumaneka kwezi ntlanganiso ngabona balungileyo naphi na, kwaye imeko-bume yokomoya iyayolisa kwaye ikhuselekile. (INdu. 133:1) Akumangalisi ke ngoko ukuba omnye oselula abe wathi: “Ndiya esikolweni imini yonke, siyandikruqula. Kodwa iintlanganiso zinjengamarhiwu aluhlaza entlango, apho ndiyahlaziyeka ukuze ndilungele usuku olulandelayo esikolweni.” Omnye oselula wathi: “Ndifumanise ukuba ukunxulumana ngokusondeleyo nabanye abamthandayo uYehova kundincedile ukuba ndihlale ndisondelelene naye.”
4 Ngokubhalisa kwiSikolo Sobulungiseleli Sobuthixo, ufunda ukuqokelela inkcazelo yeBhayibhile, uze uyakhe ibe yintetho, uze uyinikele ngokungathi uyancokola kubaphulaphuli kwiHolo yoBukumkani. Khawuthelekelele iingenelo zokuqeqeshelwa ukufundisa ngobuchule iinyaniso ezisindisa ubomi eziseLizwini likaThixo! Yiyiphi enye indawo apho umntu oselula anokulufumana khona uqeqesho olubaluleke ngolo hlobo?
5 Indlela Yokungenelwa Ngakumbi Kwiintlanganiso: Ukuze ungenelwe ngakumbi kwiintlanganiso, kubandakanyeke ezi zinto zintathu zibalulekileyo. Ukulungiselela, ukuba nenxhaxheba nokuqhelisela oko ukufundayo.
6 Zilungiselele: Bekela bucala ixesha elithile rhoqo ukuze ulungiselele iintlanganiso. Musa ukuvumela umsebenzi wesikolo, umsebenzi wesingxungxo okanye ukuzihlaziya ukuba kukuphulukanise nexesha olifunayo lokuhlolisisa kwangaphambili umbandela oza kuxutyushwa kwintlanganiso nganye. Kuhle ukuba nomzila omhle wokwenza izinto. Okokuqala nokona kubalulekileyo ufanele uhambisane nocwangciso lweSikolo Sobulungiseleli Sobuthixo lokufundwa kweBhayibhile lweeveki ngeeveki. Kufuna imizuzu embalwa suku ngalunye ukufunda nokucamngca ngezahluko ezabelweyo. Bekela bucala ixesha lokulungiselela iSifundo Sencwadi Sebandla neSifundo seMboniselo. Ubuncinane abanye oku bakwenza usuku okanye ezimbini ngaphambi kwezo ntlanganiso. Kangangoko kunokwenzeka, yenza okufanayo kwiinxalenye ezicwangciselwe iNtlanganiso Yenkonzo veki nganye.
7 Yiba Nenxaxheba Kuzo: IBhayibhile ithi xa wayeneminyaka eli-12 ubudala, uYesu wafunyanwa etempileni, ephulaphule, ebuza imibuzo kwaye enikela iimpendulo. (Luka 2:46, 47) Ngamanye amazwi, wayebandakanyeke ngokupheleleyo. Uya kungenelwa ngakumbi kwiintlanganiso ukuba wenza umgudu wokuba nenxaxheba kuzo.—IMize. 15:23.
8 Kufuneka unikele ingqalelo ngokupheleleyo koko kufundiswa kwiintlanganiso. Maxa wambi ukuphulaphula intetho kunzima kunokuyinikela. Ngoba? Ingqondo yakho isenokubhadula ngoxa ethetha omnye umntu. Unokukulwa njani oku? Ngokubhala amanqaku. Bhala phantsi amanqaku abalulekileyo ofuna ukubhekisela kuwo kamva. Ukubhala amanqaku kuya kukunceda unikele ingqalelo kucwangciso. Kwakhona, khangela izibhalo, uze ulandele njengokuba zifundwa sisithethi.
9 Ukongezelela, yiba nosukelo lokuba nesabelo kwingxubusho nganye yemibuzo neempendulo kwiintlanganiso. Uya kungenelwa ngakumbi ukuba uyakucingisisa oko ufuna ukukuthetha. IMizekeliso 15:28 ithi: “Intliziyo yelungisa iyayicamngca impendulo.”
10 Qhelisela Oko Ukufundayo: Inyathelo lokugqibela kukuqinisekisa ukuba oko ukufundayo ‘kuyasebenza kuwe.’ (1 Tes. 2:13) Njengokuba usebenzisa iingongoma ezintle ozifunde kwintlanganiso nganye, uya kusondela kuYehova uThixo. Uya kuba ngumntu wokwenene kuwe, kwaye uya kuba novuyo nolwaneliseko olungakumbi njengokuba ‘uhamba enyanisweni,’ uyenza eyakho.—3 Yoh 4.
11 Bazalwana noodade abaselula, njengokuba nizilungiselela rhoqo iintlanganiso, nisiba nenxaxheba kuzo, nize nikuqhelisele oko nikufundileyo, niya kuzinandipha ngokupheleleyo iintlanganiso. Kwangaxeshanye, niya kufumana zonke iingenelo eninokuzifumana kuzo. Ukholo lwenu luya komelezwa, njengokuba isisigqibo senu ukuhlala ninyanisekile kuYihlo wasezulwini, uYehova.—INdu. 145:18.