“Ilizwi LikaThixo . . . Linamandla”
1 Umpostile uPawulos wabhala wathi, “Ilizwi likaThixo liphilile, linamandla.” (Heb. 4:12) Wayethetha ukuthini ngoko? Ilizwi likaThixo, okanye isigidimi esifumaneka eBhayibhileni sinokuba nempembelelo enamandla ebantwini. Ubulumko obuseBhayibhileni bunamandla okuguqula ubomi bomntu bube bhetele. Intuthuzelo nethemba elinikelayo zitsalela abantu kuMniki-Bomi, uYehova uThixo. Isigidimi sayo sinokushukumisela abantliziyo zinyanisekileyo ukuba bahambe emendweni okhokelela kubomi obungunaphakade. Noko ke, ukuze siyibone le miphumo, simele siyisebenzise iBhayibhile xa sinikela ubungqina kwabanye.
2 Funda ISibhalo Nanini Na Kuvela Ithuba: Kubonakala ngathi abavakalisi abaninzi abafane bayisebenzise iBhayibhile xa beshumayela kwindlu ngendlu. Ngaba kunjalo nangawe? Ekubeni uninzi lwabantu lubonakala lungenalo ithuba lokuncokola, mhlawumbi uye weyela kumkhwa wokuhambisa uncwadi kuphela okanye owokusishwankathela ngomlomo isibhalo. Sikhuthaza bonke abavakalisi ukuba ubuncinane bazame ukufunda nokuba sisibhalo esinye eBhayibhileni xa beshumayela iindaba ezilungileyo, ngaloo ndlela benza loo mntu abone ukuba isigidimi sethu enyanisweni siphuma kwiLizwi likaThixo.
3 Nangona iliqaqobana labantu eliyifundayo iBhayibhile, isahlonelwa ngokubanzi. Kwanabantu abaxakekileyo badla ngokusiphulaphula isigidimi esifundwa ngokusuka eLizwini likaThixo umzuzu omnye okanye emibini. Xa kufundwa isibhalo esifanelekileyo ngehlombe size sicaciswe nje ngamazwi amafutshane, amandla elizwi likaYehova anokuba nomphumo omhle kumphulaphuli. Kodwa ungayinxibelelanisa njani intshayelelo yakho nendinyana yeBhayibhile ofuna ukuyifunda?
4 Khawuzame Oku Kumsebenzi Wamaphephancwadi: Umveleli ohambahambayo uzisebenzisa kakuhle iZibhalo xa ekumsebenzi wamaphephancwadi. Ufaka iBhayibhile encinane epokothweni yakhe. Emva kokuwatshayelela amaphephancwadi aze ngokufutshane alathe kwinqaku elithile, engaphozisanga maseko uvula iBhayibhile aze afunde indinyana ehambisana nelo nqaku. Oku kunokwenziwa ngokubuza oku, “Ucinga ntoni ngesi sithembiso sikhuthazayo?” uze uqhubeke ufunda isibhalo osikhethileyo.
5 Kwenze usukelo lwakho ukufunda isibhalo esinye okanye ezibini eBhayibhileni kuye nabani na ophulaphulayo. Amandla ayo anokuvula indlela yokuba abantu abangakumbi batsaleleke kuThixo.—Yoh. 6:44.