Ukumanyana Ngovuyo NoYehova NoNyana Wakhe
Esona Siganeko Sibalulekileyo Enyakeni Siza Kubakho NgoMatshi 28
1 Ngokubakho kwiSidlo Senkosi Sangokuhlwa emva kokutshona kwelanga ngoMatshi 28, 2002, sibonisa ukuba siyakuvuyela ukumanyana noYehova uThixo kunye noYesu Kristu. Ngesi sihlandlo sikhethekileyo, amalungu entsalela yamaKristu athanjisiweyo aza kube ‘esabelana’ ngendlela ekhethekileyo nezinye iindlalifa zoBukumkani, noBawo, kunye noNyana. (1 Yohane 1:3; Efese 1:11, 12) Izigidi ‘zezinye izimvu’ ziza kube zicinga ngelungelo lazo elikhethekileyo lokumanyana noYehova noNyana wakhe, ukucinga ntonye nabo ekuphumezeni umsebenzi kaThixo!—Yohane 10:16.
2 Ukusebenzisana Kulwalamano Olusondeleyo: UYehova noYesu bebesoloko bemanyene ngovuyo. Bebenolwalamano olusondeleyo kangangezigidi zeminyaka ngaphambi kokuba kudalwe umntu. (Mika 5:2) Ngaloo ndlela ulwalamano olunzulu lomsa luye lwakhula phakathi kwabo. Ekubeni ebubulumko bumntwisiwe, ngaphambi kokuba abe ngumntu, lo Nyana olizibulo wathi: “[UYehova] wayendithanda ngokukhethekileyo imihla ngemihla, ndichulumanca phambi kwakhe amaxesha onke.” (IMize. 8:30) Ukuchitha iminyaka eliqela unxulumene ngokusondeleyo noMthombo wothando kwaba nempembelelo enkulu kuNyana kaThixo!—1 Yoh. 4:8.
3 Ecinga ngesibakala sokuba uluntu lwalufuna ukukhululwa, uYehova wakhetha okuphela koNyana amzeleyo, owayebathanda kakhulu abantu, ukuba abe lidini lentlawulelo, elikuphela kwethemba esinalo. (IMize. 8:31) Kanye njengokuba uYehova noNyana wakhe bemanyene ekuphumezeni injongo enye, nathi sizigcina simanyene nabo kunye nabanye kumaqhina othando anamandla, sisenza ukuthanda kukaThixo ngovuyo.
4 Ukubonakalisa Uxabiso Lwethu Olusuka Entliziyweni: Ngokubakho eSikhumbuzweni nangokuphulaphula ngenyameko nangentlonelo, sinokubonisa uxabiso lwethu lokwenene ngothando lukaYehova nangedini asenzele lona ngoNyana wakhe. Uya kubalasela kuthi umzekelo wothando kaYesu, ukuthembeka kwakhe de aye kufa aze asilungiselele intlawulelo, nokulawula kwakhe njengoKumkani woBukumkani bukaThixo obumiselweyo, kuquka neentsikelelo eziya kuziswa buBukumkani kuluntu. Kwakhona siya kukhunjuzwa ngemfuneko yokubonakalisa ukholo lwethu ngokuqhubekayo, sizingisa ekusebenzeni ngokuvisisana nokuthanda kukaYehova ‘njengabasebenzi abangamadlelane kuyo inyaniso.’—3 Yoh. 8; Yak. 2:17.
5 Ukunceda Abanye Babelane Nathi: Iqumrhu labadala lifanele lenze umgudu okhethekileyo ukuze likhuthaze onke amaNgqina apholileyo akwintsimi yebandla ukuba abekho kwiSikhumbuzo sokufa kukaKristu. (Mat. 18:12, 13) Yenzani uludwe lwabo bamele batyelelwe ukuze kungashiyelelwa mntu kwaye bonke nibameme ngokwenu.
6 Ngaba bakho abanye obaziyo abanokuza eSikhumbuzweni? Yiba ngowokuqala ukwenza umzamo wokwakha uxabiso lwabo ngesi sihlandlo. Bameme ngothando, uze ubenze bazive bamkelekile. Masenze konke okusemandleni ukuze simeme zonke izifundo zethu zeBhayibhile kunye nabanye abantu abanomdla kuquka izihlobo nezalamane ukuze zize kwesi siganeko sibaluleke kakhulu. Iingenelo zentlawulelo zisafumaneka kubo bonke abafunda ‘ixabiso eligqwesileyo lolwazi olungoKristu Yesu.’ (Fil. 3:8) Abo banokholo kwidini likaKristu banokuba nethemba eliqinisekileyo lobomi obungunaphakade.—Yoh. 3:16.
7 Ungaze uwujongele phantsi umphumo onokubangelwa siSikhumbuzo kubantu abanyanisekileyo. Kwiminyaka emibini edluleyo kwisiqithi sasePapua New Guinea, abantu abanomdla abali-11 bahamba ngephenyane kangangeeyure ezili-17 betyhubela ulwandle olulwayo ukuze babekho. Kwakutheni? Bathi: “Besifuna ukubhiyozela iSikhumbuzo sikaKristu nabanye abanquli bakaYehova; ngoko olu hambo belufanelekile.” Khawucinge ngenzondelelo yaba bantu banomdla kunye noxabiso ababenalo ngokumanyana ngovuyo noYehova, noNyana wakhe, kunye nobuzalwana bamaKristu!
8 Cela ukubaqhubela isifundo seBhayibhile bonke abanomdla. Bakhuthaze ukuba beze rhoqo kwiintlanganiso zebandla kwaye babelane nabanye ngeenyaniso abazifundileyo. Bancede ‘bahambe ekukhanyeni’ kwaye ‘baqhelisele inyaniso’ ngokusebenzisa imigaqo yeBhayibhile ebomini babo. (1 Yoh. 1:6, 7) Bancede bahlakulele ulwalamano olusondeleyo noYehova kwaye baqhubeke bekhulisa uxabiso lwabo ngelungelo lokumanyana ekwenzeni ukuthanda kwakhe.
9 Hayi indlela elimangalisa ngayo ilungelo lokumanyana ngovuyo ‘moyeni mnye, sizama kunye ngamphefumlo mnye ngenxa yokholo kwiindaba ezilungileyo’! (Fil. 1:27, 28) Masikhangele phambili ekubeni kunye kubudlelane bethu obumnandi kwiSikhumbuzo sikaMatshi 28, sisoloko simbulela uYehova noNyana wakhe!—Luka 22:19.