Masigcine Iindawo Zethu Zokunqulela Zikwimeko Entle
1. Yiyiphi injongo efezwa yiHolo yoBukumkani?
1 Ehlabathini kukho amabandla amaNgqina kaYehova angama-94 000. Uninzi lwala mabandla luhlanganisana ukuze lufundisise iBhayibhile luze lunandiphe unxulumano lwamaKristu kwiHolo yoBukumkani, esisazulu sasekuhlaleni sonqulo olunyulu. Noko ke, amanye asahlanganisana kwizakhiwo ezirentwayo njengezikolo, nakwizakhiwo zexeshana.
2. Kutheni kubalulekile nje ukugcina iHolo yoBukumkani icocekile yaye ibukeka?
2 Ucwangciso Lokucoca Oluthe Rhoqo: Umsebenzi wokugcina iHolo yoBukumkani ikwimeko entle ubalulekile kunqulo lwethu olungcwele. Incwadi ethi Ubulungiseleli Bethu, kwiphepha 61-2, ithi: “Abazalwana bamele bakugqale kulilungelo kungekhona nje ukuxhasa iHolo yoBukumkani ngokwemali kodwa kwanangokunikela iinkonzo zabo ekuyigcineni icocekile, ibukeka yaye bazifakele kakuhle izinto ezaphukileyo. Kokubini ngaphakathi nangaphandle, iHolo yoBukumkani ifanele iyimele ngokufanelekileyo intlangano kaYehova.” Ekubeni iHolo yoBukumkani isetyenziswa izihlandlo eziliqela veki nganye, kufuneka icocwe ize ilungiswe rhoqo. Idla ngokuba ngamatsha-ntliziyo ebandla (okanye amabandla) asebenzisa loo Holo yoBukumkani anyamekela ezo zinto. Njengoko kwakunjalo ngamaxesha okubhalwa kweBhayibhile, namhlanje abakhonzi bakaYehova bafanele bakukhuthalele “ukulungisa nokuhlaziya” indawo esinqulela kuyo.—2 Kron. 34:10.
3. Kuhlengahlengiswa njani ukucocwa kweHolo yoBukumkani, yaye ngoobani abanokuba nesabelo kweli lungelo?
3 Kufanele kuxhonywe ucwangciso lokucoca iHolo yoBukumkani veki nganye kwibhodi yezaziso. Onke amaqela ezifundo zencwadi afanele atshintshisane ngokucoca iholo veki nganye, ajonge uludwe lwezinto ezifanele zenziwe. Bonke abanako bafanele babe nesabelo kweli lungelo libakho veki nganye lokugcina iHolo yoBukumkani icocekile yaye ibukeka. Bephantsi kweliso labazali, nabantwana banokuqukwa, ngaloo ndlela befundiswa ukuba balixabise eli lungelo. Ngokukodwa xa emaninzi amabandla asebenzisa iHolo yoBukumkani enye, kubalulekile ukuba kubekho intsebenziswano ukuze le nkalo ibalulekileyo yonqulo lwethu ingenziwa yimbinana nje yabantu. Oku kusebenza nakumabandla asebenzisa izakhiwo ezirentwayo okanye izakhiwo zexeshana.
4. Yintoni efanele yenziwe ukuze ibandla lazi oko kumele kwenziwe xa kucocwa iHolo yoBukumkani?
4 Ukuba kunokwenzeka, uludwe lwezinto ezimele zenziwe lunokuxhonywa kwindawo ekugcinwa kuyo izinto zokucoca. Olu ludwe lufanele luchaze imisebenzi emele yenziwe veki nganye, kuquka ukucoca ikhaphethi, ukucoca iifestile, ukususa uthuli kwikhawuntari, ukuchitha imigqomo yenkunkuma, ukukorobha phantsi nokucoca izipili. Eminye imisebenzi kusenokungabi yomfuneko ukuyenza rhoqo, njengokupolisha nayiphi na ifanitshala ekhoyo nokucoca izitulo, iikhethini nezibane. Yonke imichiza yokucoca ifanele ibekwe kude nabantwana kwaye ifanele ibhalwe ngendlela ecacileyo. Kufanele kuchazwe ngokufutshane indlela umchiza ngamnye ofanele usetyenziswe ngayo.
5. Kubaluleke kangakanani ukukhuseleka, yaye ziziphi izinto ezifanele zihlolwe emva kwexesha elithile? (Bona ibhokisi ekwiphepha 4.)
5 Kubaluleke gqitha ukuba kubekho ukhuseleko kwiHolo yoBukumkani. (Dut. 22:8) Ngenxa yoko, ibhokisi ekwiphepha 4 idwelisa izinto, kwiimeko ezithile, ezimele zihlolwe emva kwexesha elithile ukuze kuthintelwe iingozi.
6. Ulungelelaniswa njani umsebenzi wokulungisa iHolo yoBukumkani?
6 Ukulungisa IHolo YoBukumkani: Iqumrhu labadala linembopheleleko yokwalathisa umsebenzi wokulungisa iHolo yoBukumkani. Ngokuqhelekileyo kumiselwa umdala okanye isicaka solungiselelo ukuba silungelelanise lo msebenzi. Silungelelanisa umsebenzi wemihla ngemihla kwiHolo yoBukumkani, siqinisekisa ukuba igcinwa icocekile yaye ikwimeko entle, yaye nezinto zokuyicoca zanele. Kubalulekile ukuba kungabikho zinto ezinokudala ingozi eholweni okanye kwiyadi yeholo. Xa amabandla amabini okanye angaphezulu esebenzisa iholo enye, amaqumrhu abadala amisela ikomiti yeholo eza kuhlengahlengisa ukunyanyekelwa kwesakhiwo kunye neyadi. Le komiti isebenza phantsi kolwalathiso lwamaqumrhu abadala.
7. (a) Yintoni eyenziwayo nyaka ngamnye ukuqinisekisa ukuba iHolo yoBukumkani igcinwa ikwimeko entle? (b) Ziziphi izinto eziye zifune ingqalelo emva kwexesha elithile? (Bona ibhokisi ekwiphepha 5.)
7 IHolo yoBukumkani iye ihlolwe ngokucokisekileyo kube kanye ngonyaka. Emva koko, abadala baye benze amalungiselelo okunyamekela naziphi na izinto ezifuna ingqalelo. Kunokucelwa abavakalisi ukuba bancedise ekulungiseni izinto. Wonk’ ubani ufanele enze umgudu wokulungisa kwanezona zinto zibonakala zingenamsebenzi yaye angalibazisi ukunyamekela izinto ezifuna ingqalelo. Isakhiwo sexeshana esisebenza njengendawo yokuhlanganisana naso sifanele silungiswe.
8. Kunini apho abadala benokunxibelelana neKomiti Yokwakha Yenqila xa kuza kulungiswa iholo?
8 Ukuba abadala bafuna amacebiso okanye uncedo ngokuphathelele ukulungiswa kweHolo yoBukumkani, banokunxibelelana neKomiti Yokwakha Yenqila. Oku kunokuquka indlela yokunyamekela ikhaphethi nendlela yokulungisa ingxaki yokufuma ngaphakathi esakhiweni.
9. Yiyiphi inkqubo efanele ilandelwe xa kufuneka kuqeshwe ikontraka?
9 Ukusebenzisa Iimali Yebandla Ngobulumko: Ubukhulu becala umsebenzi owenziwa kwiHolo yoBukumkani nakwiyadi yayo wenziwa ngamatsha-ntliziyo. Imigudu yawo yokuzincama ilubonakalisa kakuhle uthando analo kwaye inceda kakhulu ekuhliseni iindleko. Xa kuyimfuneko ukuba kufunwe ikontraki eza kwenza umsebenzi othile, njengokubulala izinambuzane neempuku okanye ukulungisa izinto zombane, abadala bafanele bakhethe eyona iza kubiza ixabiso eliphantsi. Oku bakwenza ngokuqala bawubhale phantsi wonke umsebenzi ofanele wenziwe nazo zonke izinto ezifunekayo. Ikopi yolu ludwe ifanele inikwe bonke abo banokuwenza loo msebenzi ukuze bazi eyona nto ifunekayo ngaphambi kokuba babize ixabiso. Emva kokufumana amaxabiso abizwa ngabo bafuna ukwenza lo msebenzi, abadala banokukhetha oyena unexabiso elibhetele. Le nkqubo ifanele ilandelwe kwanokuba kukho umzalwana othi angawenza loo msebenzi okanye athengisele ibandla izinto ezifunekayo ngexabiso elithile.
10. Yintoni eyenziwayo ukuze kuqinisekwe ukuba imali yebandla isetyenziswa kakuhle?
10 Abadala bakwathabatha amanyathelo afanelekileyo ukuze bacele imvume yokungawurhafeli umhlaba kwiindawo orhafelwayo kuzo. Xa emaninzi amabandla asebenzisa iHolo yoBukumkani enye, ikomiti yeholo iba neakhawunti yebhanka esecaleni kwaye ichazela iqumrhu labadala ngalinye ngengxelo yemali, ngaloo ndlela abadala bahlala besazi ngendlela imali esetyenziswa ngayo. Ngabadala abanembopheleleko yokusebenzisa kakuhle imali yebandla.
11. Yintoni efanele yenziwe xa kufuneka kwenziwe umsebenzi omkhulu okanye kumele kuhlaziywe iholo?
11 Ukuhlaziywa KweHolo: Xa ikomiti yeholo ivakalelwa kukuba kufuneka kwenziwe umsebenzi omkhulu wokulungisa iHolo yoBukumkani, icela ulwalathiso kumaqumrhu abadala ngaloo nto. Ukuba kufunyaniswa ukuba kumele kwenziwe umsebenzi omkhulu okanye kuhlaziywe isakhiwo okanye kufunyaniswa ukuba uncedo aluyi kufumaneka kumabandla ahlanganisana kuloo Holo yoBukumkani, abadala banxibelelana neKomiti Yokwakha Yenqila. Aba bazalwana bafanelekayo nabanamava baye banikele amacebiso aluncedo baze bavelele ekwalathiseni loo msebenzi. Ukuba kufuneka imali eninzi, kuya kufuneka kufunyanwe uqikelelo oluchanileyo lwezo ndleko kuze kwenziwe isigqibo esiza kusiwa ebandleni ukuze lisamkele.—Bona iSingxobo Semibuzo soBulungiseleli Bethu BoBukumkani bukaFebruwari 1994.
12. Sinokubonisa njani ukuba siyalixabisa ilungelo lokungenela iintlanganiso kwiHolo yoBukumkani?
12 Hayi indlela esilixabisa ngayo ilungelo lethu lokuhlanganisana kwiHolo yoBukumkani! Asifuni kuzityeshela okanye sizithabathe lula nakancinane iintlanganiso zethu. Sonke sinokufak’ isandla ekuphumeleleni kweli lungiselelo lokusikhuthaza ngokuba nesabelo ngokuzeleyo ekunyamekeleni iHolo yethu yoBukumkani. Ukwenjenjalo kuphakamisa unqulo olunyulu yaye kuzukisa igama likaYehova. Masizimisele ukugcina iindawo zethu zokunqulela zikwimeko entle.
[Ibhokisi ekwiphepha 4]
Uludwe Lwezinto Zokhuseleko Ezimele Zihlolwe
◻ Ukuba ziyimfuneko, izinto zokucima umlilo zifanele zifikeleleke lula yaye zihlolwe kube kanye ngonyaka.
◻ Iminyango nezinyuko eziphumela ngaphandle zifanele ziphawulwe ngendlela ecacileyo, zikhanyiswe kakuhle, kwaye zifikeleleke lula, kwaye iintsimbi zokubambelela zingabi yingozi.
◻ Amagumbi okugcina izinto, izindlu zangasese zifanele zicoceke, izinto zibekwe ngobunono yaye kungabikho zinto ezithungela umlilo msinya, izinto zobuqu kunye nenkunkuma.
◻ Uphahla kunye neegatha zifanele zihlolwe zize zicocwe rhoqo.
◻ Ipavumente kunye nendawo yokupaka iinqwelo-mafutha zifanele zikhanyiswe kuze kungabikho miqobo enokubangela ukutyibilika okanye ukuwa.
◻ Umbane, izinto zokufudumeza nezokupholisa iholo zifanele zihlolwe zize zilungiswe kakuhle.
◻ Nayiphi na indawo evuzayo ifanele ilungiswe ngokukhawuleza ukuze kungabikho kufuma.
◻ Isakhiwo sifanele sitshixwe xa kungekho mntu.
[Ibhokisi ekwiphepha 5]
Ukunyamekela Isakhiwo Neyadi
◻ Ngaphandle: Ngaba uphahla, iindonga, ipeyinti, iifestile, nombhalo weHolo yoBukumkani zikwimeko entle?
◻ Iyadi: Ngaba iyadi ilungiswe yantle? Ngaba ipavumente, ucingo nendawo yokupaka iinqwelo mafutha zikwimeko entle?
◻ Ngaphakathi: Ngaba ikhaphethi, iikhethini, izitulo, izinto ezakhelweyo, ipeyinti kunye neekhabhathi zoncwadi ziyabukeka?
◻ Izixhobo zokusebenza: Ngaba izibane, isandisi-lizwi, izinto zokufudumeza nezokupholisa iholo zisebenza kakuhle?
◻ Izindlu zangasese: Ngaba zicocekile kwaye zisebenza kakuhle? Ngaba iitawuli zendlu yangasese zihlanjwa rhoqo?
◻ Amaxwebhu ebandla: Ngaba amaxwebhu omhlaba asexesheni yaye afakwe inkcazelo echanileyo? Apho kuyimfuneko, ngaba iifomu zokucela ukungayihlawuli irhafu yomhlaba ziyazaliswa minyaka le?