Ibhokisi Yemibuzo

◼ Ngaba ifanele ifakwe ebandleni ingxelo yesifundo seBhayibhile sentsapho?

Ukuba umzali ongumKristu uqhuba isifundo seBhayibhile sekhaya kukho nabantwana abangabhaptizwanga, ubuncinane umzali unokubala iyure veki nganye, ibuyelo nesifundo seBhayibhile esinye ngenyanga. Oku kuya kuba njalo enoba siqhutywa ngaphezu kweyure, ngaphezu kwesihlandlo esinye ngeveki okanye siqhutywa nomntwana ngamnye.—Bona incwadi ethi Ubulungiseleli Bethu, iphe. 104.

Ukuba onke amalungu entsapho ngamaNgqina abhaptiziweyo, ixesha nesifundo asiyi kuqukwa kwingxelo yenkonzo yasentsimini (ngaphandle kokuba umntwana usafunda incwadi yesibini emva kokuba ebhaptiziwe). Oku kungenxa yokuba ingxelo yenkonzo yasentsimini yebandla ibonisa okuye kwenziwa kumsebenzi wokushumayela iindaba ezilungileyo nowokufundisa inyaniso yeBhayibhile kwabo bangazahlulelanga nabangabhaptizwanga njengabakhonzi bakaYehova. (Mat. 24:14; 28:19, 20) Noko ke, oku akukwenzi kungabaluleki ukuqhuba isifundo esinjalo rhoqo.

Yimbopheleleko yabazali abangamaKristu ukufundisisa nabantwana babo. Abo bafuna ukuncedwa ukuze baqalise isifundo sentsapho okanye basiphucule banokucela uncedo kubadala. Ukuba iimeko zifuna ukuba omnye umvakalisi aqhube isifundo seBhayibhile nonyana okanye intombazana engabhaptizwanga yentsapho yamaKristu esebandleni, umveleli owongamelayo okanye umveleli wenkonzo ufanele aziswe. Ukuba uye wavunyelwa ukuba asiqhube, unokuyifaka ingxelo yaso kanye njengokuba ebeya kwenza kuso nasiphi isifundo seBhayibhile.

Ukufundisa abantwana iindlela zikaYehova kufuna ixesha nomgudu ongakumbi kunokuba kufakwe nje ingxelo yenkonzo yasentsimini. (Dut. 6:6-9; IMize. 22:6) Abazali abangamaKristu bafanele banconywe ngokukhulisela abantwana babo “ekweyiselweni kwengqondo kuYehova.”—Efe. 6:4.