Icandelo 5: Ukuqhuba Izifundo ZeBhayibhile Ezinenkqubela
Ukuqonda Umbandela Ofanele Uwugubungele
1 Xa wayefundisa, uYesu wanikel’ ingqalelo kwiintswelo zabafundi bakhe, ethetha nabo “kangangoko babekwazi ukuphulaphula.” (Marko 4:33; Yoh. 16:12) Ngendlela efanayo, abafundisi beLizwi likaThixo banamhlanje kufuneka banikel’ ingqalelo kwisantya abasiqhuba ngaso isifundo seBhayibhile. Ubungakanani bombandela onokuxutyushwa buya kuxhomekeka kwiimeko zomfundisi nesifundo.
2 Yakha Ukholo Olomeleleyo: Ezinye izifundo kusenokufuneka kufundwe nazo izihlandlo ezibini okanye ezithathu ngaphambi kokuba zikuqonde oko kunokuqondwa ngabanye kwakwisihlandlo sokuqala. Sifuna isifundo siwuqonde kakuhle umbandela kunokuba sikhawuleze sigqibe. Isifundo ngasinye kufuneka sibe nesiseko esiqinileyo elukholweni esisekelwe eLizwini likaThixo.—IMize. 4:7; Roma 12:2.
3 Njengoko uqhuba isifundo veki nganye, chitha ixesha elaneleyo ukuze uncede isifundo siqonde size samkele oko sikufunda eLizwini likaThixo. Musa ukusigqwagqwa isifundo kuba sinokungangenelwa kwezo nyaniso usifundisa zona. Yiba nexesha elaneleyo ukuze uxubushe iingongoma eziziintloko nezibhalo ezisekelwe kuzo ezo mfundiso.—2 Tim. 3:16, 17.
4 Bambelela Emxholweni: Ngoxa sifuna ukukuphepha ukusigqwagqwa isifundo, asikufuni ukuphazanyiswa zizinto ezisecaleni. Ukuba isifundo sithanda ukuthetha ngeengxaki zaso, sinokulungiselela ukuba zixutyushwe emva kwesifundo.—INtshu. 3:1.
5 Kwelinye icala, ihlombe lethu ngenyaniso linokwenza sithethe kakhulu xa siqhuba isifundo. (INdu. 145:6, 7) Ingongoma esecaleni okanye amava anokusinceda isifundo, kodwa asingethandi ukuba abe maninzi kakhulu ngokokude aphazamisane nesifundo, singakwazi ukufumana ulwazi oluchanileyo lweemfundiso ezisisiseko zeBhayibhile.
6 Ukuba sixubusha umbandela osengqiqweni sihlandlo ngasinye sifunda, siyazinceda izifundo ‘zihambe ekukhanyeni kukaYehova.’—Isa. 2:5.