Funda Ubuchule Bokuqiqa Nabanye
1. Yiyiphi ingxelo yeBhayibhile esiza kuyihlolisisa yaye ngoba?
1 Intetho kampostile uPawulos kwindlu yesikhungo yakwa-Antiyokwe ePisidiya, ebhalwe kwiZenzo 13:16-41, ingumzekelo omhle wendlela yokuqiqa nabanye. UPawulos wacinga ngemvelaphi nendlela abacinga ngayo abaphulaphuli waza wavisisanisa intetho yakhe noko. Njengoko sihlolisisa le ngxelo, makhe sibone ukuba singakwenza njani oku thina xa sishumayela.
2. Sifunda ntoni kwindlela uPawulos awayiqalisa ngayo intetho yakhe?
2 Khangela Izinto Enivumelana Kuzo: Nangona isigidimi sikaPawulos sasisekelwe kwindima kaYesu kwinjongo kaThixo, akazange asuke ayiqale apho intetho yakhe. Kodwa waqala wathetha ngento awayedibana ngayo nabona bantu baninzi phakathi kwabaphulaphuli bakhe—imbali yohlanga lwakwaYuda. (IZe. 13:16-22) Ngokufanayo, siya kuzifikelela ngokulula iintliziyo zabantu ukuba sikhangela izinto esivumelana ngazo. Oku kusenokuquka ukubakhuthaza ukuba bakhuphe imbilini yabo, ngokubabuza ngobuchule size sibaphulaphule ngenyameko ukuze sibone ezona zinto bazithandayo.
3. Yintoni eyabangela abaphulaphuli bakaPawulos bamadolw’ anzima ukukholelwa ukuba uYesu wayenguMesiya othenjisiweyo?
3 Xa wayexubusha imbali yamaYuda, uPawulos wakhumbuza abaphulaphuli bakhe ngesithembiso sikaThixo sokuvelisa uMsindisi ophuma kumnombo kaDavide. Noko ke, amaYuda amaninzi ayelinde isinxiba-mxhaka esilijoni nesasiya kuwakhulula kubukhoboka baseRoma size siphakamise uhlanga lwakwaYuda. Ngokuqinisekileyo, ayesazi ukuba uYesu wagatywa ziinkokeli zonqulo zamaYuda eYerusalem, wanikelwa kumagunya amaRoma waza wabulawa. UPawulos wayenokuwaqinisekisa njani ukuba Lowo yayinguMesiya othenjisiweyo?
4. UPawulos waqiqa njani ngobuchule nabaphulaphuli bakhe abangamaYuda?
4 Intshumayelo Yakho Mayifanele Abaphulaphuli: Kuba wayeyazi indlela abaphulaphuli bakhe abacinga ngayo, uPawulos wasebenzisa iZibhalo ukuze aqiqe nabo ngezinto ababesele bezikholelwa. Ngokomzekelo, wathetha ngoYesu njengonyana kaDavide nanjengalowo wakhankanywa nguYohane uMbhaptizi, owayedume njengomprofeti kaThixo. (IZe. 13:23-25) UPawulos wathi iinkokeli zonqulo ‘zazalisekisa izinto ezavakaliswa ngabaProfeti,’ ngokugatya uYesu nokumbulala. (IZe. 13:26-28) Waleka ngelithi, bakho abantu abambona ngawabo amehlo uYesu ovusiweyo, waza wacaphula iZibhalo abazaziyo nezazalisekayo ngokuvuka kukaYesu.—IZe. 13:29-37.
5. (a) Washumayela njani uPawulos xa wayethetha nabaphulaphula abangamaGrike? (b) Sinokuwuxelisa njani umzekelo kaPawulos xa sishumayela kwintsimi yethu?
5 Kwelinye icala, xa wayethetha nabaphulaphuli abangamaGrike, kwiAreyopago yaseAthene, uPawulos wasebenzisa enye indlela yokushumayela. (IZe. 17:22-31) Kodwa, wathetha ngesigidimi esifanayo yaye kuzo zombini ezi meko waba nemiphumo emihle. (IZe. 13:42, 43; 17:34) Nanamhlanje, siya kuphumelela xa sishumayela, ukuba sikhangela izinto esivumelana ngazo nabaphulaphuli bethu size sithethe nabo ngokuvisisana nemvelaphi nendlela abacinga ngayo.