Nceda Abafundi Abatsha Banyamezele Ukuchaswa
1 Xa abantu beqalisa ukufunda iBhayibhile baze ‘banqwenele ukuphila ngozinikelo lobuthixo,’ uSathana wenza konke anokukwenza ukuze abahlasele. (2 Tim. 3:12) Banokuchaswa ngabo basebenza nabo, abafunda nabo okanye abamelwane babo. Kuba nzima ngakumbi xa izalamane zabasebatsha ezingenazinjongo zimbi zibachasa.—Mat. 10:21; Mar. 3:21.
2 Ukuchaswa Kwaprofetwa: Abafundi abatsha bafanele baqonde ukuba bafanele bakulindele ukutshutshiswa yaye ukutshutshiswa kubonisa ukuba bangabafundi bakaKristu benene. (Yoh. 15:20) Ngamanye amaxesha abanye basenokusichasa kuba beneembono eziphosakeleyo ngamaNgqina kaYehova. Khumbula ukuba kubangela uvuyo olukhulu ukuhlaziswa ngenxa yokuba ngumlandeli kaYesu nokuthobela uThixo. (IZe. 5:27-29, 40, 41) Baqinisekise abafundi abatsha ukuba uYehova uya kubaxhasa. (INdu. 27:10; Mar. 10:29, 30) Ukugcina kwabo ingqibelelo kubamisa ngakwicala likaYehova kwimbambano yolongamo.—IMize. 27:11.
3 Indima Yolwazi Oluchanileyo: Kubethelele kwabo ubafundelayo ukubaluleka kokuqhubeka bengenisa ulwazi oluchanileyo phezu kwazo nje izilingo abasenokuba bajamelene nazo. USathana usebenzisa inkcaso ukuze athintele izinto abazifundayo zingantshuli kwintliziyo yabo yomfuziselo. (IMize. 4:23; Luka 8:13) Kufuneka baqhubeke bengenisa ulwazi oluchanileyo lweLizwi likaThixo ukuze bamiliselwe ngokuqinileyo elukholweni.—INdu. 1:2, 3; Kol. 2:6, 7.
4 Kufuneka Ukunyamezela: Kuso nasiphi na isilingo kubalulekile ukunyamezela yaye kunokuvelisa imiphumo emihle. (Luka 21:16-19) Xa abafundi abatsha benyamezela inkcaso bayangenelwa bona kunye nabanye. Bayazibonela indlela uYehova akwazi ngayo ukubasikelela ngentabalala abo banyamezela ngokunyaniseka.—Yak. 1:12.
5 Umpostile uPawulos wavuyiswa yinkqubela yokomoya yabazalwana bakhe baseTesalonika. Wambulela uThixo ngenxa yabo, yaye abaninzi babo babencedwe nguye ukuze bangene enyanisweni. (1 Tes. 1:3-5) Nathi siya kuba novuyo olufanayo ukuba sibanceda banyamezele ukuchaswa abo sifunda nabo iBhayibhile.