Ngaba Abantwana Bakho Sele Bexhobile?
1. Kutheni kufuneka abantwana besikolo baxhobe?
1 Nyaka ngamnye wokuvulwa kwezikolo, abantwana bakho badibana neengxaki nengcinezelo abangaqhelananga nayo. Baphinda bafumane namathuba ‘okungqinela inyaniso.’ (Yoh. 18:37) Ngaba sele bexhobile?
2. Ukuze bahlale bexhobile, yintoni abafanele bayazi abantwana bakho?
2 Ngaba abantwana bakho bayakuqonda oko kuthethwa kukuba nenxaxheba kwimibhiyozo yokuthand’ izwe nakwiiholide zabahedeni kunye nesizathu sokuba kuphosakele? Ngaba bakulungele ukujamelana nengcinezelo abaza kuyifumana yokuba basukele imfundo ephakamileyo, ukuziphatha okubi, ukusela utywala nokusebenzisa iziyobisi? Ngaba baza kusuka nje bathi lunqulo lwabo olungabavumeliyo kumdlalo othile, okanye bayakwazi ukucacisa iinkolelo zabo?—1 Pet. 3:15.
3. Abazali banokuyisebenzisa njani ingokuhlwa Yonqulo Lwentsapho ukuze baxhobise abantwana babo?
3 Sebenzisa Ingokuhlwa YoNqulo Lwentsapho: Kakade ke, kusenokwenzeka ukuba zininzi izinto ekuza kufuneka uxubushe ngazo nabantwana bakho ebudeni bonyaka, kuxhomekeke kwiingxaki ezintsha abahlangabezana nazo esikolweni. Uya kubanceda babe nesibindi ukuba uqala kwangoku zingekavulwa izikolo ukwenza umgudu wokuxubusha ngeengxaki abasenokuhlangabezana nazo. Kutheni ungasebenzisi iingokuhlwa ezithile Zonqulo Lwentsapho nje? Usenokucela abantwana bakuxelele ezona zinto zibaxhalabisa ngokwenene esikolweni. Ninokuphinda nithethe nangezinto enakha nathetha ngazo kwiminyaka edluleyo, ekubeni ngoku abantwana bakho sele bekhulile yaye beza kuziqonda bhetele. (INdu. 119:95) Wena unokude udlale indima katitshala okanye omnye umntwana abafunda naye. Bafundise indlela yokuphendula ngeBhayibhile nokusebenzisa iincwadi ezinjengethi Ukuqiqa nethi Abantu Abaselula Bayabuza. Rhoqo xa kuza kuvulwa izikolo ekuqaleni konyaka, omnye umzali wayedlala indima katitshala ebantwaneni bakhe ukuze abancede balungele ukuya kuchazela ootitshala abatsha ukuba bangamaNgqina kaYehova.—Funda iMboniselo, kaDisemba 15, 2010, iphepha 3-5.
4. Yintoni abaya kuyenza abazali abalumkileyo?
4 Kule mihla yokugqibela, ulutsha olungamaKristu luhlangabezana neengxaki ekuya kusiba ‘nzima ukujamelana nazo.’ (2 Tim. 3:1) Abazali abalumkileyo baya kwenza umgudu wokubaxhobisa kusengaphambili abantwana babo. (IMize. 22:3) Yenza konke okusemandleni uncede abantwana bakho baxhobele ezi ngxaki, ngaphambi kokuba zivele.