Lixabise Ilungelo Onalo Lenkonzo
1. Abaninzi bawugqala njani umsebenzi wethu wokushumayela?
1 Abaninzi kwihlabathi likaSathana bawugqala ‘ububudenge’ umsebenzi wethu wokushumayela. (1 Kor. 1:18-21) Ukuba asilumkanga, le ngcamango igqwethekileyo inokusidimaza ize iyehlise inzondelelo esinayo. (IMize. 24:10; Isa. 5:20) Ziziphi izizathu esinazo zokulixabisa ilungelo lethu lokuba ngamaNgqina kaYehova?—Isa. 43:10.
2. Kutheni kusithiwa ubulungiseleli ‘ngumsebenzi ongcwele’?
2 ‘Umsebenzi Ongcwele’: Umpostile uPawulos wabhekisela kubulungiseleli ‘njengomsebenzi ongcwele.’ (Roma 15:15, 16) Kutshiwo njani ukuba ubulungiseleli ‘bungumsebenzi ongcwele’? Ukuba nenxaxheba kubo kusenza sibe ‘ngabasebenzi abangamadlelane’ ‘naLowo Ungcwele’ uYehova, yaye kunegalelo ekungcwalisweni kwegama lakhe. (1 Kor. 3:9; 1 Pet. 1:15) UYehova uwugqala umsebenzi wethu ‘njengombingelelo wendumiso,’ ngoko ubulungiseleli yinkalo ebalulekileyo yonqulo lwethu.—Heb. 13:15.
3. Yintoni eyenza ukushumayela kube lilungelo elingathethekiyo?
3 Ukushumayela iindaba ezilungileyo lilungelo elingathethekiyo elixhanyulwa yimbinana. Iingelosi beziya kusivuyela esi sabelo zize zisiphumeze ngendlela esemagqabini. (1 Pet. 1:12) Noko ke, uYehova ukhethe ukulinika thina bantu bangafezekanga, ‘izitya zodongwe,’ eli lungelo limangalisayo!—2 Kor. 4:7.
4. Sinokubonisa njani ukuba siyabuxabisa ubulungiseleli?
4 Buyeyona Nto Iphambili: Ekubeni silixabisa ngokwenene ilungelo esinalo, ubulungiseleli sibugqala ‘njengento ebaluleke ngakumbi’ kubomi bethu. (Fil. 1:10) Ngenxa yoko, veki nganye sizibekela ixesha ukuze sibe nenxaxheba kubo. Imvumi elixabisayo ilungelo lokudlala kweyona okhestra idumileyo emhlabeni ibiya kulungiselela kakuhle sihlandlo ngasinye eza kucula ngaso ize izame ukuphucula ubuchule bayo. Kunjalo ke nangobulungiseleli. Besiya kulungiselela kakuhle ngaphambi kokuya kubo ukuze sikwazi ‘ukuliphatha ngokufanelekileyo ilizwi lenyaniso,’ yaye besiya kuzama ukuphucula ‘ubugcisa bethu bokufundisa.’—2 Tim. 2:15; 4:2.
5. Ngubani obuxabisayo ubulungiseleli bethu?
5 Musa ukudinyazwa kukungabi namdla kwabantu. Khumbula ukuba basebaninzi abantu abakuxabisayo ukutyelelwa sithi. Kakade ke, asenzeli kunconywa ngabantu. Eyona nto ibalulekileyo yindlela avakalelwa ngayo uYehova, yaye uyixabisa gqitha inzondelelo esinayo.—Isa. 52:7.