Bamb’ ixesha
1. Nguwuphi umzekelo asibekela wona uYehova ekubamben’ ixesha?
1 UYehova usoloko elibamba ixesha. Ngokomzekelo, abakhonzi bakhe ubanika ‘uncedo ngexesha elifanelekileyo.’ (Heb. 4:16) Kwakhona ubanika ‘ukutya kokomoya ngexesha elifanelekileyo.’ (Mat. 24:45) Sinokuqiniseka ukuba imini ezayo yomsindo wakhe ayiyi “kufika emva kwexesha.” (Hab. 2:3) Kusinceda ngokwenene ukubamba ixesha kukaYehova. (INdu. 70:5) Noko ke, ekubeni singabantu abangafezekanga nabaxakekileyo, ukubamba ixesha akusoloko kulula. Kutheni simele sizame ukubamb’ ixesha?
2. Kutheni ukubamb’ ixesha kumzukisa uYehova?
2 Ukubamb’ ixesha kunqabile kule mihla yokugqibela kuba abantu abaninzi bathand’ iziqu zabo yaye abakwazi ukuzeyisa. (2 Tim. 3:1-3) Xa amaKristu efika ngexesha emsebenzini, ezintlanganisweni nakwezinye izinto, abanye bayayibona loo nto, yaye oko kuzukisa uYehova. (1 Pet. 2:12) Ngaba sifika ngexesha emsebenzini, kodwa sibe singalibambi kwizinto zobuthixo? Ukufika ngexesha kwiintlanganiso zamaKristu, ngaphambi kwengoma yokuvula nomthandazo, kubonisa ukuba sinomnqweno wokuxelisa uBawo wethu wasezulwini olungeleleneyo.—1 Kor. 14:33, 40.
3. Kutheni ukubamb’ ixesha kubonisa ukuba sinolwazelelelo ngabanye?
3 Ukubamb’ ixesha kubonisa ukuba sinolwazelelo ngabanye. (Fil. 2:3, 4) Ngokomzekelo, xa sifika ngexesha kwiintlanganiso zamaKristu, kuquka iintlanganiso zenkonzo yasentsimini, asiwaphazamisi amanye amaKristu. Kwelinye icala ukuba sinomkhwa wokufika emva kwexesha, loo nto ibenza abanye bacinge ukuba sithi ixesha lethu libalulekile kunelabo. Ukubamb’ ixesha kubonisa ukuba sikhuthele yaye sinokuthenjwa—ezo zimpawu abazixabisayo abo bakunye nathi.
4. Ukuba sisoloko sifika emva kwexesha, sinokuphucula njani?
4 Ukuba awulibamb’ ixesha, camngca ngezizathu zokuba ungalibambi. Yenza ucwangciso oluza kukwenza wenze umsebenzi wakho ngamaxesha amiselweyo ukuze ulungelelane. (INtshu. 3:1; Fil. 1:10) Cela uYehova akuncede. (1 Yoh. 5:14) Ukubamb’ ixesha yenye indlela yokubonisa ukuba siyayixabisa imithetho emibini eyeyona mikhulu—ukuthanda uThixo nommelwane.—Mat. 22:37-39.