Ukuphucula Ubuchule Bethu Bokushumayela—Indlela Yokuqeqesha Izifundo ZeBhayibhile

Isizathu Sokuba Kubalulekile: Ukuze zenze inkqubela ngokomoya, izifundo zeBhayibhile zifanele zingenise ulwazi olungakumbi kuneemfundiso ezisisiseko nje kuphela. (Heb. 5:12–6:1) Ukufunda kufuna umgudu. Kuquka ukudibanisa oko sikwaziyo nolwazi esilufumeneyo size siqonde indlela olusebenza ngayo. (IMize. 2:1-6) Ukufunda ukwenza uphando lobuqu kuya kunceda abafundi baphendule imibuzo yeBhayibhile besebenzisa iincwadi zamaKristu. Umgudu onyanisekileyo abawenzayo ukuze benze oko bakufundayo uya kubanceda bamelane neengxaki abaza kujamelana nazo njengamaKristu.—Luka 6:47, 48.

Indlela Yokukwenza:

Bethelela ukubaluleka kokufuna uncedo lukaYehova ngomthandazo ngaphambi kwesifundo ngasinye.—Yohane 14:26; 1 Kor. 2:10.
Kwasekuqaleni, khuthaza isifundo sakho ukuba silungiselele kwangaphambili. Sibonise eyakho incwadi, uze usifundise indlela yokukrwelela iingongoma ezibalulekileyo kuphela.
Sicele siphendule ngawaso amazwi. Kuphephe ukuvumela isifundo sibe yimibuzo neempendulo apho umfundi afunda iimpendulo ngokusuka ngqo encwadini.
Khuthaza isifundo sakho ukuba sifunde inxalenye yeLizwi likaThixo yonke imihla. Sibonise ucwangciso lokufunda iBhayibhile ku-jw.org/xh, olubonisa indlela esingayenza ngayo le nto. Ukuzimisela ukufunda iBhayibhile yonke imihla kuza kufuna ukuzinikela, kodwa loo nto inomvuzo.—INdu. 1:2, 3.
Bonisa isifundo sakho indlela yokufumana iimpendulo zemibuzo yeBhayibhile sisebenzisa iWatchtower Library okanye iWatchtower LAYIBRARI EKWI-INTANETHI. Sincede siqonde uphawu olumela ncwadi nganye esiyisebenzisayo kwiintlanganiso zebandla.

hawulizame Kwakule Nyanga:

Ekupheleni komxholwana okanye isahluko, cela isifundo sakho ukuba sishwankathele oko sisandul’ ukukufunda. Ukuba awunaso isifundo seBhayibhile, ziqhelise ukushwankathela ivesi yeBhayibhile okanye isiqendu seMboniselo ukuze uphucule indlela ofunda ngayo.