Umbuzo Olula Onokuwubuza

UMary nomyeni wakhe, uJohn,a bahlala kwilizwe apho banokushumayela iindaba ezilungileyo kubasebenzi abaninzi abasuka kwiiPhilippines. Ngexesha lekhorona, uMary wakwazi ukuqalisa izifundo zeBhayibhile kubantu abahlala kwilizwe lakhe nakubantu abahlala kwamanye amazwe. Wayenza njani le nto?

UMary wayedla ngokubuza isifundo sakhe lo mbuzo, “Ukhona umntu omaziyo ongathanda ukufunda iBhayibhile?” Ukuba sithi ewe, wayecela ukuba simdibanise naye. Ukubuza lo mbuzo ulula kudla ngokuba nemiphumo emihle. Kutheni sisitsho? Kuba abantu abathanda iLizwi LikaThixo badla ngokufuna ukubalisela abantu bakowabo nabahlobo babo ababathandayo ngezinto abazifundileyo. Kuye kwenzeka ntoni emva kokuba uMary ebuze lo mbuzo?

Isifundo sikaMary, uJasmin, samdibanisa nezinye izifundo eziyi-4. Esinye zazo, uKristine, sasikuthanda ukuqhutyelwa isifundo, kangangokuba sacela uMary ukuba bafunde kabini ngeveki. Xa uMary wabuza uKristine ukuba ukhona na omnye umntu amaziyo ofuna ukufunda iBhayibhile, wathi, “Ewe, ndiza kukudibanisa nabahlobo bam.” Kwiiveki nje ezimbalwa, uKristine wadibanisa uMary nabanye abahlobo bakhe abayi-4 ababefuna ukufunda. Ekuhambeni kwexesha, uKristine wamdibanisa nabanye abahlobo bakhe, nabo beza nabanye abafuna ukufunda.

UKristine wayefuna nabanye abantu bakowabo abakwiiPhilippines bafunde iBhayibhile. Ngoko wathetha nentombi yakhe, uAndrea. Ekuqaleni, uAndrea wayecinga ukuba amaNgqina aneenkolelo ezingaqondakaliyo, awakholelwa kuYesu futhi asebenzisa itestamente endala kuphela. Kodwa emva kwesifundo sakhe sokuqala yatshintsha indlela awayecinga ngayo. Xa befunda wayedla ngokuthi, “Ukuba yiBhayibhile etshoyo, yinyani!”

Ekuhambeni kwexesha, uAndrea wadibanisa uMary nabahlobo bakhe ababini nomnye umntu asebenza naye. Udadobawo ka-Andrea ongaboniyo, uAngela, wayedla ngokumamela xa befunda. Kodwa yena uMary wayengayazi loo nto. Ngenye imini, uAngela wacela uAndrea ukuba amdibanise noMary ukuze afunde naye iBhayibhile. UAngela wazithanda kakhulu izinto awayezifunda. Yathi iphela inyanga, wabe uAngela efuna ukufunda kayi-4 ngeveki, futhi izibhalo ezininzi ezazi ngentloko. Waqalisa ukungena qho kwiintlanganiso ngevideoconferencing, encedwa nguAndrea.

UMary wathi akuva ukuba umyeni kaKristine, uJoshua, uhlala esondela kufutshane xa befunda, wacela ukufunda nabo bobabini. UJoshua wathi, “Ndiza kumamela nje, kodwa ungandibuzi imibuzo; ukuba ukhe wandibuza, ndiza kuhamba.” Yathi iphela imizuzu eyi-5 wabe sele ebuze imibuzo emininzi ukodlula ekaKristine, futhi efuna ukuqhubeka nesifundo.

Umbuzo kaMary olula wamenza wafundela abantu abaninzi. Babebaninzi kangangokuba wacela amanye amaNgqina ukuba afundele abanye. Xa bebonke aba bantu babefundelwa nguMary babeyi-28, bekumazwe ayi-4.

UJasmin, isifundo sokuqala sikaMary ekuthethwe ngaso kweli nqaku, wabhaptizwa ngoAprili 2021. Yena uKristine wabhaptizwa ngoMeyi 2022, waza wabuyela kwiiPhilippines kwintsapho yakhe. Nezinye izifundo ezibini uMary awadityaniswa nazo nguKristine zabhaptizwa. Emva kweenyanga ezimbalwa, naye uAngela wabhaptizwa. Ngoku nguvulindlela othe ngxi. Umyeni kaKristine, uJoshua, nentombi yabo, uAndrea, nezinye izifundo zabo ziqhuba kakuhle.

Ngexesha labapostile, abantu abaninzi babebalisela iintsapho zabo nabahlobo ngezinto abazifunde ngoYesu. (Yoh. 1:​41, 42a; IZe. 10:​24, 27, 48; 16:​25-33) Kutheni ungabuzi abantu obafundelayo nabanye abanomdla lo mbuzo, “Ukhona umntu omaziyo ongathanda ukufunda iBhayibhile?” Ukuba ubuza lo mbuzo ulula, mhlawumbi nawe ungafumana abantu abaninzi abafuna ukufunda iBhayibhile, kwazi bani?