Ikamva Lonqulo Ngenxa Yoko Kwenzeke Kulo Kwixa Elidluleyo
Incandelo 24—Ngoku Nangonaphakade—Ukulunga Okuhlala Kuhleli Konqulo Lokwenyaniso
“Unqulo, ukuba luneenyaniso zasezulwini, wanela nje kukulubona ube sowuncoma.”—UWilliam Cowper, imbongi eliNgesi yenkulungwane ye-18
AKUKHO nto lunokunconywa ngayo unqulo lobuxoki. Luye lwafaka uluntu kwiinkulungwane ezingama-60 zosizi nenkxwaleko. Ukuxoka kwalo, ukukhohlisa kwalo, ukuba yingcuka eyambethe ufele lwegusha kwalo, neendlela zalo ezilizothe zilwenze lwalisikizi emehlweni kaThixo nawabantu. Ekubeni lucezela kude kwiinyaniso zasezulwini, unqulo lobuxoki luyichasile inyaniso nokulunga kwayo.
Kungekudala imikhosi kaThixo etshabalalisayo ngokungacengi solalaphi iza kuluphosa unqulo lobuxoki emhadini wentshabalalo kanaphakade. Kamsinya emva koko, inxalenye eseleyo yenkqubo kaSathana nayo iya kwehlelwa kwasesifanayo. Kodwa unqulo lokwenyaniso, kwanabo baluqheliselayo, luya kuhlala luhleli. Olunjani ngoko uvuyo ekuya kuba lulo ngokubonakaliswa kokulunga kwalo okuhlala kuhleli ukusa kumlinganiselo esingenakuwuthelekelela namhlanje!
Kokuphi Oko Kulunga?
Zininzi izinto olulunge ngazo unqulo lokwenyaniso. Nazi ezimbalwa zazo. Kutheni ungaziniki ixesha lokuhlolisisa iindinyana zeBhayibhile ezicatshuliweyo ezingqina ukuba ezi ngenelo zikanaphakade zisekelwe eBhayibhileni?
Phakathi kwezinto ezininzi ezihlala zihleli olulunge ngazo unqulo lokwenyaniso kukho ezi:
▪ Lusekelwe kwinyaniso kaThixo ongenakuphazama, ogama lakhe linguYehova, esinokukholosa ngaye ngokupheleleyo.—INdumiso 83:18; Isaya 55:10, 11.
▪ Luvulekele nabani na onentliziyo ethobekileyo, alugcinelwanga iinkcuba-buchopho kuphela.—Mateyu 11:25; 1 Korinte 1:26-28.
▪ Alunanto yakwenza nesizwe esithile, imeko engokwasentlalweni enesigxina kwezoqoqosho.—IZenzo 10:34, 35; 17:24-27.
▪ Lunikela ithemba elinesiseko esiqinisekileyo lokuphila kwihlabathi elinoxolo nonqabiseko ekungekho lusizi kulo, ukugula, iinkxwaleko nokufa.—Isaya 32:18; ISityhilelo 21:3, 4.
▪ Lunikela ulwalathiso ngendlela amalungu alo anokuphila ngayo njengabazalwana abanyanisekileyo bazwenibanzi, bemanyene kwimfundiso esisiseko, kwihambo nasemoyeni.—INdumiso 133:1; Yohane 13:35.
▪ Kumntu wonke—indoda, ibhinqa nomntwana—lunikela ithuba lokuba nesabelo ngokukhutheleyo emsebenzini kaThixo, esiba nenjongo ebomini.—1 Korinte 15:58; Hebhere 13:15, 16.
▪ Lusilumkisa ngeengozi ezifihlakeleyo, lusiyalela indlela esifanele siziphathe ngayo ukuze sizuze iingenelo.—IMizekeliso 4:10-13; Isaya 48:17, 18.
Yaye kutheni le nto kunokuthiwa ezi ngenelo zezikanaphakade? Kungenxa nje yokuba ziya kuhlala zikho logama nje lusekho unqulo lokwenyaniso—ngonaphakade.
Ukuvala Umsantsa
Singatsho ukuthi ukufa kulolunye lwezona ntshaba zinkulu zenyaniso, ekubeni abantu ngokufuthi bengcwatywa kunye nenkcazelo ekungekho bantu abangabanye abayaziyo. Iinkcazelo ezichanileyo zeziganeko zakutshanje ngokwentelekiso—ngokomzekelo, ukugwintwa komongameli-mbuso waseUnited States uJ. F. Kennedy ngowe-1963—zisengumbandela ekuphikiswana ngawo. Zibonisa ntoni izibakala? Ngubani kanye kanye owaziyo? Abaninzi abasenokwazi sele belele kobandayo. Yaye ukuba oku kuyinyaniso ngesiganeko esenzeke kwiminyaka nje engama-26 edluleyo, kuthekani ngeziganeko ezenzeka kumakhulukhulu okanye kwanakumawakawaka eminyaka eyadlulayo?
Ukongezelela, ababhali-mbali nabo bangabantu, banolwazi olulinganiselweyo yaye basebenza phantsi kwemiqobo yokungafezeki kobuqu ibe kusengenzeka ukuba bavukwe likhethe. Kungenxa yeso sizathu le nto umntu onengqondo ephangaleleyo esenza kakuhle ngokuphepha ukumisela umthetho-siseko ngezinto angenagunya kuzo, ezinjengengxelo ephefumlelwe nguThixo.
Ukubhala ngembali yonqulo kuvelisa iingxaki ezifanayo, ekubeni ngokufuthi abasemagunyeni bengavumelani nezibakala. Kungcelele oluthi “Ikamva Lonqulo Ngenxa Yoko Kwenzeke Kulo Kwixa Elidluleyo,” uVukani! uye wazama ukunikela izibakala ezinobungqina obubambekayo ngokusuka kwiincwadi ezithile, kodwa kumele kuvunywe ukuba okwangoku kukho izinto ezithile esingazaziyo nje kwaphela. Ngokomzekelo, ngaba amaqela awayezibanga engamaKristu awayekho ebudeni nasemva kwamaXesha Obumnyama anamathela ngokwenene ukusa kuwuphi umkhamo kubuKristu bokwenyaniso?
Ngokubhekisele kula maqela, unjingalwazi wembali yecawa uA. M. Renwick uthi: “Kusafuneka kwenziwe uphengululo olukhulu olungokwembali ukuze kufunyanwe eyona ngxelo ichanileyo nendlela loo ntlaninge yamaqumrhu eyayilugqala ngayo unqulo.” Ngokutsho kwalo kaRenwick, “kwixesha elidlulileyo ababhali-mbali bebexhomekeke kakhulu kwiingxelo zeentshaba zamaqela aye ajibilika kuzo ukuze baphande ngemfundiso yawo esisiseko nangemilinganiselo yokuziphatha.” Kambe ke, kwanokuxhomekeka kakhulu kwiingxelo zabahlobo babo kwakusenokuphumela kwingcamango etenxileyo. Ngoko kwanasemva kophengululo olukhulu olungokwembali, ngokunokwenzeka kusaya kubakho imibuzo emininzi eya kuhlala ingaphendulwanga.
Kuthekani ngeBhayibhile? Njengencwadi ephefumlelwe nguThixo equlethe imbali yonqulo, inyanisile kuyo yonke into eyithethayo. Kodwa ithetha okuncinane kakhulu ngeendidi ezahlukeneyo zonqulo lobuxoki ezakha zakho. Kuyaqondakala ukuba imele ibe injalo, ekubeni yayilungiselelwe ukusebenza njengencwadi yesikhokelo yonqulo lokwenyaniso, kungekhona olobuxoki.
Kwanangokubhekisele kunqulo lokwenyaniso, iBhayibhile ayisixeleli yonke into. Isinika inkcazelo eyaneleyo yokufanisa unqulo lokwenyaniso ngokunempumelelo, kodwa ngamathuba athile iyazishiya iinkcukacha. Ngoxa ukwazi ezi nkcukacha kusenokubangela imivuyo yaye kukokomdla, okwangoku azibalulekanga.
Kwakhona, kukho amaxesha eziganeko iBhayibhile engathethiyo ngawo. Ngokomzekelo, ayithethi nto ngoko kwenzekayo ebudeni bethuba elingaphezu kwama-400 eminyaka eliphakathi kokugqitywa kweZibhalo zesiHebhere, ezibizwa ngokuqhelekileyo njengeTestamente Endala, nokufika kukaYesu. Ibe ukususela ekugqityweni kweBhayibhile, sele kudlule iminyaka ephantse ibe li-1 900.
Ngoko kangangeenkulungwane ezimalunga ne-18, asikhange sibe nangxelo ziphefumlelweyo ngobuKristu. Yile nto ke kanye ebangele ukuthandabuzeka ngabathile abazibanga bengamaKristu, njengoko wakhe watsho umbhali uRenwick. Sekunjalo, kuyabonakala ukuba noko bebekho abantu abathile ukuhla ukutyhubela iinkulungwane ababebambelele kubuKristu bokuqala. Noko ke, kusekho imibuzo engekaphendulwa ephathelele iintshukumisa nokunyaniseka ekusenokwenzeka ukuba babenako abantu abathile bamhlamnene. Kuthekani ngezinye zeenkokeli zenkqubo yoHlaziyo? Xa kuthethwa ngalo mbandela kuthekani ngamadoda anjengoConfucius noMuhammad? Nangona iinkqubo zonqulo lwanamhlanje zinokuhlolisiswa ngokuchanileyo ngesizinzi seziqhamo zalo, ngokufuthi oko akunakwenziwa kubantu ngabanye—ngokukodwa ukuba kudala bafayo.
Noko ke, ukuba kwihlabathi elitsha likaThixo, kunokuba kukuthanda koMdali ukuba kuphinde kubhalwe iincwadi zembali—kuquka nezo zembali yonqulo—oko kunokwenzeka. Oku kungenxa yenye inkalo yokulunga konqulo lokwenyaniso—isiqinisekiso sokuba abafi baza kuvuswa.—Yohane 5:28, 29; IZenzo 24:15.
Khawufan’ ucinge nje ngovuyo esiya kuba nalo ngokufumana iimpendulo ezichanileyo kwimibuzo yethu ngokuthetha nabantu abavusiweyo abazenza ngokoqobo izinto esiye safunda ngazo kwiincwadi zembali. Khawuthelekelele xa sele ukwazi ukufakela iinkcukacha ezishiyiweyo, njengegama likakumkani waseYiputa owafa kuLwandle Olubomvu nowathwaxwa ngezibetho ezehlela elo lizwe.
Ukuba ngaminazana ithile kuya kuze kufuneke kubhalwe ingxelo enjalo, iya kubhalelwa ukuzukisa nokuthethelela ngonaphakade umseki wonqulo lokwenyaniso, uYehova uThixo. Akukho mathandabuzo mayela noku. Phofu ke, umbuzo osaseleyo ngulo: Ngaba uya kuba lapho ukuze uyifunde?
Ukuncoma Akwanele
Ukulunga okuhlala kuhleli konqulo lokwenyaniso akusoloko kulula ukukubona njengoko amazwi kaCowper acatshulwe kwingabula zigcawu yeli nqaku kubonakala ngathi abonisa njalo. Ngoko ke, inkupho yokuqala yeZion’s Watch Tower and Herald of Christ’s Presence yanikela la magqabaza kwiminyaka eli-110 eyadlulayo: “Inyaniso, njengentyatyambo encinane ebukekayo ekhula entlango, ingqongwe yaye phantse ibe iminxwe lukhula oluninzi lokungendawo. Ukuze uyifumane ufanele uhlale uwavulile amehlo akho ukhangela. Ukuze ububone ubuhle bayo ufanele ulususe ukhula lokungendawo nemithana enameva engabantu abaneentamo ezilukhuni ngakwimicimbi yonqulo. Ukuze uyifumane umele uzithobe.”
Siyathemba ukuba ungcelele oluthi “Ikamva Lonqulo Ngenxa Yoko Kwenzeke Kulo Kwixa Elidluleyo” luye lwabanceda abafundi bamaphephancwadi ethu ‘ukuba balususe ukhula lokungendawo nemithana enameva engabantu abaneentamo ezilukhuni ngakwimicimbi yonqulo’ ukuze bakuqonde ngokupheleleyo nangakumbi ukulunga okuhlala kuhleli konqulo lokwenyaniso.
Kodwa ukuqonda akwanele. Asikuko nokuba sihlab’ emxholweni isaci samaTshayina esithi: “Imfundiso engena ezindlebeni kodwa ingangeni entliziyweni ifana nokuphupha usitya isidlo sasemini.” Ukuze singenelwe ngokobuqu kwizinto olulunge ngazo unqulo lokwenyaniso—singaphuphi nje ngazo—kubalulekile ukuba oko sikufundayo kufikelele intliziyo yethu, kungekuphela nje iindlebe zethu.
Funda ngocoselelo ibhokisi enomxholo othi “Ukufanisa Unqulo Lwakho Njengolwenyaniso Okanye Lobuxoki.” Yandula ke uzibuze oku: ‘Ngaba ngoku ndiyavuma ukuba ngokubhekisele kubukhosi behlabathi bonqulo lobuxoki, umfo kaVoltaire wayechan’ ucwethe xa walubiza unqulo ngokuthi “lutshaba loluntu”? Ngaba ukuvandlakanya le mbali yonqulo kundincedile ekufaniseni unqulo lokwenyaniso, ibe ngaba ndiyazi ukuba lunokufumaneka phi kweli xesha sele lixhatshwe yinja kwimicimbi yabantu? Ukuba kunjalo, ngaba ndifuna ukuba njengomntu ochazwe ngumbhali wezincoko waseFransi uJoseph Joubert wenkulungwane ye-18, “ofumana kulo uvuyo lwakhe nomsebenzi wakhe”?’
Kwanga bonke abo baphendula ngokuthi ewe kule mibuzo ingentla bangaqhubeka bengenelwa ngokufunda uVukani! neempapasho ezingamaqabane akhe. Siyakumema ukuba ulandele icebiso lobulumko elinikelwe yiZion’s Watch Tower ekhankanywe ngasentla: “Musa ukwaneliseka yintyatyambo enye yenyaniso. Ukuba leyo inye ibiyanele ngezingekho ezinye. Yithi gqolo uqokelela, ufuna ezingakumbi.”
Ewe, yithi gqolo uqokelela, zingisa ekufuneni—funa iingenelo ezingakumbi zonqulo lokwenyaniso!
[Ibhokisi ekwiphepha 26]
Ukufanisa Unqulo Lwakho Njengolwenyaniso Okanye Lobuxoki
▪ Unqulo lokwenyaniso luphembelela abanquli balo ukuba babe nentambo engaqhawukiyo yothando nomanyano oloyisa imiqobo yemida yobuhlanga. (Yohane 13:35) Unqulo lobuxoki aluphembeleli uthando olunjalo. Kunoko, ngokuxelisa uKayin, amarhamente alo aphuma iphulo ukuya kubulalana kwiimfazwe zezizwe ngezizwe.—1 Yohane 3:10-12.
▪ Unqulo lokwenyaniso alugxuphuleki kwiipolitiki zabantu yaye lukhangele kuMdali ukuba acombulule iingxaki zehlabathi ngorhulumente woBukumkani bakhe. Unqulo lobuxoki lulandela umzekelo kaNimrodi owakha iNqaba yaseBhabheli. Luzifaka ngentloko kwezobupolitika, lukholosa ngoothixo bezobupolitika eligxuphuleka kwimicimbi yabo, yaye ngaloo ndlela luzakhela isiseko sentshabalalo yalo.—Daniyeli 2:44; Yohane 18:36; Yakobi 1:27.
▪ Unqulo lokwenyaniso lumgqala uYehova njengoThixo wenyaniso, ongokuphela konokusihlangula kwingcinezelo. Unqulo lobuxoki, njengolo lwaluqheliselwa kwiYiputa nakwiGrisi yamandulo, lumisela intlaninge yoonomgogwana boothixo basentsomini abangafanelekanga nje xa bebonke.—Isaya 42:5; 1 Korinte 8:5, 6.
▪ Unqulo lokwenyaniso luthembisa ubomi obungunaphakade bolonwabo emhlabeni. Unqulo lobuxoki—ngokomzekelo, ubuBhuda—lubujonga ubomi basemhlabeni njengento enganqwenelekiyo nesiza kuthi sikhululeke kuyo kubomi basemva kokufa olungaqinisekanga ngabo.—INdumiso 37:29; ISityhilelo 21:3, 4.
▪ Unqulo lokwenyaniso, ngencwadi yalo engcwele, iBhayibhile lwenza abantu babe nokholo olomeleleyo; lubanika ithemba eliqinisekileyo luze lubashukumisele kwizenzo zothando lokwenene ngoThixo nommelwane. (2 Timoti 3:16, 17) Unqulo lobuxoki, phezu kwazo nje iincwadi ezingcwele olunazo, ubukhulu becala alunamsebenzi kangako nokwenza ezi zinto.—1 Yohane 5:3, 4.
▪ Unqulo lokwenyaniso luphawulwa ngabaveleli abathobekileyo. Unqulo lobuxoki luphawulwa ngeenkokeli ezizigwagwisayo, ezingoozwilakhe, ezikulungeleyo ukugqwetha inyaniso nezifuna ukuba zizifumanele okuthile kwezobupolitika okanye kwimicimbi yehlabathi.—IZenzo 20:28, 29; 1 Petros 5:2, 3.
▪ Unqulo lokwenyaniso, oluyindlela yokuzithoba ngokufanelekileyo kuThixo, lusebenzisa ikrele lokomoya, kungekhona elokoqobo. Kwelinye icala, unqulo lobuxoki luyalalanisa kwimfundiso esisiseko yenyaniso, lusaphula ingqibelelo kwizinto ezifuna ubundilele bobuKristu, yaye luxhalabele ngakumbi izilangazelelo zabantu kunezikaThixo.—2 Korinte 10:3-5.
▪ Unqulo lokwenyaniso lushukumisa iintliziyo zabangakholwayo ukuze banqule uThixo wokwenyaniso. Unqulo lobuxoki lufaka igxalaba kwimekobume yokuthandatyuzwa kweemfundiso ezisisiseko zonqulo, yokuziqulunqela iingcamango zobuqu ngemithetho-siseko yonqulo, yokulandela ingqiqo, neyokuthi phithi zizinto zehlabathi.—Luka 1:17; 1 Korinte 14:24, 25.
▪ Unqulo lokwenyaniso, njengoko luqheliselwa ngamaNgqina kaYehova, luyachuma ngokomoya kunanini na ngaphambili. Unqulo lobuxoki, lunkone ligazi, luthwaxwa kukungondleki ngokomoya nakukuhla kwenani labantu abaluxhasayo.—Isaya 65:13, 14.
Liyintoni ke ikamva lonqulo ngenxa yoko kwenzeke kulo kwixa elidluleyo? Unqulo lobuxoki alunakamva. Phuma kulo! (ISityhilelo 18:4, 5) Phethukela kunqulo lokwenyaniso. Luya kuhlala lukho ngonaphakade.