Imbono YeBhayibhile
Ofanele Ukwazi Ngezithunywa Zezulu
“Abaphengululi bezonqulo abamalunga nama-3 000 kangangeentsuku ezine babehlanganisene eNew York kwiveki ephelileyo ukuze baphulaphule iingxelo ezingaphezu kwama-500 ezingemibandela esusela kwindima yoburharha kwiintshumayelo ukusa kwimbaluleka yenkqubo yonqulo kumaPentekoste. Akukho nabani na owakhankanya izithunywa zezulu.”—iDaily News, kaDisemba 26, 1982.
NAMHLANJE, kwiminyaka esibhozo kamva, abefundisi abakathethi nto ngezithunywa zezulu. Ngoba? Ngaba mhlawumbi aba bathunywa basezulwini bagqalwa nje njengenxalenye yentsomi yamandulo? Okanye ngaba bakho ngokwenene? Ukuba kunjalo, yintoni omele uyazi ngabo?
Ngaba Zikho?
Izithunywa zezulu ‘azingomandla’ nje kuphela okanye “iintshukumo zendalo iphela,” njengoko ezinye izithandi zobulumko zisitsho. Zikho ngokwenene ngokokude zikhankanywe izihlandlo ezingamakhulukhulu eLizwini likaThixo, iBhayibhile. Kwiilwimi zeBhayibhile zantlandlolo, amagama aguqulelwe ngokuthi “izithunywa zezulu” (mal·ʼakhʹ, ngesiHebhere; agʹge·los, ngesiGrike) ngokoqobo athetha “uthile ohambisa umyalezo” okanye ngokulula “umthunywa.” La magama abonakala phantse izihlandlo ezingama-400 kwiBhayibhile iphela, maxa wambi ebhekisela kubantu, kodwa ngokuqhelekileyo kubathunywa abangumoya.
Isithunywa sezulu esabonakala kumfazi kaManowa owayeludlolo simxelela ngokukhawulwa konyana wakhe, uSamson, sabonakala ngokwenene kuye. Kwaba njalo nangezithunywa zezulu ezithathu ezabonakala kuAbraham nomfazi wakhe uSara, nezinye ezibini ezakhupha uLote, nesinye esahlala phantsi komthi omkhulu saza sathetha noGidiyon. (Genesis 18:1-15; 19:1-5; ABagwebi 6:11-22; 13:3-21) Ngexesha lokuzalwa kukaYesu, ngequbuliso kwavela isithunywa sezulu kwiqela labalusi siphakathi kokukhanya okuqaqambileyo, nokubengezelayo.—Luka 2:8, 9.
Ezo zithunywa zezulu zazingabantu bokwenene. Zazingeyongqikelelo okanye amandla angengowamntu. Zazalisekisa injongo ezazimele ziyizalisekise njengabathunywa abavela kuThixo, yaye ezo ngxelo ziye ngokufanelekileyo zabhalwa eBhayibhileni ukwenzela ingenelo yethu namhlanje. (2 Timoti 3:16) Ngaloo ndlela, iBhayibhile ityhila iinkcukacha ezibalulekileyo omele uzazi mayela nezithunywa zezulu, ezithi ezinye zazo zingqubane neengcamango ezingokwesithethe.
Zinjani Ngenkangeleko?
Mhlawumbi usenokuba nombono wezithunywa zezulu zinjengabafazi abahle okanye njengezibothobothwana, zezidalwa ezinamaphiko ezifana nomntwana, zitsho ngoncumo oluhle zivethe ezimhlophe, zibetha iihadi ezincinane, yaye zindanda emoyeni. Ukuba kunjalo, ufanele wazi ukuba lo ngumbono ophosakeleyo ovela kwiingcamango zabahedeni, ezinjengeentsomi zamaGrike. Okanye ezo ngcamango zamkelwa emva kokuba kugqityiwe ukubhalwa kweBhayibhile. Kwimibono yeBhayibhile efuziselayo, izidalwa zomoya ezinjengeeserafi, neekerubhi zinamaphiko.—Isaya 6:2; Hezekile 10:5; ISityhilelo 14:6.
ILizwi likaThixo lizichaza izithunywa zezulu njengoomoya abanamandla kakhulu, yaye umoya awubonakali. (1 Kumkani 22:21; INdumiso 34:7; 91:11) ‘Yayisisithunywa sikaYehova’ esathi ngobusuku obunye sabulala ama-Asiriya ali-185 000 kwikampu yotshaba lwamaSirayeli! (Isaya 37:36) Xa izithunywa zezulu zathi zazibonakalisa kubantu zazisoloko zivela zingamadoda anxibe ngokupheleleyo, azizange zivele zinjengabafazi okanye abantwana zingazange zibe kwimo engaphantsi kweyomntu. Zazivela phi ezi zidalwa zomoya zinamandla? IBhayibhile ithi “zadalelwa kuye [uYesu] zonke izinto, ezisemazulwini nezisemhlabeni, ezinokubonwa nezingenakubonwa.” (Kolose 1:16) Ngalo Nyana ulizibulo, uYehova uThixo akanelanga nje ukudala izithunywa zezulu kudala ngaphambi komntu kodwa wakwazenza zazizinto eziphilayo ezingaphezulu kunomntu.—Yobhi 38:4, 7; 2 Petros 2:11.
Ngaba Zinazo Iimpawu Zobuntu?
Njengabantu, izithunywa zezulu zineemvakalelo. Emva kokubona ukudalwa komhlaba, sixelelwa ukuba izithunywa zezulu ‘zamemelela, ziduma.’ (Yobhi 38:7) IBhayibhile ikwasityhilela ukuba ‘kubakho uvuyo emehlweni ezithunywa zikaThixo ngomoni omnye oguqukayo.’ (Luka 15:10) Ngokuqinisekileyo, akukho “mandla” angengowamntu anokuba nolu vuyo lukhulu luchazwe kwezo ndinyana.
Nezithunywa zezulu zinemilinganiselo. Izibakala ezithile ezingoKristu nekamva zatyhilwa kubaprofeti abangabantu kungekhona kwizithunywa zezulu. ILizwi likaThixo lisixelela ukuba ‘ezi zizinto izithunywa zezulu ezinqwenelayo ukuqondela kuzo.’ (1 Petros 1:10-12) Mayela nomhla ochanileyo uThixo awumisileyo wokuza kweNkosi, uYesu wathi: “Kodwa akukho bani uwaziyo loo mhla nelo lixa; azazi nezithunywa zamazulu, nguBawo yedwa.”—Mateyu 24:36.
Ngoko, kwakhona, eBhayibhileni kubonakala amagama ezithunywa zezulu ezibini, uMikayeli noGabriyeli. (Daniyeli 12:1; Luka 1:26) Ngaba oku akongezeleli kubungqina bokuba zingabantu ngabanye abahlukeneyo? Njengabantu ngabanye, azizange zilungelelaniswe, njengekhompyutha okanye irobhoti, ukwenza izinto ngendlela ethile. Kunoko, izithunywa zezulu ziphiwe amandla okuqiqa yaye zinenkululeko yokuzenzela izigqibo zobuqu ngokuziphatha. Ngaloo ndlela, njengezithunywa ezinenkululeko yokukhetha indlela yokuziphatha, izithunywa zezulu ezithile zakhetha ukumvukela uThixo zaza zaba nguSathana needemon zakhe.—Genesis 6:1-4; Yuda 6; ISityhilelo 12:7-9.
Ngaba Zifanele Zinqulwe?
Nangona sisenokubuqonda njengobuyinyaniso ubukho bezithunywa zezulu, kungekhona intsomi, simele sikuphephe ukugabadela. Zimbi iintlangano zonqulo ziye zazibalaselisa ngokungafanelekanga izithunywa zezulu, nangona ukunqulwa kwezithunywa zezulu kugwetywa yiBhayibhile. (Kolose 2:18; bona ISityhilelo 22:8, 9.) Icawa yamaKatolika iye yamguqulela uMikayeli noGabriyeli ekubeni zizinto zokunqulwa. Yaye kwiicawa zobuOthodoki zaseMpuma, izithunywa zezulu zibaluleke kakhulu kwilitani (umthandazo wezicelo owenziwa ngumfundisi baze abantu bamane betshintshana ukuphendula). Okunjani kona ukungqubana nesilumkiso esanikelwa sisithunywa sikaYehova xa umpostile uYohane wawa ezinyaweni zaso, sathi: “Lumka, ungenjenjalo; ndingumkhonzi kunye nawe.”—ISityhilelo 19:10.
Kutheni le nto kukho ukudideka okungaka mayela nezithunywa zezulu? USathana, ozimilisa “okwesithunywa sokukhanya,” ‘uzimfamekisile iingqiqo zabangakholwayo.’ (2 Korinte 4:4; 11:14) Ngaloo ndlela, bekungayi kuba sengqiqweni na ukulindela ukuba abaninzi namhlanje babe bebeya kubambelela kwezabo iimbono mayela nobukho nobunjani bezithunywa zezulu kunokwamkela oko iLizwi likaThixo likutshoyo? Ewe, nangona abefundisi namhlanje besenokungathethi nto ngezithunywa zezulu, uThixo uyasiqinisekisa ngengxelo yeBhayibhile ukuba zikho ngokwenene yaye zinikela inkonzo ebekekileyo njengabathunywa bakaYehova.—Hebhere 1:7, 14; 6:18.
[Umfanekiso okwiphepha 28]
Izithunywa zezulu ezizotywe njengezidalwa ezinamaphiko ezifana nomntwana zivela kwiingcamango zobuhedeni
[Inkcazelo]
Cupid a Captive by François Boucher, c. 1754