Abantu Abaselula Bayabuza . . .

Ngaba Ndikulungele Ukubhaptizwa?

Watch Tower Society Ethandekayo:

Igama lam nguSharon kwaye ndineminyaka eli-13 ubudala. Bendisoloko ndizibuza enoba ndikulungele kusini na ukubhaptizwa. Ndicinga ukuba ndikulungele, kodwa andikaqiniseki. Ndiqinisekile namanye amaKristu aselula ayakucinga oku. Ninganceda kusini na ngokuba nibhale inqaku lokundinceda ndiqonde?

USHARON unyanisile. Eneneni ulutsha oluninzi oloyika uThixo luyacinga ngobhaptizo. KumaNgqina kaYehova, ulutsha luyaqonda ukuba lumele luzenzele esalo isigqibo sokukhonza uThixo, kwanokuba abazali balo abanako ukulenzela eso sigqibo. Luyaqonda nokuba uYesu Kristu wayalela abalandeli bakhe ukuba bafuzisele uzahlulelo lwabo kuThixo ngobhaptizo lwamanzi.​—⁠Mateyu 28:​19, 20.

Ukwenza uvumo lwasekuhleni njengomkhonzi kaThixo ozahluleleyo kuyimbopheleleko enkulu. Ngokuqinisekileyo ubungayi kufuna ukudyuduzelela kuko ukuze nje ukholise abahlobo okanye abazali bakho. Ngaphezu koko, akukho nabani ofanele akunyanzelele ekubeni ubhaptizwe. (INdumiso 110:⁠3) Noko ke, uYesu wabakhuthaza bonke ukuba ‘babale indleko’ yokuba ngumfundi wakhe. (Luka 14:28) Oku akuthethi ukuba umele ugqibe enoba uyafuna na ukuba ngumfundi kaKristu okanye akufuni. Ngokucacileyo, le yinto elungileyo ukuyenza. Noko ke, umele ukuqonde ngokupheleleyo oko kuthethwa kukuba liNgqina likaYehova.a Ngokulandelayo, ufanele ugqibe enoba ukulungele ngenene kusini na ukuthabatha le mbopheleleko.​—⁠Thelekisa IMizekeliso 20:25.

‘Ngaba Ndimdala Ngokwaneleyo?’

Njengoko abantu abakwishumi elivisayo beya bekhula, ngokufuthi baye bavakalelwe kukuba bamele banandiphe amalungelo neembopheleleko ezithile. Bayakhawuleza ukufuna ngokuzingisileyo ukuqhuba inqwelo-mafutha yentsapho, ukucela imvume yokwenza imisebenzi yasemva kokuphuma kwesikolo, ukufuna imali yenkcitho yobuqu. Kodwa xa kufikelelwa kubhaptizo, inkoliso yolutsha izingxengxezela ngelokuba iselula kakhulu okanye ayikayilungeli loo mbopheleleko. Omnye oselula ogama linguAndre uthi: “Ulutsha oluninzi lulinda de lube neminyaka eli-17 neli-18 ubudala ukuze lubhaptizwe, sele lukhulile noko.” Ngoba? “Kuba kwakudala ngaphambi koko luba sele luludala ngokwaneleyo ukuba luzenzele ezinye izigqibo.”

Ewe, isibakala nje sokuba ukwishumi elivisayo asisosingxengxezo ‘sokuba mbaxa,’ singesiso nesizathu esivakalayo sokuba ungenzi isigqibo sokuba ngumKristu. (1 Kumkani 18:21) IBhayibhile iyabongoza isithi, “Uze umkhumbule ke uMdali wakho ngemihla yobutsha bakho.” (INtshumayeli 12:⁠1) Umprofeti uSamuweli ngomnye owaqalisa ukukhonza uYehova esemncinane. (1 Samuweli 3:​1-18; 12:⁠2) Ngokukwanjalo umdumisi uDavide wayenokuthi: “Ngokuba ulithemba lam, Nkosi yam, Yehova, inkoloseko yam kwasebuncinaneni bam.”​—⁠INdumiso 71:⁠5.

Ngokufanayo, amawaka olutsha olungamaKristu namhlanje​—⁠kuquka oluthile olungaphantsi kweminyaka yeshumi elivisayo⁠—​aye azingqina enokuthenjwa ngokwaneleyo ukuba enze uzahlulelo lokukhonza uThixo. Kuyavunywa ukuba, abanye abakwishumi elivisayo abazimiselanga ibe abanankathalo kangako yaye abakakhuli ngokweemvakalelo ukuba bangenza isigqibo esinzulu njengokubhaptizwa. (IMizekeliso 22:15) Kodwa ngaba oku kunjalo ngenene kwimeko yakho? (Ngokungathandabuzekiyo abazali bakho banokuninzi abanokukutsho kulo mba.) Kungangenkankulu ukuba uThixo alindele ukuba ubani okwishumi elivisayo aqole njengomntu onama-40 eminyaka. Wazi kakuhle ukuba utyekele ‘kwiinkanuko zobutsha.’ (2 Timoti 2:22) Kodwa ukuba umdala ngokwaneleyo ukuba uzimisele ngokusengqiqweni yaye ube nokuthenjwa, ngoko kusenokuba umdala ngokwaneleyo ukuba ucinge ngokuzahlulela. Noko ke, kukho eminye imibuzo ofanele uzibuze yona.

‘Ngaba Ndizondle Ngolwazi Olwaneleyo?’

Incwadi ethi The Adolescent, ngokubhalwa nguF. Philip Rice, ithi “imbono engenabunzulu yonqulo ngokufuthi ayinakumelana nokuhlaselwa nokuvavanywa.” Kanti, uMnu. Rice uthi: “Kukho imiqondiso ethile ebonisa ukuba ulutsha lwanamhlanje alunalwazi ngokulusizi. Uhlolisiso lolwazi lweBhayibhile olwenziwa kubafundi abangamaProtestanti nabangamaYuda abakunyaka wesibini eYunivesiti lwatyhila ukungabi nalwazi ngokwenene ngeTestamente Endala neNtsha.”

Oku akumele kube njalo ngalowo ubhaptizwayo. Kuqala ubani umele ‘azondle ngolwazi’ ukuze abe ngumfundi, okanye ubani ofundisiweyo. (Yohane 17:​3, NW; Mateyu 28:19) Ngoko ngaba bekungayi kuba sengqiqweni na ukulindela ukuba ngaphambi kokuba ubhaptizwe, ubuncinane wazi “izinto ezisisiseko zemimiselo engcwele kaThixo”? (Hebhere 5:​12, NW) Oko bekuya kuquka ukwazi oko iBhayibhile ikufundisayo ngemibandela enjengomphefumlo, imeko yabafi, ukungcwaliswa kwegama likaThixo, uBukumkani nentlawulelo.

Kuyinyaniso ukuba, umele ukuba wazi okuthile ngeBhayibhile ngenxa nje yokuba ubuhamba nabazali bakho ukuya kwiintlanganiso zamaKristu. Kodwa ulwazi oluzuzwe ngolo hlobo lusenokungabi nabunzulu ibe lusenokungakwazi ‘ukumelana nokuhlaselwa nokuvavanywa.’ Umele ukulungele ukunika abanye “isizathu sethemba elikuwe.”​—⁠1 Petros 3:​15, NW.

UTerry uthi wayezikholelwa iinyaniso zeBhayibhile. Kanti uyavuma esithi: “Andizange khe ndizanelise ngokubuza eyam imibuzo ndandule ke ndiyiphendule. Kutshanje, ndiye ndaqalisa ukukwenza oku.” Ube yintoni umphumo wocwangciso olunjalo lofundisiso lweBhayibhile? “Ukholo lwam luyakhula, ibe ngoku ndizifumanisa ndikwazi ukuthetha nabantu ngenkoloseko yokwenene. Ndixelela lonke ulutsha olungamaNgqina ukuba lungoyiki ukuzibuza enoba le yinyaniso kusini na. Fumanisa ukuba yiyo na! Phanda uze ufundisise. ‘Izinto zonke zicikideni.’ Uya kwandula ke ukwazi ukuzahlulela ngentliziyo iphela kuYehova.”​—⁠1 Tesalonika 5:⁠21.

‘Abenzi Belizwi’

Phofu ke, simele sibe ‘ngabenzi belizwi, singabi ngabaphulaphuli nje.’ (Yakobi 1:22) Akunakuzinikela ukuba ubhaptizwe uze ube ‘ngumnyhwalazi’ ngokufihla iziphoso ezinzulu. (INdumiso 26:⁠4) Iziphoso ezinjalo zinokuquka ukuziphatha kakubi ngokwesini, ukunxila, ukusebenzisa kakubi iziyobisi, okanye nasiphi na kwizono ezikhankanywe kweyoku-1 yabaseKorinte 6:​9, 10. Ukuba uye waba neengxaki koku, kutheni ungalungiseleli nabazali bakho ukuba nithethe nabadala abathile abangamaKristu? Qiniseka ukuba uya kufumana uncedo lobubele.​—⁠Yakobi 5:​14, 15.

Kwakhona kusenokwenzeka ukuba kufuneka wenze iinguqulelo ezithile kwindlela obaphatha ngayo abazali bakho okanye osijonga ngayo isiluleko esivela kubadala abangamaKristu, kwanakwindlela obakhetha ngayo abahlobo. (IMizekeliso 6:20; 13:20; 1 Korinte 15:33; Hebhere 13:⁠17) Ukwenza iinguqulelo ezinjalo kusenokungabi lula kodwa iMizekeliso 11:​19 (NW) iyasikhumbuza isithi: “Omela ngokuqinileyo ubulungisa usingisa ebomini, kodwa ophuthuma ububi usingisa ekufeni.”

Ngaba uYehova ufuna ukuba ufezeke? Nakanye. IMizekeliso 20:9 iyabuza isithi: “Ngubani na ongathi, Ndiyiqaqambisile intliziyo yam, ndihlambulukile esonweni sam?” Ekubeni singafezekanga, sisatyekele ekwenzeni iimpazamo. Kodwa ngenxa yentlawulelo kaKristu, sinokuma okuhle noThixo. (1 Yohane 2:​1, 2) Ngokomzekelo, ubani oselula olwa umlo onzima nxamnye nomkhwa ombi, onjengoqheliselo olungcolileyo lokuphulula amaphambili, akamele avakalelwe kukuba ngokuyimfuneko akakufanelekeli ukubhaptizwa.b Eneneni, ngokumelana ngamandla nokungalungisi, ubani unokuyenza ivuye intliziyo kaYehova!​—⁠IMizekeliso 27:⁠11.

‘Ngaba UThixo Ndimenze Umhlobo Wam?’

Noko ke, mhlawumbi eyona mbambano ibalulekileyo ibandakanya ulwalamano lwakho noThixo. Khumbula: Uzahlulela kungekhona kumsebenzi okanye kwinto ethile, okanye kungekhona nakwintlangano, kodwa kuThixo. Ngaba uThixo ukhangeleka engowokuthelekelelwa, engengowokwenene? Okanye ngaba uye wafikelela ekumazini nasekumthandeni njengoMntu? (Eksodus 34:​6, 7) Ukuba kunjalo, uya kuzifumana uthetha naye ngokufuthi, hayi ngokuzenzekelayo, kodwa ngokusuka entliziyweni.​—⁠INdumiso 62:⁠8.

Kwakhona phantse uya kuzifumanisa unyanzeleka ukuthetha nabanye ngoThixo. (Thelekisa eyesi-2 yabaseKorinte 5:14.) IMizekeliso 15:7 ithi: “Umlomo wezilumko uhlwayela ukwazi.” Ngaba uyakwenza oku ngokushumayela rhoqo kwabanye? Okanye ngaba uvumela ukuzihlaziya, ukuzonwabisa, okanye nokunqena kukwenze urhoxobise ekuncedeni abanye bafikelele ekumazini uThixo?​—⁠IMizekeliso 19:⁠24.

Ewe, ukuze ubhaptizo lube nentsingiselo, uThixo umele abe ngoyena mhlobo wakho usondeleyo. (Thelekisa uYakobi 2:23.) Ukuba oku akunjalo ngoku, ityala asililo elikaThixo, kuba yena ngokufudumeleyo umema bonke abantu ukuba bamfune. (IZenzo 17:27) Yaye ngokuzingisa kufundisiso lobuqu, kumthandazo, nasekunxulumaneni nabantu bakhe, uya kuthi ekuhambeni kwexesha uzive usondele ngakumbi kuThixo. (Roma 12:12; 1 Timoti 4:15; Hebhere 10:​24, 25) Ubhaptizo luya kuba ngumphumo ozenzekelayo ‘wokusondela kuThixo’ okunjalo.​—⁠Yakobi 4:⁠8.

Ngokomzekelo, qwalasela intombazana eselula egama linguCindy. Ubhala esithi: “Xa ndandine-14 leminyaka ubudala ndabhaptizwa. Ndiyazi ukuba kunjani na ukuziziliza ukwenza oku. Kodwa ndifuna ukuthi kuyeyona nto imangalisayo onokuyenza. Khawuthelekelele nje, ukwazi ukuba uYehova uyakholiswa nguwe nokuba ‘akayi kukha akuyekele okanye akushiye’! (Hebhere 13:⁠5) Ukuba nabani na ebeya kundibuza enoba ufanele azahlulele na kuYehova, bendiya kuthi ewe! Kodwa oko musa ukukwenzela ukukholisa omnye umntu. Kwenze kuba ukufuna.”

[Imibhalo esemazantsi]

[Umfanekiso okwiphepha 16]

Abantu abaninzi abaselula baya kufanelekela ukubhaptizwa. Ngaba wena uyakufanelekela?