Abantu Abaselula Bayabuza . . .

Ndinokubenza Njani Abanye Bandihlonele?

“Ngamanye amaxesha xa uqalisa ukuthetha nomntu omkhulu, kuba ngathi uthetha nodonga.”​—⁠UPaul.

“Ndiyithiyile into yokuba abantu abakhulu bangakuthembi.”​—⁠UMatt.

“Abazali bam abandikhathaleli okanye basuka benze ngathi bandiphulaphule, kodwa bengandiphulaphulanga. Uthetha uthethe ude ubuze uthi, ‘Nindivile na?’ yaye baphendule bathi, ‘Mh-h-h.’ Eneneni abayazi into oyithethileyo.”​—⁠UPaula.

INTLONELO​—⁠kutheni kunzima kangaka nje ukwenza abanye bakuhlonele nokuba kukancinane? Ufuna ukuviwa, uhlonelwe. Ngoko xa abantu abakhulu​—⁠ngokukhethekileyo abazali bakho⁠—​noontanga bakho bengakukhathaleli, bezijonga iimvakalelo zakho njengezingabalulekanga, bekuthatha ngokungathi akulumkanga kangako, okanye bekukhumbuza ngesigxina sakho, kunokuba buhlungu ngenene.

Kungokwemvelo nje ukufuna ukuxatyiswa ngabanye. IBhayibhile ngokwayo isikhuthaza ukuba ‘sibe nengqiqo entle emehlweni kaThixo nawabantu.’ (IMizekeliso 3:⁠4) Yaye ulutsha olwaluhlonela uThixo kumaxesha okubhalwa kweBhayibhile lwenjenjalo. Ngokomzekelo, umfana oselula ogama linguTimoti waba nelungelo lokupheleka umpostile uPawulos kwiihambo zakhe zobuvangeli basemazweni. Kwakutheni? ‘Wayengqinelwe kakuhle ngabazalwana,’ babemhlonele. (IZenzo 16:​1, 2) Yaye kukho uYesu ngokwakhe, owathi njengoselula ‘wahambela phambili ebulumkweni nasebukhulwini, nasekuthandweni nguThixo nangabantu.’​—⁠Luka 2:⁠52.

Enyanisweni, akufani noYesu. Yaye ukuhlonelwa ngabanye akululanga ngoxa uselula. Phakathi kwezinye izinto, iBhayibhile inxulumanisa ulutsha nabantu ‘abangenamava’ nabanamandla angalawulekiyo; ukwazi nobulumko bufumaneka ebudaleni. (IMizekeliso 1:⁠4; 20:​29; Yobhi 32:​6, 7) Ngoko, ngokuqhelekileyo abantu abaluhloneli ulutsha ngendlela ababahlonela ngayo abantu abakhulu. Ngaba uthi oko akulunganga? Kusenokuba kunjalo. Kodwa yinto ekhoyo ebomini ekufuneka umelane nayo. Ngaphezu koko, ulutsha oluninzi luzenzele igama elibi. Ngenxa yoko, bambi abantu abakhulu ngempazamo bacinga ukuba lonke ulutsha “lunemvukelo,” “alukhathali,” okanye “luyageza.”

Kwamanye amazwe, amasiko, izithethe nokuguquka ngokukhawuleza kwezentlalo kuye kwawenza banzi umsantsa ophakathi kolutsha nabantu abakhulu. Ngokomzekelo, eAfrika ulutsha oluninzi lunamathuba emfundo abazali balo ababengenawo. Ngaphezu koko, lusenokuzifumana lusoloko lungquzulana nabantu abadala kunalo abalawulwa zizithethe. Abantu abakhulu badla ngokucatshukiswa kakhulu koko bakubona kungeyombeko okanye kwanemvukelo yolutsha.

Enoba imeko yakho injani na, kuya kufuneka uthabathe inyathelo lokuqala uze usebenze nzima ukuze uzuze ukuhlonelwa ngabanye. Kodwa oko kunokwenziwa.

Into Ofanele Uyizuze

Kuqala, qonda ukuba intlonelo asiyonto onokufane uthiwe jize ngayo kuba nje uyifuna, ungenako nokwenza ubani othile ukuba akuhlonele. Intlonelo yinto ofanele uyizuze. Kumaxesha okubhalwa kweBhayibhile indoda enguYobhi yayihlonelwa kakhulu kwibutho labantu eyayihlala nalo. UYobhi wathi, “Abafana abaselula babesithi gu bucala xa babendibona, namaxhego ayephakama ebonisa intlonelo kum.” Phofu ke, uYobhi wayeyifanelekela intlonelo enjalo. UYobhi wacacisa wenjenje: “Wonke ubani owandibonayo okanye weva ngam wayethetha kakuhle ngezinto endazenzayo.” Ewe, uYobhi wayenodumo olungaguqukiyo lwehambo ethe tye.​—⁠Yobhi 29:​7-17, Today’s English Version.

Ludumo olunjani oye wazenzela lona? Uye wasisebenzisa na isiluleko esanikelwa kuTimoti? UPawulos wathi: “Makungabikho namnye ubudelayo ubuncinane bakho; suka ube ngumzekelo wabakholwayo ngentetho, ngehambo, ngothando, ngokholo, ngobunyulu.” (1 Timoti 4:​12) Nawe ngokwakho unokuba ngumzekelo ofanelwe yintlonelo. Ukufundisisa iLizwi likaThixo kunokukunceda wenze ngolo hlobo. Umdumisi wathi: “Hayi, ukuwuthanda kwam umyalelo wakho! . . . Ndinokuqiqa ngaphezu kwabafundisi bam bonke, ngokuba ngezingqiniso zakho ndiyacamngca. Ndinokuqonda ngaphezu kwamadoda amakhulu, ngokuba ndizibamba iziyalezo zakho.”​—⁠INdumiso 119:​97, 99, 100.

AmaKristu okhonza nawo aya kukuhlonela ngokuqinisekileyo ukuba ubonakalisa ukuqiqa kokomoya okunjalo. Noko ke, phawula ukuba kufuneka ‘usibambe,’ okanye usisebenzise isiluleko seBhayibhile. Omnye oselula waseAfrika ogama linguCharles wawuthabatha nzulu umyalelo weBhayibhile ‘wokwenza abafundi’ yaye waba ngumlungiseleli wexesha elizeleyo xa wayeneminyaka eli-16 ubudala yaye ngoku ukhonza kwiofisi yesebe yeWatch Tower Society. (Mateyu 28:​19, 20) Umzekelo wakhe othembekileyo ekuthetheni uye wenza abanye bamhlonela yaye waphumela elonwabeni olukhulu lobuqu. Uthi: “Ubomi kule nkonzo bubangel’ umdla gqitha. Ukusebenza ngokusondeleyo namadoda ahlonel’ uThixo anamava amaninzi kuye ngokwenyaniso kwandakha. Luvuyo olungenakuthelekiswa nanto.”

Iindlela Zokuzuza Intlonelo

Enye indlela yokuzuza intlonelo kungokuba ngumzekelo ekuziphatheni. USalome, iNgqina eliselula laseAfrika ukhumbula oku ngobutsha bakhe: “Ndandingahambi nomndilili. Kunoko, ndalwa ngamandla ukuze ndigcine imigaqo yobuKristu ngawo onke amaxesha. Ndazama ukuba ngondilisekileyo, ngochubekileyo nobahlonelayo abanye​—⁠kuquka nabantwana.” Kuyinyaniso ukuba, unokugculelwa uze unxwalwe ngenxa yokuba ngowahlukileyo. (1 Petros 4:⁠4) Kodwa njengakwimeko kaSalome, abanye baya kusoloko bekuhlonela ngoxa bezibambile.

Kwakhona, phawula ukuba uSalome wenza umgudu okhethekileyo wokuhlonela abanye. Intlonelo izala intlonelo. Ngaloo ndlela amaRoma 12:​10 athi: “Mayela nembeko leyo, phangelanani.” Ukuxoka nokugqwetha inyaniso, ukunyelisa, ukwenza abanye abantu babe yintlekisa, ukuzenza ingqwayingqwayi okanye ukuntlonta​—⁠ezi ayizondlela zokuphatha abanye ngembeko. Ekugqibeleni, bayayidela imbeko abanye abakunika yona.

Kubaluleke ngokukhethekileyo ukubonisa imbeko nentlonelo kwabo basemagunyeni. (1 Petros 2:​17) Ngokomzekelo, elinye igosa laseburhulumenteni lakhe lathi: “Namhlanje kunqabile ukuba abantwana bathi, ‘Mhlekazi.’” Ubaphatha njani abo basemagunyeni​—⁠abafundisi-ntsapho, amapolisa nabaphathi besikolo? Ukuba waziwa ngokuhlonela abantu abasemagunyeni, kunokwenzeka ngakumbi ukuba abanjalo bakuphathe ngomlinganiselo othile wentlonelo.​—⁠Thelekisa uMateyu 7:⁠2.

Ukuhlonela Abantu Abakhulu

Kumasiko athile kukho imigaqo yokuziphatha ekudala ikho umntu oselula alindeleke ukuba ayilandele. Ngokomzekelo, eGhana, abantu abakhulu abaninzi abaluthandi kakhulu ulutsha oluthetha nabo lufake izandla epokothweni okanye olwenza izimbo zomzimba ngesandla sasekhohlo. Izithethe ezinjalo zentlalo zisenokubonakala zingaqhelekanga kubantu baseNtshona yaye zibe ngathi zezakudala nakolunye ulutsha lwaseAfrika, kodwa azichasekanga kumaKristu. Eneneni, iBhayibhile isikhuthaza ukuba sikuphephe ukukhubekisa abanye ngokungeyomfuneko.​—⁠2 Korinte 6:⁠3.

Isaci esiqhelekileyo eGhana sithi: “Umntwana ufanele ukususa iqokobhe lenkumba kungekhona olofudo.” Ngamanye amazwi, ezinye izinto zifanele zenziwe ngabantu abakhulu, zingenziwa lulutsha. Oku kunokubonakala njengokukudlel’ indlala nokukusingela phantsi. Kodwa ubani ovukela amasiko asekuhlaleni ngokurhwaphiliza igunya labantu abakhulu ngokuqhelekileyo uya kuba ngathi usile. Uya kuba wenze okungakumbi ukuze uzuze ukuhlonelwa ngabanye ukuba uyayazi indima yakho enganeno uze ufunde ukujamelana nayo.

IBhayibhile ithi kwiLevitikus 19:​32: “Suka ume ebusweni bengwevu, ububeke ubuso bexhego, umoyike uThixo wakho; ndinguYehova.” Xa uhamba ngezithuthi zikawonke wonke, ngaba ngokuvumayo uyabasukumela abantu abakhulu? Xa uncokola, ngaba uyayilumkela indlela othetha ngayo? Ngaba uphulaphula ngentlonelo?

Ukuzuza Intlonelo Ngeenkolelo Zakho

Ngoko, kuthekani ukuba abanye abakuhloneli ngenxa yeenkolelo zakho zonqulo? Ngokomzekelo, ulutsha oluphakathi kwamaNgqina kaYehova ludla ngokunyanzelwa ngabafundisi-ntsapho noontanga balo ukuba lube nenxaxheba kwimisitho yokuthand’ izwe nakwimicimbi yonqulo evukela imigaqo yeBhayibhile. Bengakwazi ukusiqonda isizathu sokuba ulutsha olungamaNgqina lume ngokukhalipha ngolo hlobo, abanye basenokuzicekisa iinkolelo zalo. Ulutsha olungamaNgqina lunokude lujamelane nezenzo zobutshaba.

Ngoko qwalasela indlela oselula waseAfrika esiza kumbiza ngokuba nguKwasi awayeziphethe ngayo. Uyachaza, “Andizange ndiziphephe izifundo, yaye ndandiyixhasa imicimbi eyayingaphazamisani nesazela sam. Okubaluleke ngakumbi kukuba ndakwenza ukuma kwam njengomnye wamaNgqina kaYehova kwacaca kwasekuqaleni.” Ukunyaniseka kukaKwasi, ukuzimisela kwakhe nokulandela imigaqo eqinileyo kwamenza wathandwa ngabafundisi-ntsapho nangabafundi ngokufanayo. Uyongezelela: “Maxa wambi kwafuneka ndicacise ukuma kwam​—⁠ngelinye ixesha kwinqununu nakubafundisi-ntsapho bebonke⁠—​kodwa iimbono zam zazisoloko zihlonelwa.”

Ewe, ziphathe ngendlela enokwenza abanye bakuhlonele. Ngaphandle kokunyanzelisa iinkolelo zakho kwabanye, ‘hlala ke ukulungele ukuziphendulela kumntu wonke obuzayo kuwe ilizwi, ngalo ithemba elingaphakathi kwakho, unobulali [nentlonelo enzulu, NW].’ (1 Petros 3:​15) Kuphephe ukuziphatha ngendlela enokubangela ukuba ‘ilizwi likaThixo linyeliswe.’ (Tito 2:⁠5) Oko bekuya kuquka ukuphepha isinxibo nezimbo zokuzilungisa ezigabadeleyo nokwamkela isimo sengqondo sokuzilawula okanye semvukelo.

Kakade ke, iBhayibhile ikukhuthaza ukuba ‘uvuye ebutsheni bakho,’ yaye akukho mntu ukulindele ukuba wenze izinto njengomntu oneminyaka engama-50 ubudala. (INtshumayeli 11:⁠9) Kodwa ngokuba ngumzekelo kwintetho nakwihambo yakho unokuhlonelwa uze uthenjwe ngabanye.

[Umfanekiso okwiphepha 29]

Ukuthwalela umntu omkhulu umthwalo yenye indlela eqinisekileyo yokuzuza intlonelo