Amaqhalo EsiZulu—Enza Ukuba Kuqondwe Intlalo YaseAfrika

UHLANGA lwamaZulu, oluhlala ngakunxweme lwasempuma nganeno kweleenjiko eMzantsi Afrika, luye lwazuz’ ilifa amaqhalo amnandi afundisa ngobomi baseAfrika obuqhelekileyo. Ekubeni iinkomo ezithandekayo zinendima ebalulekileyo kubomi bamaZulu, akumangalisi ukuba oko kubonakala kwiintetho zawo ezininzi.

Ngokomzekelo, qwalasela indlela umZulu aya kuwuchaza ngayo umphumo xa iinkosi ezimbini zizama ukulawula endlwini enye. Oko bekuya kuthetha intlekele njengokufaka ‘iinkunzi ezimbini kubuhlanti [kwisibaya] obunye.’ (Akukho zinkunzi zahlala ndawonye.)

Sisesezinkomeni njalo, isitshoqolo sevumba lokutshiswa kophondo emlilweni wasethafeni sitsho ngento ebophayo kuwo wonke ummandla okufutshane. Ngoko ke, ubani usenokudumzela athi xa ebona umntu oxway’ impazamo nothanda ukulwa: “Kwow, uyawatshis’ uphondo kwakhona.” (Ushis’ uphondo.)

Inkoliso yabantu ikugqala ukuzithwalela kukabani umthwalo wakhe ebomini njengophawu olunqwenelekayo. AmaZulu awahlukanga. Ngoko ke, inkonde isenokuthi: “Ufanele ujamelane neembopheleleko zakho ngokupheleleyo, ekubeni ‘kungekho ndlovu yakhe yasindwa ngumboko wayo.’” (Akundlovu yasindwa umboko wayo.)​—⁠Thelekisa amaGalati 6:⁠5.

Ukuba ubani ugagana nomkhombe ugqakadula kummandla wasentlango, eyona nto iya kuba luncedo kukukhwela emthini. Ngaloo ndlela, kukho intetho ethi: “Musa ukuthetha ngomkhombe ukuba akukho mthi ukufutshane!” (Ungakhulumi ngobhejane kungekho sihlahla eduze.) Isilumkiso seli qhalo sicacile.

Ngendlela efanayo, ukuzama ukusingatha izinto ezininzi gqitha ngaxeshanye kunokuba lilize. AmaZulu athi: “Akunakuleqa iinyamakazi ezimbini ngaxeshanye.” (Ungexoshe mpalambili.) Nabani na oye wazama ukwenza oku uya kwazi ukuba njengoko ujolise amandla akho kwinyamakazi enye, enye ifumana ikroba lokubaleka. Siyintoni isifundo soku? Yenza into enye ngexesha.

Ngokuqhelekileyo umntu oneenkani akathandwa yinkoliso yabantu. AmaZulu anendlela enongiweyo yokuchaza ngokufutshane umntu onguntamo-lukhuni ngolo hlobo xa esithi: “Ngoxa wayephekwa, kwaphekwa nelitye, yaye ilitye lavuthwa kuqala.” (Kwaphekwa yena kwaphekw’ itshe, kwavuthw’ itshe kuqala.)

Nangona engaphefumlelwanga nguThixo njengemizekeliso efumaneka eBhayibhileni, inkoliso yala maqhalo ibonakalisa imilinganiselo yokuziphatha efanelekileyo esincedayo ukuba siphumelele ebomini.​—⁠IMizekeliso 1:​5, 6.

[Umfanekiso okwiphepha 32]

UMTHI OLANDELAYO 10 KM