“OoMtyholi Bezinja”?

UKUHLASELWA kwabantu ngamabhaku angoonomasinana eKhanada, eNgilani naseUnited States kuye kwabhengezwa ngokubanzi kule minyaka iliqela idluleyo. AmaZiko Okuthintela Izifo aseUnited States anikela ingxelo yokuba abantu abangama-42 ekhulwini kwabali-157 ekuqinisekiswe ukuba bafa ngokulunywa zizinja eUnited States phakathi kowe-1979 nowe-1988 balunywa ngamabhaku angoonomasinana. EBritani amaziko eendaba aye abiza la mabhaku angoonomasinana ngokuthi “ngooMtyholi Bezinja.” Iphephancwadi iEquinox libiza olu hlobo lwenja ngokuthi “ngumatshini obalaseleyo wokubulala.”

Kumdlalo omanyumnyezi nongekho mthethweni wokuthelekisa izinja, ibhaku elingunomasinana ligqalwa ‘njengeCadillac kwizinja ezibulalayo,’ ngenxa yamandla, ukugqadaza ngamendu amakhulu, ukukhalipha nokuba neengcwangu kwalo. IThe Globe and Mail yaseToronto, eKhanada, ithi ‘ibhaku elingunomasinana liye lakhuliselwa ukubulala ezinye izinja.’

IThe Toronto Star ithi, “Imihlathi yalo ebamba iqinise inokubangela umonakalo omanyumnyezi kwezinye izilwanyana nabantu, ngokukodwa abantwana, abangenako ukuzikhusela.” Iingxelo ezihambis’ umzimba zokuhlasela kwawo ziquka eyentwazana eneminyaka elithoba ubudala ekwafuneka ukuba yenziwe utyando lokulungisa ulusu lobuso bayo nolwathabatha iiyure ezintlanu emva kokuba idlavulwe libhaku elingunomasinana. One-13 leminyaka ubudala kwafuneka anyangwe ngenxa yokulunywa ebusweni, ezingalweni, emilenzeni, emphakathweni nasezimpundwini. Omnye umbonisi weempahla oneminyaka engama-21 ubudala waba namanxeba amabi ebusweni, nto leyo yabangela ukuba abe nemithungo emalunga nama-70, xa ibhaku elingunomasinana lomhlobo wakhe lasabela ngokumqwenga kwilinge lakhe lokulincamisa. ENgilani indoda eneminyaka engama-54 ubudala yadlavulwa ngaba “Mtyholi Bezinja” ababini baza bemka nempumlo yayo.

UKathleen Hunter, umalathisi ongusomaqhuzu kuMbutho Wezoluntu eToronto, wakhe wakholelwa ukuba xa ibhaku elingunomasinana liqeqeshwe kakuhle lingafana nje nayo nayiphi na enye inja efuywayo. Noko ke, ngoku uyavuma ukuba “ibhaku elingunomasinana lineeseli zemfuza ezilenza libe sisilwanyana ongenakuqiniseka ngoko siza kukwenza ngokulandelayo. Ngokwenene iyinja eneengcwangu . . . , enokuhlasela ingaxhokonxwanga.”a Umphathi-jikelele wecandelo lokunyamekela izilwanyana kwiSebe Lezempilo Likawonke wonke eToronto, uJim Bandow, uthi: “Ibhaku elingunomasinana yibhombu ethiyiweyo. Akunakuqiniseka ukuba iza kudubula nini.”

Abaqulunqi bemithetho bazama ukucombulula le ngxaki ngokusungula nokunyanzelisa ukugcinwa kwemithetho eyahlukahlukeneyo. Abantu abafuye amabhaku angoonomasinana e-Edmonton, eKhanada, bafanele babe neinshorensi yokubekek’ ityala ubuncinane ezii-R1 375 000 baze bahlawule nemali yelayisensi engama-R275. EWinnipeg, eKhanada, akukho mabhaku angoonomasinana angakumbi avunyelweyo phakathi esixekweni, kwaye abo banawo bamele bawatsale ngebhanti yaye bawabophe imilomo baze babonise nobungqina bokuba banayo i-inshorensi ezii-R825000 yokubekek’ ityala. IPalamente yaseBritani yawisa umthetho onemiqathango efanayo kubantu abafuye amabhaku angoonomasinana. Ukwaphula lo mthetho kunokuphumela ekuhlawulisweni imali nesigwebo sasentolongweni.

NgokoMthetho kaThixo awawunika amaSirayeli mandulo, izilwanyana ezinobungozi zazimele zihlale zivalelwe. Ukuba isilwanyana esinobungozi sasiyekwa sibhadule, nalowo usifuyileyo wayebekek’ ityala ngomonakalo esasiwenza. Ukuba eso silwanyana sasinokubulala umntu, umniniso wayeya kuba netyala legazi, ibe oko kwakungamphulukanisa nobomi bakhe. (Eksodus 21:​29) Ngenxa yoko kuthethwe kuMthetho kaThixo, bekungaba likhondo lobulumko ngamaKristu ukuthabatha amanyathelo ayimfuneko okuzivalela izinja ezineengcwangu nongenakuqiniseka ngoko ziya kukwenza okanye agqibe kwelokuba angazifuyi.

[Umbhalo osemazantsi]