Imbono YeBhayibhile
Imithandazo—Ngaba Ifanele Icengcelezwe Okanye Isuke Entliziyweni?
INQWELO-MOYA enkulu yabhabha phezulu kumphakamo oziimitha ezili-12 500. Ezantsi yayingamanzi abandayo ePasifiki. Ngequbuliso, enye injini yayeka ukusebenza. Zaza ezinye iinjini ezintathu zaphelelwa ngamandla. Inqwelo-moya yehla impumlo ijonge ezantsi kangangeekhilomitha ezili-shumi ngemizuzu emibini! Kodwa kwiimitha ezingama-2 700 le nqwelo-moya yaphinda yafumana amandla yaza yaya kuhlala ngokukhuselekileyo eSan Francisco. Omnye wabo babekhwele apho wavakalisa la mazwi ngesingqala: “Ndathandaza ngamandla kunalo nangaliphi na ixesha ebomini bam.”
Ngamaxesha entlekele, engozi, okanye osizi olunzulu, abantu abaninzi, kwanabo bangengabonqulo oluthile, bafuna uncedo lukaSomandla. Ngokwahlukileyo koko, ngokuthe rhoqo abantu bonqulo bacengceleza imithandazo ecwangcisiweyo ezicaweni nasezitempileni okanye emakhaya. Ngoncedo lweerosari, abaninzi bacengceleza imiThandazo yeNkosi noMakadunyiswe uMariya. Abanye basebenzisa iincwadi zemithandazo. Izigidi zabantu baseMpuma zijikelezisa amavili anemithandazo ngaphakathi njengendlela yokuphindaphinda imithandazo ngokukhawuleza.
Ngaba wakha wazibuza oku, ‘Sifanele sithandaze njani? Ngaba imithandazo ifanele icengcelezwe okanye isuke entliziyweni?’
Oko Umthandazo Ukuko
Masithi utata wakho omthanda kakhulu, ohlala kwelinye ilizwe, ukukhuthaze ukuba umtsalele umnxeba nanini na unqwenela—ngaphandle kokuhlawula imali. Ngaba ubungayi kumtsalela umnxeba rhoqo? Ngaba ubungayi kukuvuyela ukulondoloza, ude womeleze, ulwalamano lwenu oluxabisekileyo? Ngaba ubungayi kumxelela izinto ezikuxhalabisayo uze uvakalise umbulelo wakho onzulu ngalo naluphi na uncedo nokhuthazo aye wakunika lona ebudeni bobomi bakho? Olo lwalamano lobuqu beluya kuba loluxabiseke kakhulu kuwe, akunjalo na?
Xa umtsalela umnxeba, ubusenokuyikhankanya ngokuphindaphindiweyo eminye imicimbi, kodwa ubungasayi kumfundela encwadini oko ufuna ukumxelela kona okanye uphindaphinde into enye, ngaba ubuya kwenjenjalo? Ngoko, nomthandazo womKristu ubungayi kuba njalo. Enyanisweni, uYesu Kristu wathi imithandazo ayifanele ibe njalo.
Wathini UKristu Yesu?
“Nithandaza njalo ke, maningenzi milembelele ingeyanto njengabeentlanga; kuba beba boviwa ngenxa yamazwi abo amaninzi.”a (Mateyu 6:7) Ezinye iinguqulelo ziyibeka ngolu hlobo: “Kwimithandazo yenu, musani ukubhibhidla njengabahedeni.” (The New English Bible) “Xa nithandaza musani ukwenza imfumba yamazwi angento njengokuba abeeNtlanga besenza.”—Revised Standard Version.
Abanye abantu babhidanisa imilembelele nokuhlonela uThixo, ukutyibilika nentlonelo, yaye bathi uphindaphindo nobude buqinisekisa ukuphendulwa. Noko ke, uThixo akalinganisi ixabiso lomthandazo ngobude bawo. Ngokucacileyo, uYesu akazange afune ukuba abalandeli bakhe balandele umgca wempuku okanye bacengceleze imithandazo. Ngenxa yoko, zinaliphi ixabiso elihlala lihleli iirosari, iincwadi zemithandazo okanye amavili emithandazo?
Emva kokuba ethethe okungasentla, uYesu waqhubeka enika abafundi bakhe umthandazo ongumzekelo—uMthandazo weNkosi owaziwayo. (Mateyu 6:9-13) Kodwa ngaba injongo yakhe yayikukuba baqhubeke belinganisa loo mazwi manye? Akunjalo. Enyanisweni, xa waphinda wawubethelela emva konyaka, noYesu Kristu akazange asebenzise amazwi afana ncam nalawo. (Luka 11:2-4) Ngaba ikho ingxelo yokuba amaKristu okuqala akwenza oko okanye ayecengceleza eminye imithandazo? Kwakhona, akunjalo.
Ngaba oko kuthetha ukuba asinakuyikhankanya ingongoma okanye isicelo esinye amaxesha amaninzi? Akunjalo konke konke, kuba uYesu wakwathi: “Qhubekani nicela, yaye niya kuphiwa; qhubekani nifuna, yaye niya kufumana.” (Mateyu 7:7, NW) Kusoloko kuyimfuneko ngathi ukuba senze isicelo esikwasinye amaxesha amaninzi. Ngaloo ndlela uYehova ubona indlela esinyaniseke ngayo kwizicelo zethu nendlela esivakalelwa nzulu ngayo ngombandela lowo.
Ngokomzekelo, kwinkulungwane yesihlanu Ngaphambi kweXesha Eliqhelekileyo, kwakukho indoda ethile eyayingomnye wamaYuda awathinjelwa eBhabhiloni neyayizinikele elunqulweni egama linguNehemiya. Yayingumngcamli wasebukhosini wokumkani wamaPersi. Xa yaxelelwa ukuba abazalwana bayo, abemi bakwaYuda, babetsala nzima, yabathandazela “imini nobusuku” ukuba bakhululeke. (Nehemiya 1:6) Imithandazo yayo yaviwa. UYehova washukumisela umlawuli wamaPersi owayenovelwano ukuba anike uNehemiya imvume yokuba athabathe uhambo oluya eYerusalem ukuze aye kulungisa imicimbi. Wakwenza oku, ukuze avuyise abantu bakhe nokuze alondoloze ukholo lwabo.—Nehemiya 1:3–2:8.
Indlela Umthandazo Osuka Entliziyweni Onceda Ngayo
Nangona engaMandla Aphakamileyo kwindalo iphela, uYehova umema “abantwana” bakhe ukuba basondele kuye ngentliziyo epheleleyo. Umfundi kaYesu uYakobi wathi: “Sondelani kuye uThixo, wosondela kuni.” (Yakobi 4:8) Kodwa ungakwenza njani oku? Kaloku, simele sithandaze egameni likaYesu. (Yohane 14:6, 14) Ngaphezu koko, kunjengokuba uPawulos wathi: “Lungekho ukholo, akunakubakho ukumkholisa kakuhle; kuba lowo uzayo kuThixo, umele kukukholwa ukuba ukho, nokuba ungumvuzi wabo bamfunayo.”—Hebhere 11:6.
Abo baneengxaki, kwanabo baye benza izono ezinzulu, basenokucela baze bafumane uncedo nokuxolelwa. UYesu wakuzekelisa oku ngebali lakhe lenkokeli yonqulo eyathi, xa yayithandaza, yabulela uThixo kuba yona yayingcwele kunabanye; kodwa umbuthi werhafu (owayethiyiwe nowayegqalwa njengomenzi wobubi obunzulu ngaloo mihla) ngeliphandle wathi: “Thixo, yiba netarhu kum, mna moni.” Ngokuqinisekileyo, loo mthandazo ulula nosuka entliziyweni awuzange uphume encwadini. Yaye uYesu wamgweba loo mhanahanisi wonqulo kodwa wathi ngomnye: “Ozithobayo ke uya kuphakanyiswa.”—Luka 18:10 -14.
Iindlela ezimbi zehlabathi zokwenza izinto zibangela ukuba abaninzi bakhathazeke yaye badandatheke. AmaKristu asenokude akhathazeke ngokuma kwawo phambi koThixo. Kodwa ukuphethukela kuYehova ngokuthe rhoqo, ngamaxesha ngamaxesha nangokusuka entliziyweni ukuze ufumane uncedo kusenokukwenzela imimangaliso. UPawulos wabhala oku: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:6, 7.
Ukukhunga kuthetha isibongozo esinyanisekileyo, ukubongoza uThixo ukuba asinike uncedo, sizityand’ igila kuye njengokuba umntwana ebeya kwenjenjalo kumzali wakhe onothando gqitha noqondayo. Imithandazo enjalo ayiphumi ezincwadini, yaye ayiphindaphindwa ngendlela yobukhwenene. Iphuma ezintliziyweni ezifuna uncedo nezinokholo lokwenene kuYehova, ‘uMphulaphuli wemithandazo.’—INdumiso 65:2.
[Umbhalo osemazantsi]
a Igama eliguqulelwe ngokuthi “ukwenza imilembelele engeyanto” (bat·ta·lo·geʹo) lisetyenziswe kanye kuphela eBhayibhileni yaye lithetha “‘ukubhibhidla’ ngengqiqo yokuzama ukufumana impumelelo emthandazweni ngokwenza imfumba yemilembelele.”—Theological Dictionary of the New Testament.
[Inkcazelo Ngomfanekiso okwiphepha 12]
Drawings of Albrecht Dürer/Dover Publications, Inc.