Khetha Ubomi Kwelo Hlabathi Litsha
KUCACE mhlophe ukuba uThixo wayenenjongo ngokudala esi sijikelezi-langa singenakuthelekiswa nanto sincinane nesixabisekileyo. Yaye wamisela ukuba uluntu lube nendima ebalulekileyo kuloo njongo. (Isaya 45:18) Imeko engaginyisi mathe umhlaba wethu ogaxeleke kuyo ayizisi zuko kwaphela kuThixo. Kodwa ngaba ngokwenene ukholelwa kwelokuba uya kuyiyeka le meko iqhubeke? Nakanye!
Ukulangazelela koluntu ihlabathi elitsha ngokwenene kuvisisana nokunqwenela into uluntu olwakhe lwanayo. Loo nto yayiyiparadisi esemhlabeni yokwenene nebonakalayo. Isibini sokuqala esingabantu sabekwa kwelo khaya, yaye yayiyinjongo yantlandlolo yoMdali ngoluntu ukuba lunandiphe loo mhlaba uyiParadisi ngonaphakade.—Genesis 1:28.
UYehova uThixo ngoku ukuthembisa ngethuba lokufumana ubomi kwihlabathi lakhe elitsha, apho aya kusikelela abantu abathembekileyo neminqweno yeentliziyo zabo. (INdumiso 10:17; 27:4) Ngaba uya kukhetha ukuphila apho?
Ufanele Ukhethe
AmaSirayeli awayephulaphule intetho yokugqibela kaMoses kwafuneka enze isigqibo esifanayo. Kwakufuneka ekhethe phakathi kokulawulwa nguThixo okanye zezo ntlanga zexesha lawo. Nali icebiso likaMoses: “Ndibeke phambi kwenu ubomi nokufa, . . . nyula ke ubomi, ukuze uphile, wena nembewu yakho; ukuba umthande uYehova uThixo wakho, uliphulaphule ilizwi lakhe, unamathele kuye.” (Duteronomi 30:19, 20) Ewe, ukhetho lwakho lukwangumbandela wobomi nokufa.
Kungenxa yesi sizathu le nto kuye kwapapashwa la manqaku angehlabathi elitsha likaThixo—nokuze achukumise intliziyo yakho ukuze ukhethe lona kunokubeka ithemba lakho kwizithembiso ezingamampunge zabantu zokwenza ihlabathi elitsha. Zininzi izinto ezimangalisayo ekusafuneka uzifundile ngehlabathi elitsha likaThixo.
Ngokomzekelo, bubuphi ubungqina obukhoyo bokuba eli hlabathi litsha lisondele? Liya kubathabathel’ indawo njani bonke oorhulumente bomhlaba? Ziziphi iziganeko eziya kukhokelela kulo? Sinokuqiniseka njani ukuba oko iBhayibhile ikuthembisayo kuya kuzaliseka?
Iimpendulo kule mibuzo neminye engakumbi ziyafumaneka. AmaNgqina kaYehova angakuvuyela ukukubonisa iindinyana ezithile kumbhalo wakho weBhayibhile ezingachazi nje kuphela iintsikelelo zehlabathi elitsha kodwa ezikwabonisa ixesha nendlela urhulumente kaThixo aluqalisa ngayo ulawulo lwakhe aze ekugqibeleni anabisele ulawulo lwakhe ukuba lulawule wonke umhlaba.
Ubongozwa ukuba usabele njengamaBhereya enkulungwane yokuqala awayephulaphule umpostile uPawulos. Achitha ixesha “ezincina izibhalo imihla ngemihla, ukuba zingaba zinjalo na ezi zinto.” (IZenzo 17:11) Kububulumko ukuba nawe wenjenjalo. Qiniseka ukuba iingxubusho zakho zeBhayibhile namaNgqina kaYehova ziya kukuzisela ulwaneliseko olukhulu ngokomoya njengokuba ufunda ngekamva elichwayitisayo uThixo asithembisa lona.
Kufuneka wenze ukhetho—enoba lelokukhonza uThixo kunye nezilangazelelo zorhulumente wakhe woBukumkani okanye ukuba nentembelo uze uthembe imigudu yoluntu yokuzilawula. Siya kukhuthaza ukuba ufundisise kangangoko unako ngamadinga kaThixo ukuze usazi kakuhle isigqibo sakho. Ukuzuza ulwazi lweBhayibhile akuyi kuphelela nje ekomelezeni ithemba lakho ngekamva kodwa kuya kukunceda uhlale uphilile ngokomoya kude kuse ekupheleni kolawulo lomntu.—2 Timoti 1:13.
Iminyaka emininzi yokulangazelela komntu ihlabathi elitsha iya ekupheleni. AmaNgqina kaYehova afuna ukuba ufumane ilungelo lokungena kwelo hlabathi litsha uze unandiphe ubomi ngonaphakade. NoThixo ufuna oko. Ngokunyanisekileyo sinqwenela ukuba ukhethe ihlabathi elitsha likaThixo. Ukuba wenjenjalo, ngoko uya kubona ukuba ukulangazelela kwabantu ihlabathi elitsha kwakungelolize.