Kokuphi Ukuzonwabisa Omele Ukukhethe?

UKUBA nembono elungeleleneyo ngokuzonwabisa kuyenye into. Ukubonakalisa ukulungelelana kuhlobo lokuzonwabisa esilukhethayo kuyinto eyahlukileyo. Kulula ukubona ukuba ukuzonwabisa kunendawo yako, kodwa xa kukuninzi akuloncedo yaye kuyinkcitha-xesha kuphela. Sekunjalo, mihla le kufuneka senze izigqibo​—⁠yaye azisoloko zilula.

Njengokuba sesibonile, imizi-mveliso yezinto zokuzonwabisa ayenzi kube lula ukwenza izigqibo. Kukho ukudideka kuludwe lwezinto emazikhethwe, kodwa kangangamawaka eminyaka, iBhayibhile iye yanika abantu abantliziyo zinyanisekileyo ulwalathiso abalufunayo. Ubugcisa banamhlanje abukhange buyenze imigaqo yeBhayibhile ibe yephelelwe lixesha; ngokwahlukileyo koko, iluncedo kakhulu yaye iyimfuneko kula maxesha aneengxaki kakhulu kunanini na ngaphambili. Ngoko makhe siqwalasele indlela esinokuyisebenzisa ngayo loo migaqo xa kufikelelwa kumbandela weenkalo ezimbini ezinobungozi zokuzonwabisa​—⁠uhlobo lokuzonwabisa nexesha okulityayo.

Luyintoni Ulwalathiso LweBhayibhile?

Oselula uzibulele, yaye kufunyaniswe ukuba wayebandakanyeke kakhulu kuhlobo oluthile lomculo werock onesingqi esinamandla owawukhuthaza ukuzibulala. Intombazana eneminyaka eli-14 ubudala inkule ngegqudu unina de lahlanz’ iselwa, yaye kubonakala ukuba nayo yayithe phithi lolu hlobo lomculo. Inkwenkwe eneminyaka eli-15 ubudala ibulale ibhinqa elithile, yaye igqwetha layo lithi yayiphenjelelwe yimifanekiso eshukumayo ebonisa ubundlobongela obunenkohlakalo. Kuvela umfanekiso oshukumayo obonisa ubundlobongela bamaqela eenjubaqa, yaye kuqalisa imilo phakathi kwamaqela eenjubaqa kanye phakathi kuloo holo yemiboniso nakwimigca yabalindele umfanekiso oshukumayo.

Kucacile ukuba, uhlobo lokuzonwabisa esilukhethayo lunempembelelo kuthi. Zimbi iingcali zisenokuzibetha ngoyaba ezi ngxelo zingasentla njengezibubungqina obuthandabuzekayo. Noko ke, imigaqo yeBhayibhile icacile kule ngxaki. Ngokomzekelo, qwalasela la mazwi anobunzulu: “Ohamba nezilumko uba sisilumko naye; ke olikholwane lesidenge uya konakaliswa.” (IMizekeliso 13:​20) Ngaba okunye ukuzonwabisa akufani noko​—⁠ukuhamba, okanye ukunxulumana, nabantu abazizidenge, okanye abangenangqiqo ngokokuziphatha? Ngokufanayo, eyoku-⁠1 kwabaseKorinte 15:​33 (NW) ithi: “Musani ukulahlekiswa. Unxulumano olubi lonakalisa imikhwa elungileyo.” Akukho nto ingacacanga apha, akukho ngcali enokuphikisa naliphi na igama. Lo ngumthetho wemvelo yoluntu. Ukuba sinxulumana rhoqo nabo baziphethe kakubi, imikhwa yethu iya konakala.

Imigaqo elolo hlobo iluncedo ngokufanayo xa kufikelelwa kumbandela wokunqula imidlalo, imifanekiso eshukumayo, umabonwakude neemvumi ezaziwayo. Nangona abadlali abaziwayo ngokufuthi bekhuthaza ugonyamelo nokuziphatha okubi, kwizinto abazenzayo nakubomi babo, sekunjalo kuyabonakala ukuba abalandeli babo​—⁠ngokukodwa abaselula⁠—​bayabanqula. Iphephandaba iThe European kutshanje lathi: “Iingcali kwezentlalo yoluntu ziphawula ukuba kwibutho lehlabathi elandayo iimvumi ezaziwayo zisenokuba zizalisekisa indima unqulo olwalukhe lwanayo kubantu abaselula.” Kodwa phawula oko kuthethwa yiNdumiso 146:⁠3: “Musani ukukholosa ngamanene, ngonyana womntu, yena ungenalo usindiso.” Yaye IMizekeliso 3:​31 ithi: “Musa ukuyimonela indoda egonyamelayo, unganyuli nanye kwiindlela zayo.”

Nanku omnye umgaqo oyintloko: Xa esenza isigqibo, amaKristu afanele aqwalasele imiphumo kungekuphela nje kwiziqu zawo kodwa nakwabo bakwibandla lamaKristu, kuquka nabo banezazela eziethe-ethe. (1 Korinte 10:​23-33) Kwelinye icala eliyingenelo, imigaqo yeBhayibhile ikwasinceda sizibekele imilinganiselo yokuzonwabisa esimele siyikhethe ngokukhuselekileyo. Umpostile uPawulos wanikela esi siluleko: “Elokugqiba, bazalwana, ndithi, iinto zonke eziyinene, iinto zonke ezindilekileyo, iinto zonke ezibubulungisa, iinto zonke ezinyulu, iinto zonke ezithandekayo, iinto zonke eziludumo lulungileyo, ukuba kukho sidima, ukuba kukho ndumiso, zithelekeleleni ezo zinto.”​—⁠Filipi 4:⁠8.

Le migaqo iye yalathisa abantu bakaThixo kangangeenkulungwane. KwiRoma yamandulo amaKristu akuzange kufuneke abe nemithetho engqalileyo ewachazela ukuba imidlalo yokulwa, equka ukubulalana ngenkohlakalo, yayingekokuzonwabisa kufanelekileyo. Bavela basebenzisa imigaqo enjengale ingasentla baza ngaloo ndlela bakhusela bona, iintsapho zabo namabandla abo.

Indlela Yokukukhetha

AmaKristu okwenyaniso enza okufanayo namhlanje. Xa ekhetha ukuzonwabisa, aqala ahlolisise uhlobo lwako olungokokuziphatha. Akwenza njani oko? Ngokomzekelo, ngaphambi kokuthenga icwecwe bahlolisisa iqweqwe lalo. Lo mculo ubhengezwe njani? Ngaba uphakamisa imilinganiselo yokuziphatha okubi? Intiyo? Imvukelo? Umsindo? Isini nobuqhinga? Maxa wambi amazwi engoma aye afumaneke ukuba angahlolwa. Ngokufanayo, amaqweqwe eencwadi aye ashwankathele imibandela ekuzo, yaye maxa wambi ide ihlalutywe. Imifanekiso eshukumayo nayo isoloko ihlalutywa kumaphephandaba asekuhlaleni namaphephancwadi. Kwamanye amazwe kubakho inkqubo yokuhlolisisa imifanekiso eshukumayo esenokukunceda ikunike ulwalathiso. Kucacile ukuba, ukuba ihlabathi lanamhlanje eliziphethe kakubi liyakwazi ukufumanisa uhlobo oluthile lokuzonwabisa lubalaselisa isini ngokugqithe emgceni, lunokuziphatha okubi, okanye lunobundlobongela, kunzima ukucinga ukuba umKristu ebeya kwenza okungaphantsi koku aze ngokuvumayo alufake engqondweni yakhe nasentliziyweni yakhe.

Kwelinye icala, uKumkani uSolomon olumkileyo walumkisa wathi: “Musa ukuba lilungisa ngokukhulu, ungabi sisilumko ngokugqithiseleyo; yini na ukuba uziphanzise?” (INtshumayeli 7:​16) Ukuziva ulilungisa ngokukhulu kulula kakhulu ukuba kube ngumgibe xa kufikelelwa kumbandela wokuzonwabisa. Sisenokuziva siqinisekile ngokhetho esilwenzileyo, sada sahlolisisa nemigaqo yeBhayibhile ngenyameko nangomthandazo. Sekunjalo, sisenokufumanisa ukuba abanye abaphila ngemigaqo efanayo bagqibe ukuba benze okwahlukileyo. Musa ukukuvumela ukuba oko kukuphange uvuyo. Ngamnye wethu ubophelelekile ngokhetho lwakhe.​—⁠Galati 6:⁠4.

Kungakanani Xa Kukokugqith’ Emgceni?

Umlinganiselo wenkqubo yeli hlabathi awulungelelananga ngokoyikekayo kumbandela wexesha elinikelwa ekuzihlaziyeni. Ngokomzekelo, inqaku lomhleli lakutshanje kulindixesha wezoshishino iParks & Recreation wakubiza ukuzihlaziya ngokuba “kuyeyona ndlela yokuphila.” Ngokufanayo, iThe New York Times Magazine kutshanje yathi ngobusuku bangoMgqibelo, obubobona busetyenziselwa ukuzihlaziya: “Xa ubala, kukho iintsuku ezininzi zeveki ebomini bethu kunobusuku bangoMgqibelo, kodwa ubusuku bangoMgqibelo bobona benza ubomi bube nentsingiselo.” Kwakhona ezinye iingcali ngentlalo yoluntu zithi kumazwe ehlabathi afumileyo, abantu ngoku bathanda ukuzihlaziya, nonqulo ngokwalo luyenye into abayicinga xa bengenanto yokwenza.

AmaKristu awamangaliswa koku kugqwetheka kwezinto eziza kuqala. Kude kudala iBhayibhile yaxela kwangaphambili ukuba ‘kule mihla yokugqibela’ inomngcipheko, abantu baya kuba “ngabazithandayo, . . . abathandi beziyolo kunokuba bathande uThixo.” (2 Timoti 3:​1-⁠4) Kodwa imigaqo yeBhayibhile iyasinceda ukuba sibeke izinto zethu eziza kuqala kwindawo yazo efanelekileyo. Kunjengokuba uYesu wathi, “uze uyithande iNkosi uThixo wakho ngentliziyo yakho iphela, nangomphefumlo wakho uphela nangengqondo yakho iphela, nangamandla akho ephela.” (Marko 12:​30) Ngoko ke, kubantu bakaThixo, uthando lwabo ngaye luza kuqala ebomini. Kunokuba banikele ixesha labo lobulungiseleli bobuKristu kwizinto zokuzihlaziya, luyeyona nto iza kuqala. Kwanomsebenzi wabo wempangelo uxhasa olo khetho lufanelekileyo.​—⁠Mateyu 6:⁠33.

Ngoko kumbandela wokuzonwabisa, umKristu umele abale iindleko, ahlolisise ixesha eliya kuthatyathwa kuko xa kuthelekiswa nelo kufanele kulithabathe. (Luka 14:​28) Ukuba ukwenza naluphi na uhlobo lokuzonwabisa kuya kuthetha ukutyeshela izinto ezibalulekileyo, ezinjengesifundo seBhayibhile sobuqu okanye sentsapho, ixesha nabo nikhonza kunye nabo, ubulungiseleli bamaKristu, okanye iimbopheleleko ezibalulekileyo zentsapho, ngoko akufanelekanga.

Oko Ukhetho Lwakho Lukutyhilayo Ngawe

Umlinganiselo wexesha esilinikela ekuzonwabiseni uya kubonisa okuninzi ngezinto eziza kuqala kuthi, njengohlobo lokuzonwabisa esilukhethayo luya kutyhila okuninzi ngokuziphatha kwethu nokunyaniseka kozahlulelo lwethu. Ukhetho lwethu luya kuchazela abanye ekuhlaleni ngohlobo lwabantu esilulo, izinto esizixabisileyo. Ukhetho lwethu luya kuchazela abahlobo bethu, iintsapho zethu nebandla enoba silungelelene okanye singqongqo, sinyanisekile okanye singabahanahanisi, singamalungisa okanye singamalungisa ngokukhulu kusini na.

Izigqibo zakho zimele zibonakalise izinto ozikholelwayo nozixabisayo nezo zentsapho yakho, ekubeni uphambi koMdali, ohlolisisa iintliziyo neentshukumisa zethu sonke. AmaHebhere 4:​13 athi: “Akukho sidalwa singabonakaliyo emehlweni akhe; izinto zonke ke zize, zityhilekile emehlweni alowo sinokuthanani naye.” NguThixo kuphela onokuyibona impendulo kumbuzo oqulethwe ngulo mbandela: Ngaba ngokwenene siya kwalathiswa yimigaqo yakhe kuzo zonke iinkalo zobomi?

[Umfanekiso okwiphepha 8]

Ukuzonwabisa okukhethayo kutyhila okuninzi ngawe nentsapho yakho

[Umfanekiso okwiphepha 9]

Ngaba ukuphaphele oko ukubukelayo, ukuphulaphulayo nokufundayo?