Imbono YeBhayibhile
Isizathu Sokuba Intetho Engamanyala Ingawafanele AmaKristu
UMSASAZI weenkqubo zikanomathotholo weBBC Wales wakhalinyelwa ngokwala ukukhupha “amagama angcolileyo” kudliwano-ndlebe nefanasini elathi, ngokutsho kwesithethi seBBC esasicatshulwe kwiphephandaba elithi The Guardian, lasebenzisa “intetho ebole ngokugqithiseleyo echaza izenzo ezisenokubangela ukuba ubani abe noGawulayo.” Ukongezelela koko, ama-22 ekhulwini eenkqubo ezibukelwayo kuhlolisiso lweeveki ezimbini kumajelo amane kamabonwakude waseBritani ziqulethe “intetho ebolileyo, ukuthuka [ukuqalekisa] kunye/okanye izinyeliso.”
Iindaba ezinjalo zibonisa ukuchasana kokwenene kwezimo zengqondo. Kubantu abaninzi incoko ezaliswe yintetho engamanyala iyothusa yaye iyakhubekisa. Abanye bayibetha ngoyaba intetho enjalo beyigqala njengenongiweyo nengaphucukanga, bengazixhalabisi kangako ngayo. Noko ke, ngaba intetho engamanyala ifanele ifunyanwe kwintetho yamaKristu, aluxabisayo ulwalamano lwawo noThixo nabazalwana bawo?
Kutheni Ixhaphake Kangaka?
Intetho engamanyala “ilulo naluphi na uhlobo oluqhelekileyo lwentetho engcolileyo.” Izinyeliso, iziqalekiso nokuthuka zingumgubo wengxow’ enye nale nkcazelo. Iintetho ezingamanyala zivakalisa umsindo, kwanogwebo olunyelisayo. UMary Marshall, umbhali wencwadi ethi Origins & Meanings of Oaths & Swear Words, uthi “izifungo nezithuko kwintetho ethethwayo zininzi ngakumbi kunentetho yokwenene.” Sekunjalo, iincwadi zamabali ezininzi zizaliswe ziintetho ezingamanyala.
Kutheni intetho engamanyala ixhaphake kangaka? Abanye abantu abanesigama esilinganiselweyo basenokuvala eso sikhewu ngokusebenzisa izithuko ezininzi. Abanye babhenela kwintetho embi ukuze bagxininise okuthile. Xa ichazwa, intetho engamanyala ngokufuthi inxulunyaniswa neemvakalelo zokucaphuka, unxunguphalo nomsindo. Enyanisweni, xa bejamelene neemeko ezilingayo, abaninzi bavumela isithuko ukuba siphume kwimilebe yabo “njengekroba . . . leemvakalelo ezivalelweyo.” Umphandi uMarshall uthi ikhadi lakhe lesalathiso elihamba ngokoonobumba lezithuko zesiNgesi lilelona lizeleyo phantsi kwamagama anamaqabane adubulayo nanesifutho songqameko esingenalizwi.
Nangona ukuthuka kusenokubonakala kuthomalalisa iimvakalelo zabo, abaninzi bafumanisa ukuba intetho engamanyala izala enye intetho engamanyala. Kutheni oku kunjalo? Intetho engcolileyo yandisa umlilo weemvakalelo. Ngokomzekelo, phakathi kwesiphithiphithi seenqwelo-mafutha eziluthotho kwelinye ikomkhulu elikwiNtshona Afrika, umqhubi owayelugcwabevu ngumsindo watsiba kwinqwelo-mafutha yakhe ukuze ayokungxolisa omnye owayevale indlela ngenqwelo-mafutha yakhe. Njengokuba babebila ngumsindo, intetho ebolileyo yanukisa umoya, ngamnye ezama ukoyisa omnye ngezithuko. Abanye abaqhubi beenqwelo-mafutha ababekolo thotho bakroba ngaphandle kweenqwelo-mafutha zabo baza bayiqhwabela izandla loo ngxwaba-ngxwaba ikrwada yomlomo eyayisanda ngokwanda.
Izithuko ezithoba isidima somntu zisenokuvulela ukudubuleka kwentetho ebolileyo. Okusenokuqukwa ngamagama afanisa lowo ulixhoba nesilwanyana okanye isinambuzane, intetho elihlazo ngabazali bomntu okanye ngomlibo othandabuzekayo, amabinzana atsalela ingqalelo kwiimpawu ezithile zomzimba, yaye, okunokukhubekisa ngakumbi, zizingcolo, izinyeliso namabinzana angesini angamanyala.
Imbono KaThixo Ngentetho Engamanyala
Ngokuqinisekileyo, ukusebenzisa kakubi igama likaThixo kusisono esinzulu. IEksodus 20:7 ithi: “Uze ungafumane ulibize igama likaYehova uThixo wakho.” Kodwa ngaba ukwaphula lo myalelo kwakulonakalisa ulwalamano lomnquli noThixo? Ewe; lo Mthetho wawuqhubeka usithi: “UYehova akayi kumenza omsulwa ofumana alibize igama lakhe.”
Ukubonisa indlela okwakubaluleke ngayo ukuthobela lo myalelo, iBhayibhile inikela ingxelo ngomlo owawuphakathi komSirayeli nenye indoda. Lo wesibini “walithuka iGama, watshabhisa.” Wayigweba njani uThixo loo meko? Wanikela lo myalelo: “Olithukayo igama likaYehova makabulawe afe.” (Levitikus 24:10-16) Nangona unganikeli zinkcukacha zingqalileyo ezingoko kuthuka, sekunjalo lo mzekelo ungokwezibhalo utyhila imbono kaThixo ngentetho nangehambo engenantlonelo.
IZibhalo zamaKristu zesiGrike zaxela kwangaphambili ukuba ngomhla wethu “kuya kufika amaxesha anomgcipheko. Kuba abantu baya kuba . . . ngabanyelisi [ngesiGrike, blaʹsphe·moi], . . . Kwabo ke khwebuka.” (2 Timoti 3:1, 2, 5) Igama lesiGrike elithi bla·sphe·miʹa linikela ingcamango engaphezulu kunentetho engenantlonelo nxamnye nezinto ezigqalwa zingcwele. Enyanisweni, intsingiselo yalo iquka nayiphi na intetho eyenzakalisayo nehlazisayo eyenzakalisa omnye umntu.
Abantu abantetho yabo ithukayo babonakalisa “ubuntu obudala” amaKristu abongozwa ukuba ‘azihlube’ bona njengedyasi enevumba elibi nangasayisebenzisiyo.a Umpostile uPawulos unikela esi siluleko: “Kulahleni oku konke: ingqumbo, umsindo, ulunya, ukunyelisa; ukuthetha amanyala kungabikho emlonyeni wenu.” “Mabukhweleliswe kuni bonke ubukrakra, nomsindo, nengqumbo, nengcolo, nonyeliso, ndawonye nolunya lonke.” (Kolose 3:8, 9, NW; Efese 4:31) Ngokungakumbi, nceda uphawule ukuba abo banyelisa baze batyabeke abanye ngentaba yezithuko, uPawulos ubachaza ‘njengabatshabhisi,’ baqukiwe phakathi ‘kwabangemalungisa abangayi kubudla ilifa ubukumkani bukaThixo.’—1 Korinte 6:9, 10.
Zinxweme Kwintetho Engamanyala!
Uthando lokwenene ngoThixo luya kushukumisela umKristu ukuba enze oko Akholiswa kuko. (1 Yohane 5:3) Kanye njengokuba uThixo ebonakalisa inkxalabo ngabo bonke abantu, ngoko umKristu uya kufuna ukubonakalisa imvakalelo ekwanjalo kwisimo sakhe sengqondo kwabanye, ngaloo ndlela ethobela imiyalelo emibini emikhulu, eyile, uthando ngoThixo nangommelwane. (Mateyu 22:37-39) Ngenxa yoko, “masithi sonke ngabanye simkholise ummelwane kokumlungeleyo, ukuze akheke.” (Roma 15:2) Ngoko zibuze oku, ‘Ngaba ukhetho lwam lwamagama luyakhubekisa okanye luyakha?’
Kuyavunywa ukuba ukucocwa kwentetho kabani akusayi kuba lula xa intetho engamanyala iye yangumkhwa owendeleyo. Sekunjalo, kungenzeka—ngoncedo. Umoya kaThixo usenokunceda umntu aguqule iindlela athetha ngayo. Noko ke, kuqala umntu umele akulungele ukwakha isigama esizaliswe ngamagama alungileyo—aze ke awasebenzise rhoqo.—Roma 12:2.
UKumkani uSolomon osisilumko walumkisa wathi: “Ulwimi oluthetha ububi luya kunqunyanyiswa.” Ngoko musa ukuvumela ubumdaka bentetho engamanyala bungcolise intetho yakho. Kunoko, yiba nenjongo yokuba ngumntu oyaziyo into ecocekileyo onokuyithetha yaye uyithethe ngobubele!—IMizekeliso 10:31, 32, Today’s English Version; Kolose 4:6.
[Umbhalo osemazantsi]
a Phawula eyabase-Efese 5:3, 4, apho umongo unika intsingiselo yesini ‘yentetho yobuyatha’ ‘nobuhiba,’ [“ukuqhulana okungcolileyo,” NW]. Ngenxa yoko, intetho engcolileyo neziqhulo ezinesini phakathi aziwafanele amaKristu.