Imbono YeBhayibhile
Ngaba Simele Sizizalisekise Izibhambathiso Zethu?
ISIBINI esonwabileyo ngandlel’ ithile emtshatweni waso sijongene nengxaki engcungcuthekisayo. Kwiminyaka eyadlulayo, xa sasintyumpantyumpeka ngokunzulu kwingxaki enzima yentsapho, senza isibhambathiso sokunikela ngesishumi sengeniso yaso kuThixo ukuba nje wayenokusikhulula kwiingxaki esasikuzo. Ngoku, ekubeni sele sikhulile ngeminyaka yaye simhokamhokana nomthwalo ebesingawulindele weengxaki zemali, sizibuza oku, “Ngaba sinyanzelekile ukusizalisekisa esi sibhambathiso?”
Imeko enzima esi sibini esikuyo ibethelela ukubaluleka kwesi siluleko sendoda esisilumko ngokunxamnye nokungxama ekuthetheni: “Kulungile ukuba ungabhambathisi, kunokuba ubhambathise ungazalisi. Musa ukuwuvumela umlomo wakho, ukuba uyonise inyama yakho; ungatsho phambi komthunywa kaThixo ukuthi ibikukulahleka.”—INtshumayeli 5:5, 6.
Akufuneki Ukwenza Izingxengxezo Ezif’ Amanqe
Nakubeni izifungo ezingenanjongo nezithembiso zenkohliso ziyinto yemihla ngemihla kwibutho lanamhlanje elinovulazibhuqe, asinakulindela ukuba uThixo akholelwe kukuzithethelela okuchuliweyo; nkqu nabarhwebi bayazi gqitha loo nto. Inqaku elikulindixesha wezorhwebo i-Industry Week elinomxholo othi “Ukunyaniseka Kwezorhwebo: Ngaba Kububudenge Obuphindaphindiweyo?” linesi sikhalazo: “Asisabathembi abantu ukuba bangayithetha inyaniso, benze oko kulungileyo kunokwenza okuyingenelo, bagcine izithembiso zabo.” Ngoxa ubuxoki ekulula ukuqhubana nabo, obunjengokuthi “imali iseposini” busenokuba yinto yokulibazisa abantu ababolekisa ngemali, izithunywa zezulu azisokuze zikhohliswe.
Oku akuthethi ukuba uThixo usebenzisa izithunywa zezulu ukunyanzelisa abantu ukuba bazalise izibhambathiso zabo ngendlela umntu obolekisa ngemali ezalayo ongenalusini ebeya kuyisebenzisa, yokuthumela izikrelemnqa ukuba ziye kuqokelela ngenkani imali esele inenzala kumaxhoba angenakuzinceda. Kunoko, ngothando uThixo uzenza izithunywa zakhe zibe ‘ngoomoya [abakhayo] ababusayo, uzithume ukuba zilungiselele abo baza kuba ziindlalifa zalo usindiso.’ (Hebhere 1:14) Zona, izithunywa zezulu zinokuba nenxaxheba yaye zinayo ekuphenduleni imithandazo yethu eyenziwa ngokunyanisekileyo.
Noko ke, ukuba siyaqhubeka nokwenza izithembiso ezililize kwimithandazo yethu, ngaba ngokufanelekileyo sinokulindela intsikelelo kaThixo? Indoda esisilumko ithi: “Yini na ukuba uThixo abe noburhalarhume ngezwi lakho asonakalise [ubuncinane, ukusa kumlinganiselo othile] isenzo sezandla zakho?”—INtshumayeli 5:6b.
Ngaloo ndlela, akumele ibe kukoyika impindezelo yesithunywa sezulu okusishukumisela ukuba sizalise izibhambathiso zethu kunokuba sizingxengxezele. Kunoko, simele sikuxabise ukuba nolwalamano oluhle noThixo size sibe nomnqweno onyanisekileyo wokukholisa uThixo kwizinto esizenzayo. Kunjengoko isibini esikhankanywe ngasentla sakuvakalisa kakuhle oku ngale ndlela: “Sifuna ukuba nesazela esicocekileyo phambi koThixo yaye sifuna ukwenza ngokuvisisana nokuthanda kwakhe.”
Londoloza Isazela Esilungileyo
Ukuze sibe nesazela esicocekileyo ngokuphathelele ukuzalisa isibhambathiso, simele sinyaniseke kwiziqu zethu. Ngokomzekelo: Masithi uthile unentywenka yemali yakho engakuye kodwa ngenxa yobunzima obuthile uzifumanisa engenako ukukuhlawula. Kukuphi obekuya kukukholisa ngakumbi—ukuba ebengazimiselanga ukulihlawula xa lilonke ityala lakho kuba kunzima ukulihlawula okanye ubuncinane acebe ukulihlawula ngezavenge, ekunika ubuncinane anabo ngokuthe rhoqo?
Ngengqiqo efanayo, masithi isibhambathiso esenziwe ngokungxama nguthile sokunikela ngexesha lakhe elizeleyo okanye obunye ubuncwane kwimisebenzi efanelekileyo yobuKristu asinakuzaliswa. Ngaba asimele sizive sibopheleleke kangangoko kunokwenzeka ekuzalisekiseni izibhambathiso zethu zakuba iimeko zisivumela? UPawulos wabhala esenjenje: “Intumekelelo, ukuba selikho, yamkeleka kakuhle” enoba sinokuninzi esinokunikela ngako okanye sinokuncinane. (2 Korinte 8:12) Kodwa kuthekani ngezibhambathiso ezazenziwe ngaphambi kokuba ubani abe nolwazi oluchanileyo ngenyaniso yeBhayibhile?
Izibhambathiso Eziphosakeleyo Okanye EzingezozaZibhalo
Ukuba sifumanisa ukuba isibhambathiso singcolile okanye asikhuthazi ukuziphatha okuhle, simele sisiphose kwelokulibala ngokukhawuleza kangangoko kunokwenzeka! (2 Korinte 6:16-18) Nantsi imizekelo yezibhambathiso ezingcolileyo:
◻ Izibhambathiso ezenziwa koothixo okanye oothixokazi bobuxoki, ‘njengokumkanikazi wezulu’ waseBhabhiloni.—Yeremiya 44:23, 25.
◻ Izibhambathiso ezingekho mthethweni, njengesifungo esenziwa ngamadoda angama-40 sokungathabathi nesuntswana lento etyiwayo de abe abulele umpostile uPawulos.—IZenzo 23:13, 14.
◻ Izibhambathiso zabawexuki abalandela ‘iimfundiso zeedemon, ezithethwa . . . ngabantu abathetha ubuxoki . . . bengavumi ukuba kuzekwe, nokuba kudliwe izinto ezadalwa nguThixo, ukuze zamkelwe ngombulelo ngabo bakholwayo, bayaziyo inyaniso.’—1 Timoti 4:1-3.
Ngoko, ngokucacileyo, kusenokufuneka sizigqale njengezingasasebenziyo izibhambathiso ezithile zexa elidluleyo ezingazange zizalisekiswe. Kodwa ngokuphathelele izibhambathiso ezingachasananga nezibhalo, kutheni sisithela ngesebe lenkawu nje? Ngaba alumele ulwazi oluchanileyo esinalo ngoku lusenze sibonise intlonelo enkulu ngakumbi kunanini ngaphambili ngezibhambathiso zexesha elidluleyo?
Cingisisa Ngezibhambathiso Zakho Ozenzileyo Noseza Kuzenza
Kwakhona ngokulandelayo simele sicingisise nzulu ngaphambi kokongezelela naziphi na izibhambathiso zexesha elizayo kunqulo lwethu. Izibhambathiso azimele zisetyenziselwe nje ukushukumisela umntu ukuba enze okanye angenzi okuthile, okunjengokwandisa ixesha likabani alichithele kunqulo lobuKristu okanye azibambe ekutyeni ngokugqithiseleyo. Noko ke, uYesu wayengachasananga nazo zonke izibhambathiso, ngokomzekelo, njengaxa sifuneka kwinkundla yamatyala. Kodwa kubonakala ukuba wamisela umda ngokuphathelele izifungo ezenziwa nje ngokukhululekileyo, kuba walumkisa esenjenje: “Kwathiwa kumanyange, Uze ungafungi buxoki; wakuthi uzifeze eNkosini [kuYehova, NW] izifungo zakho. Ke mna ndithi kuni, Maningakhe nifunge nto.” (Mateyu 5:33, 34) Kwakutheni ukuze izinto azibone ngale ndlela? Ngaba izibhambathiso zaba nembaluleka enganeno kunangaphambili?
Izifungo ezazisenziwa ngabantu abathembekileyo bamaxesha amandulo ngokufuthi zazisenziwa ngaphantsi kweemeko ezithile. Kumthandazo wabo onyanisekileyo babenokumthembisa oku uYehova, ‘Ukuba nje unokundikhupha kobu bunzima, ndiya kukwenzela oku noku.’ Kodwa uYesu wathi: “Zonke izinto enithe nazicela kuBawo egameni lam, woninika.” Engancomeli kwaphela izibhambathiso ezazisenziwa ngaphantsi kweemeko ezithile ngabantu abathembekileyo bexesha lakhe, uYesu wabaqinisekisa esithi: “Kude kwaba ngokunje, anikaceli nto egameni lam; celani, niya kwamkela.”—Yohane 16:23, 24.
Ukuba nentembelo elolu hlobo egameni okanye emsebenzini kaYesu kwakhona kufanele kuthuthuzele nabani na osavakalelwa enetyala ngenxa yokuba—nangona esiwa evuka—engenakukwazi ukukuzalisekisa oko akuthembise uThixo ‘ngokuphololoza komlomo wakhe.’ (Levitikus 5:4-6) Ngoko ngoxa singazibethi ngoyaba izibhambathiso zethu zangaphambili, ngoku sinokuthandaza kungekuphela nje egameni likaYesu kodwa sinokumbongoza uThixo ukuba asebenzise idini lentlawulelo likaYesu kwizono zethu, yaye sinokucela ukuxolelwa egameni likaYesu. Ngaloo ndlela sinokufumana ‘inzaliseko yokholo, [sicociwe] iintliziyo zethu, sisusiwe isazela esingendawo.’—Hebhere 10:21, 22.
[Inkcazelo Ngomfanekiso okwiphepha 16]
Priests taking vows at Montmartre