AmaNgqina KaYehova Ayaphumelela Kwidabi Lokuba Nelungelo Lokugcina Umntwana
UINGRID HOFFMANN ubesiwa evuka ezama ukuphumelela kwidabi lokufumana ilungelo lokugcina abantwana bakhe ababini ukususela phakathi kwishumi leminyaka edluleyo. Lo mfazi waseOstriya, wazalelwa waza wakhuliselwa kwicawa yamaRoma Katolika. Watshata nomnye umKatolika, waza wazala unyana ngowe-1980 nentombi ngowe-1982. Kodwa ngowe-1983 esi sibini saqhawula umtshato waso; bobabini aba bazali bafuna ilungelo lokugcina abantwana. Uyise wamangala ngelithi unqulo lukanina wabo—owaba ngomnye wamaNgqina kaYehova—lwaluya kubenzakalisa abantwana, lubangele bangafumani uqeqesho olufanelekileyo noluphilileyo. Wacaphula imibandela efana nokwala kwamaNgqina ukubhiyozela iiholide ezithile eziqhelekileyo kwilizwe lakhe nokwala kwawo utofelo-gazi.—IZenzo 15:28, 29.
Ezi ngxoxo zichuliweyo azizange zanelise. Inkundla yamatyala nenkundla yezibheno azizange zizamkele izityholo zalo bawo zaza zanika umama ilungelo lokugcina abantwana. Noko ke, ngoSeptemba 1986, iNkundla Ephakamileyo yaseOstriya yasijika isigqibo senkundla engaphantsi. Yema ngelokuba ezi zigqibo zaphule uMthetho WaseOstriya Wemfundo Yonqulo, umthetho owawusithi abantwana abazalelwe kwicawa yamaKatolika bafanele bafundiswe njengamaKatolika. Kwakhona le nkundla yagqiba kwelokuba kwakungayi kuba luncedo kwabo bantwana ukubavumela bakhuliswe njengamaNgqina kaYehova!
Wabhenela phi uIngrid Hoffman ngenxa yeli khethe lonqulo elalicace ngolo hlobo? NgoFebruwari 1987 ityala lakhe lasiwa kwiBhunga laseYurophu Lamalungelo Abantu. NgoAprili 13, 1992, eli bhunga, elibunjwa ngabaqondisi-mthetho abamela amazwe ahlukahlukeneyo angamalungu eBhunga laseYurophu, laligqithisa eli tyala ukuze lixoxwe kwiNkundla YaseYurophu Yamalungelo Abantu.
Le nkundla yalichophela eli tyala ngoJuni 23, 1993. Yathi: “Ngoko le Nkundla yaseYurophu iyavuma ukuba kubekho umahluko kwindlela elisingathwe ngayo eli tyala nokuba lo mahluko ubangelwe lunqulo; esi sigqibo kufikelelwe kuso sixhaswa yindlela iNkundla Ephakamileyo [yaseOstriya] esenze savakala ngayo nendlela izinto ezibeke ngayo kuluvo lwayo olubhaliweyo ngokuphathelele imiphumo yonqulo lommangali. Umahluko onjalo ekusingathweni kwetyala ubangelwe lucalucalulo.” [Akekeliswe sithi.] Kwakhona yaphawula ukuba iNkundla Ephakamileyo “yazivavanya ngendlela eyahlukileyo izibakala kuneenkundla ezingaphantsi, ezaqiqa ngendlela eyayixhaswa luluvo lwengcali yenzululwazi ngengqondo. Nangona kusenokubakho naziphi na iingxoxo ezichaseneyo noku, impikiswano esekelwe kuphela kumahluko elunqulweni ayamkelekanga.”
Ngenxa yokuba abagwebi abahlanu bavumayo nangona abane bengazange bavume, abo bagwebi bavumelana noIngrid Hoffman ngokuchasene neOstriya, besithi, ngokungathi kunjalo, iOstriya yamgweba ngekhethe ngenxa yonqulo lwakhe yaza ayalihlonela ilungelo lakhe lokukhulisa intsapho yakhe. Ngokubhekele phaya, abagwebi abasibhozo, bathi makahlawulwe zonke iindleko waza waba mnye kuphela ophikisayo.
Olu loyiso luphawulekayo lwenkululeko yonqulo lwenzeka inyanga enye nje emva kolunye kwakule nkundla—kwityala elalibizwa ngokuthi yiKokkinakis v. Greece, eyafumanisa ukuba iGrisi yayaphule ilungelo lale ndoda lokufundisa iLizwi likaThixo kwindlu ngendlu. Abathandi benkululeko kulo lonke ihlabathi bayavuya xa imizamo enjalo yokuphelisa inkululeko yonqulo isiwa phantsi ibe amalungelo obuqu okunqula uThixo nokukhulisa intsapho ngokwemigaqo yeBhayibhile ekhuselwa.