Ixesha Eliya Kufika Ngalo Ihlabathi Elitsha
IHLABATHI elitsha likaThixo liya kufika xa eli likhoyo lidlula. Kodwa usenokubuza, ‘Ngaba ngokwenene sinokukholelwa ukuba eli hlabathi liza kuphela?’ Kaloku, khawuqwalasele oku, ngaba likho elakha laphela ngaphambili?
Ewe, ngokutsho kobungqina obunokuthenjwa, ihlabathi lakha laphela. IBhayibhile ithi, “Ihlabathi langoko [lomhla kaNowa] lantywiliselwa ngamanzi.” UThixo ‘akazange aliconge ihlabathi lakudala, wesuka walondoloza uNowa, umvakalisi wobulungisa, enabasixhenxe, akuba elihlisele unogumbe ihlabathi labangahloneli Thixo.’—2 Petros 2:5; 3:6.
Phawula ukuba ‘yayilihlabathi labangahloneli Thixo,’ okanye inkqubo yezinto engendawo, elatshabalalayo. Yayingesosijikelezi-langa esinguMhlaba, amazulu aneenkwenkwezi, okanye intsapho yabantu eyaphelayo. Njengoko abantu ababesinde kuMkhukula babesanda ngenani, kwabakho elinye ihlabathi (eli likhoyo ngoku). Kuza kwenzeka ntoni kulo?
Emva kokuthi ihlabathi lomhla kaNowa latshatyalaliswa, iBhayibhile iqhubeka ithi: “Lona izulu langoku, nawo umhlaba lo, kwangelo lizwi ezo zinto ziqwetyelwe, zigcinelwe umlilo.” (2 Petros 3:7) Umlilo usingisele ekutshatyalalisweni kwehlabathi. Eneneni, “ihlabathi [eli likhoyo namhlanje] liyadlula.” (1 Yohane 2:17) Kodwa nini?
Abapostile bakaYesu babefuna ukwazi, ngoko bambuza: “Sixelele, ziya kubakho nini ezi zinto? yaye uya kuba yintoni umqondiso wokuza kwakho, nowokupheliswa kwehlabathi?” (Mateyu 24:3, King James Version) Ephendula uYesu wanikela umqondiso owawuya kubanceda abantu abaphila kwixesha lokuzaliseka kwawo bazi ukuba nelinye ihlabathi kungekudala laliza kuphela; ihlabathi elitsha lithabathe indawo yalo. Wawuyintoni loo mqondiso?
Umqondiso
Umqondiso wawuquka iinxalenye ezininzi, ewe, iziganeko ezininzi ezaxelwa kwangaphambili. Ukuze umqondiso uzaliseke, zonke ezi kwakungafuneka zenzeke ngendlela ephawulekayo ibe okubalulekileyo kukuba zenzeke ngaxesha-nye, kwisizukulwana esinye. (Mateyu 24:34) Ziziphi ezi ziganeko?
Ezinye uYesu awazichazayo yayizezi: “Uhlanga luya kuvukelana nohlanga, nobukumkani buvukelane nobukumkani. Kuya kubakho iinyikima zomhlaba ezinkulu kwiindawo ngeendawo, neendlala, neendyikitya zokufa.” “Ngelo xesha baya kuninikela ekubandezelweni, banibulale; niya kuthiywa ziintlanga ngenxa yegama lam. . . . Nangenxa yokwanda kokuchasa umthetho, luya kuphola uthando lwabaninzi.”—Luka 21:10, 11; Mateyu 24:7-9, 12.
Umpostile uPawulos wachaza ezinye iimeko ezaziya kuphawula “imihla yokugqibela” yeli hlabathi. Wabhala: “Ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, . . . abangeva bazali, abangabuleliyo, abangengcwele, abangenabubele, . . . izityhuthutyhuthu, abathiwe lwale likratshi, abathandi beziyolo kunokuba bathande uThixo; benokumila kokuhlonela uThixo, ukanti bayawakhanyela amandla ako.”—2 Timoti 3:1-5.
Ngokuqinisekileyo, ezi zinto uzibonile okanye uvile ngazo—ungquzulwano lwamazwe ngamazwe olungaphezu kweemfazwe zangaphambili, iinyikima zomhlaba ezinkulu, ukwanda kwezifo nokunqongophala kokudla, ukuthiywa nokutshutshiswa kwabalandeli bakaKristu, ukwanda kolwaphulo-mthetho namaxesha anomngcipheko ngomlinganiselo ogqwesileyo. Ngaphandle kwezi zinto, iBhayibhile ixela kwangaphambili ukuba uThixo uya ‘kubonakalisa abo bonakalisa umhlaba.’ (ISityhilelo 11:18) Yaye kanye ngoku abantu bayawonakalisa umhlaba!
NgoNovemba ophelileyo, amaphephandaba ayenemixholo enjengalo: “Izazinzulu Eziphambili Zilumkisa Ngokutshatyalaliswa Komhlaba.” UGqr. Henry Kendall, owathweswa imbasa kaNobel nongusihlalo woManyano Lwezazinzulu Ezixhalabileyo, wathi: “Esi silumkiso asikokuzibaxa izinto, ibe asikokufuna ukothusa abantu.” Elinye inqaku lephephandaba lanikela le ngxelo: “Ngokoludwe lwezazinzulu ezili-1 575 ezaqulunqa esi silumkiso kubonakala ngathi zizazinzulu ezidumileyo kwezenzululwazi zwenibanzi.” Isilumkiso sazo sokonakaliswa ngokupheleleyo komhlaba wethu asimele singasiwa-so!
Asinakukuthandabuza oko. Zonke iinxalenye zomqondiso ziyazaliseka, kuquka isiprofeto esingundoqo sikaYesu: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela,” ewe, ukuphela kweli hlabathi. (Mateyu 24:14) UYesu wathi kuya kufika xa iindaba ezilungileyo zoBukumkani bukaThixo zishunyayelwe ehlabathini lonke. Yaye ngoku amaNgqina kaYehova ashumayela ngaloo mlinganiselo waxelwa kwangaphambili!
Oko Kufuneka Ukwenze
Ngoko ke, bonke ubungqina balatha kwisibakala sokuba ihlabathi elitsha likaThixo lisemnyango. Kodwa, ukuba uza kusinda kwisiphelo seli hlabathi yaye uza kunandipha ubomi kwihlabathi elitsha, kufuneka wenze okuthile. Emva kokuthi “ihlabathi ke liyadlula,” iBhayibhile ibonisa oko kufunwayo kuwe, icacisa ngelithi: “Owenza ukuthanda kukaThixo uhleli ngonaphakade.”—1 Yohane 2:17.
Ngoko kufuneka ufunde ukuthanda kukaThixo uze ukwenze. AmaNgqina kaYehova aya kukuvuyela ukukunceda wenjenjalo. Ngoko unokusinda kwisiphelo seli hlabathi ukuze unandiphe ngonaphakade iingenelo zehlabathi elitsha likaThixo.
Ukuba, emva kokufunda eli phephancwadi, unayo nayiphi na imibuzo ngeBhayibhile, zive ukhululekile ukuqhagamshelana namaNgqina kaYehova kwiHolo yoBukumkani ekummandla okuwo, okanye ubhalele abapapashi beli phephancwadi. (Bona iphepha 5.)
[Inkcazelo Ngomfanekiso okwiphepha 31]
NASA photo
[Umfanekiso okwiphepha 31]
Ixesha lenkathazo enkulu ngoko nangoko litshayelela ihlabathi elitsha