Indlela Ihlabathi Eliya Kumanyana Ngayo

IMIGUDU yabantu yokuzilawula ngokunempumelelo iye yasilela ngokungaguqukiyo. Ngokungathandabuzekiyo uya kuvumelana nesigwebo esiphefumlelweyo esithi: “Ngexesha athi umntu agunyazele umntu, kube kubi kuye.” (INtshumayeli 8:9) Kutheni abantu beye basilela ngendlela enxunguphalisa kangaka ekuzilawuleni?

IBhayibhile inikela esi sizathu, ithi: “Akukhona endodeni ehambayo ukuqinisela ukunyathela kwayo.” (Yeremiya 10:23) Akulolungelo lomntu ukuba azilawule okanye alawule abanye abantu. Lilungelo elikhethekileyo likaYehova uThixo, uMdali wethu, esixelelwa oku ngaye: “Umgwebi wethu nguYehova, ummisi-mthetho wethu nguYehova, ukumkani wethu nguYehova.”—Isaya 33:22.

Kuphela kuxa bonke abantu beya kwamkela uYehova uThixo njengoMlawuli eliya kuthi ihlabathi limanyane. Kodwa ngaba oko kuya kuze kwenzeke? Kude kudala umprofeti kaThixo wathetha ‘ngokuphela kwemihla,’ xa abantu abaninzi beya kuqalisa ukujonga kuYehova ukuze abafundise.

Uxolo Lwehlabathi Lonke Olwaxelwa Kwangaphambili

Umprofeti uIsaya wabhala oku: “Kuya kuthi ekupheleni kwemihla, intaba yendlu kaYehova ivelele ezincotsheni zazo iintaba, . . . zibe ngumsinga ukuya kuyo zonke iintlanga. Kuya kuhamba izizwe ezininzi, zithi, Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe.” Xa sifunda ngokubhekele phaya, sibona imiphumo yokujonga kuYehova ukuze asifundise. Isiprofeto siqhubeka sisithi: “Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.”—Isaya 2:2-4.

Ewe, umphumo wokuthobela le mfundiso yobuthixo uya kuba kukungabikho komlo, kukungabikho kogonyamelo lobuhlanga kuze kungabikho nemfazwe. Abalawuli abangabantu bathelekelela ukuba bangasizalisekisa esi siprofeto seBhayibhile bada babhala inxalenye yaso yokugqibela eLudongeni Lwesakhiwo seZizwe Ezimanyeneyo kwisiXeko saseNew York. Sekunjalo, imfazwe nentiyo phakathi kwamaqela ezizwe neentlanga iye yanda ukuya kutsho ekupheleni kowe-1993. Ngoko ubuya kuthi isiprofeto sikaThixo siye sasilela?

Akunjalo, siye asasilela—kuba abantu bazo zonke iintlanga sithetha nje bangumsinga ukuya endlwini kaYehova ukuze bafumane imfundiso yobuthixo. Eneneni, obunjani bona ukubalasela ubungqina kwiiNdibano “Zemfundiso Yobuthixo” zamaNgqina kaYehova eziqhutywe kunyaka ophelileyo eziye zabubo ukuzalisekisa esi siprofeto! Ubuzalwana behlabathi lonke bamaNgqina kaYehova abuvumeli nto—enoba yimvelaphi yobuhlanga, yesizwe, okanye yobuzwe—iwabangele ukuba athiyane okanye abulalane. Ngokomfuziselo aye akhanda amakrele awo angamakhuba nezitshetshe zazezokuthena iidiliya.

Ubani usenokuphikisa ngelithi, ‘Kodwa akunakulindela ukuba wonk’ ubani athobele umyalelo kaThixo wokuthandana.’ Nangona oku kuyinyaniso, uThixo unamandla okususa bonke abachasa ukuthanda kwakhe.

Oko Kuya Kwenziwa NguThixo

Ngaba uthandaza ngendlela uYesu awayifundisa abalandeli bakhe, eyile: “Bawo wethu osemazulwini, malingcwaliswe igama lakho. Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini”? (Mateyu 6:9, 10) Ukuba wenjenjalo, ungaqiniseka ukuba uBawo wethu wasemazulwini onothando uya kuwuphendula loo mthandazo. Uya kukwenza njani oko?

UThixo sele emisele uNyana wakhe, “Umthetheli woxolo,” njengomlawuli okhethiweyo ‘worhulumente’ wakhe, uBukumkani esafundiswa ukuba sibuthandazele. (Isaya 9:6) Sifuna umlawuli wokomoya ongaphezu komntu, kuba nguye kuphela onokukhulula uluntu kwimpembelelo engendawo kaSathana needemon zakhe. Abalawuli abangabantu, kungakhathaliseki ukuba baneenjongo ezintle kangakanani na, abanako ukwenjenjalo.—1 Yohane 3:8; ISityhilelo 12:7-12.

Kodwa, kuya kwenzeka ntoni koorhulumente banamhlanje abasilelayo ukuzithoba kulawulo lobuthixo? Esinye isiprofeto seBhayibhile esichaza uBukumkani uYesu awasifundisa ukuba sibuthandazele sithi: “UThixo wamazulu uya kumisa ubukumkani obungayi konakala naphakade. . . . [UBukumkani bukaThixo basemazulwini] buya kuzicola buzigqibe zonke ezo zikumkani, bona bume ngonaphakade.” Ngaloo ndlela, ukuthandazela ukuba uBukumkani bukaThixo bufike kuthetha ukuba sithandazela urhulumente omnye wehlabathi lonke phantsi kolawulo ‘loMthetheli woxolo.’—Daniyeli 2:44; Isaya 9:6.

Ngoko, xa intsapho yabantu imanyene eluxolweni phantsi koBukumkani bukaThixo, bonke baya kuthandana kungakhathaliseki imvelaphi yohlanga okanye yobuzwe. Elinjani lona ukuzuka ixesha ekuya kuba lilo! (ISityhilelo 21:3, 4) Sikumema ukuba ungcamle loo meko inoxolo kwanangoku phakathi kwamaNgqina kaYehova uze ujonge phambili kunye nawo kwelo xesha xa lonke ihlabathi liya kumanyana eluxolweni.