Ithemba Lokwenene Ngabantwana

“Akusayi kuba savela . . . usana oluphila iintsuku ezimbalwa kuphela . . . Abayi kuzixhamla ngokulambathayo okanye bazale abantwana abaya kubandezeleka; kuba baya kuba ngabantu ebasikelelayo INKOSI.”—Isaya 65:20, 23, New International Version.

PHEZU kwayo nje imigudu yomntu encomekayo yokuphucula imicimbi, izigidi zeemveku ezisandul’ ukuzalwa ‘zisaya kubandezeleka.’ Akusayi kuhlala kunjalo. Isiprofeto sikaIsaya asisiqinisekisi nje kuphela ngokuba ngaminazan’ ithile wonke umntwana uya kuba nekamva elinqabisekileyo kodwa sikwacacisa indlela olunokufikelelwa ngayo olo sukelo.

KuIsaya 65:17, uThixo uthi: “Ndidala amazulu amatsha nehlabathi elitsha; angakhunjulwa awokuqala, angenyuki athi qatha entliziyweni.” Ukuze abantwana abasehlabathini banyanyekelwe ngokufanelekileyo, kufuneka “amazulu amatsha” kunye “nehlabathi elitsha.”

Eli “hlabathi litsha” libutho elitsha labantu ababambelela kwimigaqo eyafundiswa nguYesu Kristu. Omnye waloo migaqo, uYesu wawuchaza wathi, “othe wamkela noko amnye wabantwana abanje, egameni lam, wamkela mna.” (Marko 9:37) Ibutho elaliphatha mntwana ngamnye oselula ngokungathi nguKristu ngokwenene laliya kuba ‘lihlabathi elitsha’! Sithetha nje, izigidi zabantu zizabalazela ukwenza kanye oko, yaye ziye zaphumelela ekunikeni ithemba abanye abantwana abasehlabathini.

Abantwana Abanethemba Ngoku

UTshepo, kunye nabanakwabo noodadewabo abakhulu kunaye abane, wayehlala ematyotyombeni eMzantsi Afrika. Xa wayenonyaka ubudala, wayesele enophawu lwesisu esithe puqa somntwana ongondlekanga. Abazali bakhe babeyitya bayisulele entloko imali yomvuzo wabo ongephi bethenga ibhiya kwilinge elililize lokucima iintsizi zabo. Kwakungafane kwenzeke ukuba uTshepo afumane ukutya okushushu, yaye wayevunyelwa ukuba adlale enkunkumeni nakumaphanga ebhiya awayethe saa ngasekhayeni lakhe.

Ikamva likaTshepo lalibonakala limfiliba de kwenzeka enye into eyaguqula indlela yokucinga kwabazali bakhe. Ummelwane ogama linguGeorge wabaqhubela isifundo sesisa semfundo yeBhayibhile. Imiphumo yayichukumisa—ingxaki yokusela yaphela, ikhaya lacocwa, intsapho yafumana ukutya okushushu yonke imihla, uTshepo nabantakwabo baqala bacoceka, banxiba kakuhle baza bonwaba.

UGeorge wayinceda intsapho yakuloTshepo kuba, njengomnye wamaNgqina kaYehova, uziva enembopheleleko kubo bonke, kuquka nabo bahlelelekileyo. Kakade ke, kwathabatha ixesha elide nomonde ukuze kuncedwe loo ntsapho iguqule indlela ebiphila ngayo, nokuyifundisa imilinganiselo emitsha esekelwe eLizwini likaThixo. Kodwa uGeorge unoluvo lokuba oko kwakuwufanele umgudu, ngokukodwa xa ebona indlela oko okubaguqule ngayo abantwana.

Kwidolophu yaseMexico iSan Salvador Atenco kwakuhlala umlimi ogama linguJosé, uyise wabantwana abasithoba. Wayeyindla-manzi, yaye abantwana bakhe babemoyika ngenxa yokuba wayeba ndlongondlongo xa enxilile. Ikhaya labo lalisoloko limdaka, yaye ibala eliphambi kwendlu lalibubuhlanti beedonki neehagu zentsapho, ezazingena ziphuma endlwini. Ngenxa yoko, abantwana babenezifo zesisu, yaye ngamanye amaxesha babedla ngokuba nezilonda ezichizayo emzimbeni.

Izinto zaguquka xa uJosé waqalisa ukufundisisa iBhayibhile namaNgqina kaYehova. Wayeka ukunxila waza wangubawo wokwenene ebantwaneni bakhe. Omnye wabantwana abaselula ngegugu udanduluka ngelithi: “Ngoku sinokude sidlale nokudlala notata!” Ikhaya labo ngoku lelinye lawona acocekileyo—kunokuba libe lelinye lawona anyhukunyhuku—kuloo dolophu. Iihagu needonki zigcinwa edlelweni, yaye ngokuthe rhoqo intsapho iyawabilisa amanzi okusela. Ukuphucuka kococeko kuye kwenza abantwana baba sempilweni ngakumbi yaye bonwaba ngakumbi.

Njengokuba le mizekelo mibini ibonisa, ngokufuthi undoqo ekuncedeni abantwana ukukunceda abazali. Isindululo seNgqungquthela Yehlabathi Ngemicimbi Yabantwana sasamkela isibakala sokuba “intsapho inembopheleleko eyintloko yokondla nokukhusela abantwana.” Yaye enoba iintsapho ziyabondla yaye ziyabakhusela abantwana bazo okanye azenjinjalo oko kusenokuxhomekeka kakhulu kwimfundo nasemvuzweni.

Ukuguqula Umntwana Ohlala Esitratweni

EBrazil, uDomingos wayeneminyaka esithoba ubudala kuphela xa uyise wafayo. Xa unina waphinda watshata, engalindelanga wathunyelwa kwikhaya leenkedama. Impatho-mbi awayifumana kwelo khaya leenkedama yamenza wagqiba kwelokuba athelele iqela elaliceba ukuqhwesha. Nangona unina wambuyisela ekhayeni lakhe xa weva oko wayekuceba, ukubethwa ngokuphindaphindiweyo nguyise womtshato wesibini kwamenza wagqiba kwelokuba alishiye ikhaya. Waba ngomnye wabantwana baseSão Paulo abangamawaka abahlala ezitratweni abaziphilisa ngokucoca izihlangu, ngokuthengisa iilekese, okanye ngokuthutha iziyobisi.

Xa uDomingos waya kwiHolo yoBukumkani yamaNgqina kaYehova okokuqala, wayengathembi mntu yaye wayengenasimilo—oku akumangalisi konke konke ngenxa yemvelaphi yakhe. Sekunjalo, amaNgqina angabantu abakhulu amenza wabathemba abantu, yaye ngofundisiso lobuqu lweBhayibhile, amnceda wafumana imilinganiselo emitsha yokuphila. Ekugqibeleni wafunda ukuba angakholosa ngoThixo aze abathembe abanye. AmaNgqina amnceda wafumana umsebenzi, okokuqala njengoncedisa umakhi yaye kamva njengomthunywa eziofisini. Ngoku, kwiminyaka eliqela kamva, ukhonza njengomlungiseleli ongumKristu wexesha elizeleyo.

Le mizekelo ibonisa ukuba ibutho labantu elinenyameko linokukunciphisa ukubandezeleka kwabanye abantwana abasehlabathini. Kakade ke, amaNgqina kaYehova ayaqonda ukuba ukubandezeleka akusayi kuze kupheliswe ngokupheleleyo yimigudu yabantu. Isicombululo esiqinisekileyo seengxaki zabantwana abasehlabathini siya kufuna amandla angaphezu kwawomntu, ubutyebi obungasikelwanga mda negunya lehlabathi lonke.

“Amazulu Amatsha” Ukuze Kubekho Ihlabathi Elilunge Ngakumbi

Kuphela nguThixo onokunikela isicombululo ngokupheleleyo. Ngenxa yesi sizathu, isiprofeto sikaIsaya sichaza ukuba “ihlabathi elitsha” liya kuphelekwa ‘ngamazulu amatsha.’ Izihlandlo eziliqela iBhayibhile ithembisa ukuba kuya kumiselwa “izulu elitsha” okanye “amazulu amatsha.” (Isaya 65:17; 2 Petros 3:13; ISityhilelo 21:1) Sihlandlo ngasinye ukumiselwa kwala “mazulu matsha” kuchazwa njengenyathelo elibalulekileyo ekupheliseni ukubandezeleka nasekuziseni ubulungisa emhlabeni. Kanye kanye ayintoni la “mazulu matsha”?

Ngokufuthi iBhayibhile isebenzisa igama elithi “amazulu” njengesithetha-ntonye solawulo, enoba lolukaThixo okanye lolwabantu. (Thelekisa uDaniyeli 4:25, 26.) Lo rhulumente mtsha ubuBukumkani basezulwini, uBukumkani bukaThixo—obo uYesu wafundisa abalandeli bakhe ukuba babuthandazele. (Mateyu 6:10) UBukumkani bukaThixo buya kuba namandla okuphelisa nakuphi na ukubandezeleka okusenokusongela abantwana abasehlabathini, yaye buya kumiselwa ukuze benze oko.

Kutheni sinokuqiniseka kangako ngoko? Kungenxa yokuba urhulumente ubonakalisa ubuntu babo balawulayo. Ngoko ke, uBukumkani bukaThixo buya kulawula ngokuvisisana nemilinganiselo kaThixo naleyo yoNyana wakhe, uYesu Kristu, uKumkani omiselwe nguThixo. Bobabini baye babonakalisa umdla wokwenene kwimpilo-ntle yabantwana.—INdumiso 10:14; 68:5; Marko 10:14.

Ngoxa ngolangazelelo silindele obu Bukumkani sibuthenjisiweyo, okanye “amazulu amatsha,” sinokusebenzela ekuphuculeni iimeko zabantwana abakwiindawo esihlala kuzo. Njengokuba iNgqungquthela Yehlabathi Ngemicimbi Yabantwana ngokufanelekileyo yaqukumbela ngelithi: “Awukho omnye umsebenzi omhle onokodlula lowo wokunika mntwana ngamnye ikamva elilunge ngakumbi.”

[Ibhokisi ekwiphepha 11]

Inkqubo Esebenzisekayo Yokunceda Abantwana

Umsebenzi wokufundisa wamaNgqina kaYehova unikela uncedo olusebenzisekayo noluhlala luhleli kubantwana. Ezinye iinkalo zale nkqubo zezi:

Ukufundiswa kwabantu abakhulu. Oku kuquka ukufundiswa ukulesa nokubhala kwabazali abangakwaziyo ukulesa okanye ukubhala, kunye nemfundiso ephangaleleyo yeBhayibhile ecetyelwe ukubethelela imilinganiselo eyimfuneko ekunyanyekelweni kwabantwana ngokufanelekileyo.

Ukhokelo lwentsapho. IBhayibhile ibongoza abazali—kwanabo bahlwempuzeke ngeyona ndlela—ukuba babanyamekele bonke abantwana babo kunokuba babathumele ukuba baye kuhlala nezalamane. Incwadi ethi Ukwenza Ubomi Bentsapho Yakho Bonwabe iye yangqineka iluncedo ekuncedeni iintsapho ezineengxaki ezikhethekileyo.a

Ukubandakanywa nokufundiswa kwabantwnana izinto ezithile. Xa abantwana bebandakanyekile kwimfundo, ukunyanyekelwa kwezempilo nakucoceko, imiphumo iba yelunge kakhulu. Ngokufuthi amaNgqina afundisisa iBhayibhile nabantwana, esebenzisa iimpapasho ezilungiselelwe iintswelo zabo ezinjengethi Incwadi Yam Yamabali EBhayibhile nethi Imibuzo Yabantu Abaselula—Iimpendulo Eziluncedo ekubancedeni basingathe iingxaki ekhaya nasekuphuculeni ucoceko lwabo lobuqu.b

Ukufundiswa ngococeko nangokunyamekela impilo. AmaNgqina kaYehova apapasha ulindixesha onguVukani! ngeelwimi ezingama-74, yaye eli phephancwadi ngokuthe rhoqo libalaselisa amanqaku angokunyamekela impilo.

Umsebenzi wokunikela uncedo. Ngamaxesha ongxamiseko, amaNgqina kaYehova alungiselela iinkqubo zokunikela uncedo ngokukhawuleza aze anikele uncedo ngokungqalileyo kummandla onentlekele.

[Imibhalo esemazantsi]

[Imifanekiso ekwiphepha 10]

Isicombululo esiqinisekileyo seengxaki zabantwana abasehlabathini siya kufuna amandla angaphezu kwawomntu. NguThixo kuphela onokuzisa isicombululo esinjalo