Iintsuku ZobuSathana Zibaliwe
UYEHOVA UTHIXO wadala uAdam noEva, wababeka kumyezo oyiparadisi, waza wabaxelela ukuba bande bazalise umhlaba ngenzala enobulungisa. Kwakufuneka banyamekele umyezo, bawusebenze baze bawugcine, baze baphile ngonaphakade, konke oku kwakuxhomekeke kumyalelo nje omnye olula ongulo: ‘Nimele ningawutyi umthi othile ophakathi emyezweni. Ukuba niyawutya, niya kufa.’—Genesis 1:27, 28; 2:8, 9, 15-17; Isaya 45:18.
Isithunywa esinamandla savukela uThixo saza saba nguSathana, okuthetha “uMchasi,” ngenxa yokuba sasifuna ukuhlutha ulawulo. Sasifuna ukunqulwa luhlanga lwabantu. Saphembelela uEva ukuba atye kwisiqhamo esalelweyo, sisithi sasilungele ukutyiwa nokuba wayengasayi kufa kodwa wayeya kuba njengoThixo, akwazi ukuzenzela isigqibo sokulungileyo nokubi. Isigqibo sakhe sokuqala sasisibi; wagqiba kwelokuba ukutya kwisiqhamo esalelweyo kwakuya kuba kokulungileyo. UEva watya, wanika uAdam isiqhamo naye watya yaye ekugqibeleni bobabini bafa. Ngaloo ndlela uAdam wazisa isono nokufa kwinzala yabo, ebisifa ukususela ngoko. (Genesis 3:1-6; Roma 5:12) Isibini sokuqala esingabantu sakhetha ukulandela uSathana saza sangamaguquka okuqala kunqulo lukaSathana. Ukuza kuthi ga namhlanje, izigidi ziye zagqiba kwelokuba unqulo lwabazali bazo bantlandlolo lwaluzilungele yaye lusazilungele. “Ukuba lowo nizinikela kuye ukuba ngabakhonzi bokumlulamela, ningabakhonzi ngoku kulowo nimlulamelayo.”—Roma 6:16; Yohane 17:15, 16; 1 Yohane 5:19.
UYehova uye wachaza ukuba uSathana uza kutshatyalaliswa njani ekugqibeleni, kodwa usamvumele ukuba aqhube kangangexesha elithile. Oku kuya kunika uSathana ithuba lokungqina ucelomngeni awalwenzayo, lokuba uThixo akanakubeka abantu emhlabeni abanokungqineka benyanisekile Kuye naphantsi kovavanyo—ucelomngeni oluchazwe ngokweenkcukacha nolwathethelela icala likaYehova kule mbambano kwizahluko ezibini zokuqala zencwadi yeBhayibhile kaYobhi. Phantsi kwentlaselo yenkohlakalo neqatha kaSathana, uYobhi wakhetha ukugcina ingqibelelo kuThixo, ngaloo ndlela emngqina uSathana elixoki. (Genesis 3:15; Eksodus 9:16; Yobhi 42:7) AmaHebhere isahluko 11 akwanikela uludwe olude lwamaNgqina aye azimisa ngakwicala likaYehova kwimbambano yolongamo lwendalo iphela.
UKristu Yesu ungobalaseleyo owathi ngalo lonke ixesha walithethelela ngokupheleleyo icala likaYehova kwimbambano enkulu yolongamo lwendalo iphela neyengqibelelo yoluntu kuThixo. USathana walaliswa ngophothe. UYesu wasikhaba ngaw’ omane isithembiso sikaSathana sokumnika ulawulo lwehlabathi lonke ukuba wayenokunqula uSathana kube kanye. Kwakhona ngenkalipho uYesu wanyamezela isilingo esihambisa umzimba xa wayesifa kumthi wentuthumbo. Woyisa uSathana nehlabathi likaSathana, esinika umzekelo ogqibeleleyo emasiwulandele.—Mateyu 4:8-10; 27:50; Yohane 16:33; Hebhere 5:7-10; 1 Petros 2:21.
Ngenxa yamaxesha eentlekele esiphila kuwo, kusenokubonakala ukuba uSathana uya esomelela kunanini na ngaphambili nokuba ubuSathana buyanda. Noko ke, incwadi yeBhayibhile yeSityhilelo inikela imbono eyahluke ngokupheleleyo kwisahluko 12, indinyana 7-9, 12:
“Kwaza kwabakho imfazwe emazulwini, uMikayeli [uKristu Yesu] nezithunywa zakhe besilwa nenamba, inamba nezithunywa zayo zisilwa; azaba nakweyisa, kanjalo ayaba safunyanwa indawo yazo emazulwini. Yaphoswa phantsi inamba enkulu, inyoka yakudala, leyo kuthiwa nguMtyholi, uSathana ke, lowo ulilahlekisayo elimiweyo liphela; yaphoswa emhlabeni, nezithunywa zayo zaphoswa kunye nayo. Ngenxa yoko yibani nemihlali, nina mazulu, nani ninomnquba kuwo. Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.”
Iintsuku Zomhlaba Oyiparadisi Azisayi Kubalwa!
“Esazi nje ukuba ixesha analo lincinane,” uSathana uthabath’ unyawo kwimisebenzi yakhe yobudemoni kule “mihla yokugqibela.” (Yakobi 5:1-3) Ukanti sinalo ithemba. ISityhilelo 21:1, 3-5 sityhila oko likuko: “Ndabona izulu elitsha, nomhlaba omtsha; kuba elokuqala izulu nowokuqala umhlaba udlule, nolwandle alusekho. Ndeva izwi elikhulu liphuma emazulwini, lisithi: Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile. Waza lowo uhleli phezu kwetrone wathi, Uyabona, izinto zonke ndizenza ntsha. Athi kum, Bhala; ngokuba lawo ngamazwi ayinyaniso, athembekileyo.”
Ngaloo ndlela, uKristu Yesu uya kulawula iminyaka eliwaka, ebudeni belo xesha uYehova uya kuphumeza injongo yakhe yantlandlolo ekudaleni umhlaba nasekubekeni uluntu kuwo. (ISityhilelo 20:1, 2, 6) Uya kukhumbula ukuba ntlandlolo uluntu lwalumele luzalise umhlaba ngenzala elungileyo, lunyamekele umhlaba, lunyamekele izityalo nezilwanyana zawo, luhlale eluxolweni luze luthandane. Ukuzalisekiswa kwaloo njongo kuye kwarhoxiswa ukuze kuvunyelwe uSathana azame ukungqina ucelomngeni lwakhe lokuba wayenokubashenxisa bonke abantu kuYehova uThixo. Uye wenza amawaka ezigidi zabantu zangamakhoboka, kodwa uye wasilela kwimeko yezinye izigidi zabagcini bengqibelelo.—Roma 6:16.
Ebudeni bexesha loko kubuyiselwa, inceba kaYehova ngoKristu Yesu iya kufikelela nakwabasemangcwabeni ukuze inikele ithuba lobomi obungunaphakade kumhlaba oyiparadisi kumawaka ezigidi aye afa ebudeni beminyaka engamawaka edluleyo: “Musani ukumangaliswa kuko oko; ngokuba kuza ilixa abaya kuthi ngalo bonke abasemangcwabeni balive ilizwi lakhe; baphume ke: abo benza izinto ezilungileyo beze eluvukweni lobomi; nabo ke benza izinto ezimbi, beze eluvukweni lokugwetywa.”—Yohane 5:28, 29.
Nabani na owalayo ukuvumelana nemeko-bume yobulungisa kwelo hlabathi litsha akasayi kuhlalela ukulingcolisa okanye ukulitshabalalisa, izityalo nezilwanyana zalo, uxolo loluntu okanye unqulo lokwenyaniso lukaYehova uThixo. INdumiso 37:10, 11, 29 iqinisekisa oku: “Kusaya kuba mzuzwana, angabikho ongendawo; uthi wakuyikhangela indawo yakhe, angabikho. Ke bona abalulamileyo baya kulidla ilifa ilizwe, baziyolise ngobuninzi boxolo. Amalungisa aya kulidla ilifa ilizwe, ahlale kulo ngonaphakade.”
UMika 4:2-4 uthembisa ngoxolo nonqabiseko lokwenyaniso: “Ziya kuhamba iintlanga ezininzi, zithi, Hambani, sinyuke siye entabeni kaYehova, endlwini yoThixo kaYakobi, ukuze asiyalele iindlela zakhe, sihambe ngomendo wakhe; kuba uya kuphuma eZiyon umyalelo, nelizwi likaYehova eYerusalem. Uya kugweba phakathi kwezizwe ezininzi, ohlwaye iintlanga ezinamandla, ade ase kude; ziwakhande, amakrele azo abe ngamakhuba, nezikhali zazo zibe zizitshetshe zokuthena imidiliya. Uhlanga aluyi kuphakamisela kuhlanga ikrele lalo, bangabi safunda ukulwa. Baya kuhlala elowo phantsi komdiliya wakhe, naphantsi komkhiwane wakhe, kungabikho uboyikisayo; kuba umlomo kaYehova wemikhosi uthethile.”
Kwakhona olu xolo luya kwesamela lude luquke nezilwanyana, njengokuba uHoseya 2:18 esithi: “Ngaloo mini [mna Yehova] ndobenzela umnqophiso namarhamncwa asendle, neentaka zezulu, nezinambuzane zomhlaba; ndaphule isaphetha nekrele nemfazwe, ezo zinto zingabikho ezweni; ndibahlalise bekholosile.” UHezekile 34:25 ukwathetha ngomnqophiso ongabuqukiyo ubukho bawo onke “amarhamncwa amabi.”
Ehlabela mgama, uIsaya 11:6-9 uthembisa ngoxolo phakathi kwezilwanyana eParadisi: “Ingcuka iya kuhlala nemvana, ingwe ibuthe netakane lebhokhwe; kubuthe ndawonye ithole lenkomo, nengonyama entsha, nenkomo etyetyisiweyo; nomntwana aziqhube ezo zinto. Ithokazi lenkomo nemazi yebhere ziya kudla utyani ndawonye, amankonyana azo abuthe ndaweni-nye; ingonyama idle umququ njengenkomo; adlale umntwana owanyayo emngxunyeni wephimpi, olunyulweyo ase isandla sakhe elukhozweni lweliso lerhamba. Ezo zinto aziyi kwenza bubi, aziyi konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.”
Abalulamileyo baya kulidla ilifa ilizwe. Baya kunyamekela umoya, amanzi nomhlaba. Imithombo nemijelo yamanzi iya kumanzisa iinkqantosi. Amahlathi abekade egecwa ngenxa yenzuzo yokuzingca aya kwambathisa iintaba. Amathafa aya kuchuma neendawo ezazisakuba ziintlango ziya kutyatyamba njengentyatyambo. Iimfama ziya kubona, izithulu ziya kuva, iziqhwala ziya kuhamba nezidenge ziya kuthetha. (Isaya 35:1-7) Ukuxabisa iintaba zikaYehova ezizukileyo neentlambo nonxweme olusemideni yeelwandle neelwandlekazi ezinamaza ayaluzelayo akusayi kuze kuvumele ukubawa koluntu kuphinde kugqube kuze konakalise umhlaba. Kuya kuba lula, kube kokwemvelo, ngoluntu olugqibeleleyo, oluzaliswe ziziqhamo zomoya kaYehova, ukuba luvuye, ngamnye, athande ummelwane wakhe njengaye, yaye ngaphezu kwako konke athande uYehova ngentliziyo, ngomphefumlo, ngengqondo nangamandla akhe ephela. Ewe, lonke uluntu luya kuba neziqhamo zomoya ‘uthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa.’—Galati 5:22, 23.
Ngaba Oku Kuyintsomi Emini?
Ngoku abanye abafundi basenokuba bathi, ‘Konke oku kuyintsomi emini.’ Kodwa, akunjalo, iimeko ezikhoyo ngoku zimbi kakhulu ukuba zingaqhubeka. Sikoko iBhayibhile ikubiza ngokuthi ‘yimihla yokugqibela.’ Khawuphos’ iliso kwindawo ekungqongileyo, ibe unokubona ukuba oku kunjalo. ILizwi likaThixo lithi: “Ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, abaqhankqalazi, abakratshi, abanyelisi, abangeva bazali, abangabuleliyo, abangengcwele, abangenabubele, abangenatarhu, abatyholi, abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi, abathandi beziyolo kunokuba bathande uThixo; benokumila kokuhlonela uThixo, ukanti bayawakhanyela amandla ako. Kwabo ke khwebuka. Ke bona abantu abangendawo noosiyazi, kukhona baya kuhambela phambili ebubini, belahlekisa, belahlekiswa.”—2 Timoti 3:1-5, 13.
Nakubeni amaxesha esiphila kuwo ecace gca, abaninzi baya kuqhubeka begxeka. Oko kukwalindelekile. Ukugxeka kwabo kuyinxalenye engena gingci kubungqina bokuba siphila kwimihla yokugqibela: “Kuya kuza ngemihla yokugqibela abagxeki, behamba ngokwezabo iinkanuko, besithi, Liphi na kaloku idinga lokufika kwakhe? Kuba kuseloko oobawo balalayo ukufa, izinto zonke zahlala zihleli zinjengokwasekuqalekeni kwendalo. . . . Izulu langoku, nawo umhlaba lo, kwangelo lizwi ezo zinto ziqwetyelwe, zigcinelwe, umlilo, kuse kwimini yomgwebo nentshabalalo yabantu abangahloneli Thixo. . . . Thina ke ngokwedinga lakhe silinde elitsha izulu, nomtsha umhlaba, apho kumi ubulungisa.”—2 Petros 3:3, 4, 7, 13.
UYehova uthembisa ukuba, kwihlabathi lakhe elitsha lobulungisa, le nkqubo indala nengendawo yehlabathi likaSathana ayisayi kukhunjulwa: “Niyabona, ndidala amazulu amatsha nehlabathi elitsha; angakhunjulwa awokuqala, angenyuki athi qatha entliziyweni. Hayi, yibani nemihlali nigcobe nanini yiloo nto ndiyidalayo.” (Isaya 65:17, 18) Iintsuku zobuSathana zibaliwe ibe ngexesha likaThixo elifanelekileyo, uSathana uya kutshatyalaliswa ngonaphakade.—ISityhilelo 20:1-3, 7-10.
Eneneni, iimeko ezisikelelweyo eziza kubakho kumhlaba oyiParadisi aziyontsomi emini; uYehova uzigqala ezi meko zikhoyo zale nkqubo indala kaSathana zimbi kakhulu ukuba zingaqhubeka.
[Umfanekiso okwiphepha 10]
Iimeko ezisikelelweyo eziza kubakho kumhlaba oyiParadisi aziyontsomi emini