Abantu Abaselula Bayabuza . . .

Ubufanasini—Ngaba Ngokwenene Bubi Kangako?

“Kususela kwasebuntwaneni, ndandineenkanuko zobufanasini. Kuba ndandingaziqondi, andizange ndizilumkele. Oku kwandikhokelela ekwenzeni into embi gqitha nomhlobo wam. Ndaziva ndinetyala ngokunzulu, ibe ndandicinga ukuba uYehova akayi kuze andixolele.”

“UMABONWAKUDE Uzama Ukuphembelela Abantwana Bethu Kubufanasini.” Lo yayingumxholo wenqaku lombhali wemihlathi kwiphephandaba lombutho othile. Lo mbhali wathi: “Ababukeli bakamabonwakude bachanabeka kwiinkqubo ezininzi [ngokugqithiseleyo] ezithi ngokuqinisekileyo zibonise ubomi bobufanasini.” Noko ke, umabonwakude uyenye nje yeendlela ezininzi ezisetyenziswa kule mihla ukukhuthaza ubufanasini kulutsha. Impembelelo yobufanasini ikwakhuthazwa ngootitshala, oontanga, imifanekiso eshukumayo, iincwadi kunye namaphephancwadi.

Abezonyango nabo baye bayikhuthaza le nto. Ngokuqhelekileyo, oogqirha bebebugqala ubufanasini njengesigulo. Kodwa ngowe-1973, iAmerican Psychiatric Association yavakalisa ukuba ubufanasini abusayi kugqalwa njengesigulo sengqondo. Kususela ngoko, uninzi lwabezamayeza luye lwabamkela ubomi bobufanasini. Ngokomzekelo, ugqirha wezigulo zengqondo uAlbert Ellis wavakalisa ukuba iintlobano zobufanasini “azichasekanga nakancinane kodwa ziyindlela yabantu efanelekileyo yokuziphatha ngokwesini. . . . Zinandiphe ukuba ukhetha oko, ibe ungavumeli namnye ukuba akuphembelelele ekubeni ukholelwe ukuba ‘azilunganga’ okanye ‘zibonisa ukuphazamiseka.’”

Iimbono ezinjalo zigwenxa kakhulu kangangokuba iphephancwadi iNewsweek linikela le ngxelo: “Beqhutywa yimifanekiso yezosasazo kunye nemeko ekhoyo yokubamkela, abakwishumi elivisayo babulinga ngokuphandle gqitha ubufanasini nokutyekela kwabezini zozibini.” Ngoxa kumaxesha adluleyo abakwishumi elivisayo babekuchase ngokungqongqo ukuthandana kwabesini esifanayo, asikokubaxa ukuthi amanani andayo ngoku olutsha abubona “busefashonini.” Kwanolutsha olungabandakanyeki kwizenzo zobufanasini ngokufuthi luyabanyamezela abanye ababandakanyekayo kuzo. Oselula ogama linguDarren uthi: “Ndicinga ukuba ukuba umhlobo wam ebendixelele ukuba ulifanasini, bendiya kuqhubeka ndingumhlobo wakhe.” Omnye oselula ongumfundi wakwanokholeji wada wavakalisa ukuxhalaba ngokuba wayesenokuba akaphilanga ngokwenene ekubeni “wayethanda amantombazana kuphela”!

Namhlanje umoya kavula-zibhuqe unokuthi ngaloo ndlela uluphazamise ulutsha olungamaKristu—ngokukhethekileyo olo ngenxa yesizathu esithile luziva lutsaleleke kwabesini esifanayo.a Luyazi ukuba ubufanasini abumkholisi uThixo, ibe ngokunyanisekileyo lufuna ukubuphepha. Noko ke, ngamanye amaxesha idabi lokulawula iimvakalelo zalo lisenokulwenza ludinwe gqitha kangangokuba lusenokuqalisa ukuzibuza enoba ingcamango yeBhayibhile ngalo mbandela ilungile okanye isengqiqweni kusini na. Lusenokuzibuza: ‘Ngaba ubufanasini ngokwenene bubi kangako?’

Oko ILizwi LikaThixo Likutshoyo

Ukuze ufumane impendulo, zifundele oko akutshoyo umpostile uPawulos kweyoku-1 kwabaseKorinte 6:9, 10: “Anazi na, ukuba abangemalungisa abayi kubudla ilifa ubukumkani bukaThixo? Musani ukulahlekiswa; abenza umbulo, nabakhonzi bezithixo, nabakrexezi, nezifebe [“amahenyu,” New International Version; “abanobufazi,” King James Version] namadoda alalanayo [“amasodom,” Jerusalem Bible; “amafanasini aqhelisela okungekho mvelweni,” Today’s English Version], namasela, namabawa, namanxila, nabatshabhisi, nabaphangi, abayi kubudla ilifa ubukumkani bukaThixo.” Phawula ukuba uPawulos wakhankanya ngokukhethekileyo abo ngokucacileyo bangenandima iphambili yesini kunye nabo baba nendima ephambili “yobudoda” kwiintlobano zabo zokuziphatha okubi. Ngaloo ndlela wakwenza kwacaca ukuba zonke izenzo zobufanasini azimkholisi uThixo.

Oku kukwacaca nakumazwi kaPawulos kweyabaseRoma 1:18-27: “Kuba ityhilekile ingqumbo kaThixo ivela emazulwini, ichase konke ukungahloneli Thixo, nentswela-bulungisa yabantu, abayithintelayo inyaniso ngokuswela ukulungisa. . . . Kungoko athe, besezinkanukweni zeentliziyo zabo, uThixo wabanikela nokubanikela ekungcoleni, ukuba bahlazisane ngemizimba yabo. . . . Ngenxa yoko, uThixo wabanikela ekuthabathekeni okulihlazo; kuba namankazana abo umsebenzi wasemvelweni awananisela okunxamnye nemvelo; kwaza kwangokunjalo ke namadoda, ewushiya umsebenzi wenkazana wasemvelweni, avutha ngokukhanukana kwawo, amadoda esenza kumadoda okuziintloni.” Apha uPawulos wabugweba ngokukhethekileyo ubufanasini bamadoda nobabafazi. Wabugweba ubufanasini njengoqheliselo olungelolwamvelo ‘noluziintloni.’

Ngaba Buyagulisa Okanye Buyimpilo?

Uninzi mhlawumbi lunokusabela koku ngokuthi imbono yeBhayibhile ngokucacileyo indala, ishiywe lixesha. Kodwa xa ucinga kakuhle ngako oku, ngubani oyazi bhetele indlela esibunjwe ngayo ngokwasemzimbeni, ngokwasengqondweni, ngokweemvakalelo nangokwasemoyeni kunoMdali wethu? UThixo wenza indoda nomfazi, waza wabenza banomtsalane gqitha omnye komnye. (Genesis 1:27, 28) Akazange abenze batsaleleke ngokwesini komnye wesini esifanayo. Ukongezelela, uThixo umisele ukuba iintlobano zesini phakathi kwendoda nomfazi zifanele zenziwe phantsi kwelungiselelo lomtshato kuphela.—Hebhere 13:4.

Oku akusitsalisi nzima. KuIsaya 48:17, uYehova uThixo uthi ‘ungokufundisa okungakuncedayo.’ Ewe, uyakwazi oko kusincedayo noko kusenzakalisayo. Nangona kusenokubonakala kunzima kwabanye ukulandela iimfundiso zeBhayibhile, zisoloko ‘ziyimfundiso ephilileyo,’ oko kukuthi, ziyingenelo engqondweni nasemzimbeni. (Tito 2:1) Kwelinye icala, ubufanasini bunokuyonakalisa impilo kabani yasemzimbeni, yeemvakalelo, kunye neyokomoya.

Amanqam kaGawulayo angumzekelo wokubonisa indlela ubomi bobufanasini obungekho mpilweni ngayo. KumNtla Merika, amadoda angamafanasini angabona bantu badla ngokusifumana esi sifo. Kodwa uGawulayo sesinye kwiqela lezifo—ihepatitis, izifo zesibindi, ubhobhozo olusisifo, igcushuwa, kunye negastrointestinal parasites—ngokuqhelekileyo ezithwaxa amafanasini. Yintoni ebangela ukwanda kwesi sifo? UGqr. Joseph Nicolosi ucacisa esithi: “Izinto ezicinezelayo, nezikhobokisayo zobomi bobufanasini ziye zabalwa ngababhali abaninzi.” Olunye uhlolisiso oluphangaleleyo lubonise ukuba “amadoda angamafanasini angama-28 ekhulwini [aye] aba neentlobano zesini namaqabane aliwaka okanye ngaphezulu. . . . Phantse isiqingatha samadoda amhlophe angamafanasini . . . athi aye aba namaqabane esini ubuncinane angama-500 awahlukahlukeneyo.”

Incwadi ethi Homosexual Behavior ichaza ukuba phakathi kwamafanasini amaninzi “kukho uloyiko lokuzibophelela omnye komnye, ukuthandana, okanye imbopheleleko . . . Ukunqwenela ngamandla ukuba neentlobano zesini nomntu ongabophelelekanga kuye maxa wambi kubangele ubani abe likhoboka loku. Bambi kwaba bantu basenokubandakanyeka kunaniselwano ngesini kalishumi okanye nangaphezulu ebudeni bosuku okanye ubusuku obunye.” Ngaba ihambo engalawuleki ngolo hlobo inokuba yesempilweni? Ngaba, kunoko, ayingcolanga yaye ithob’ isidima? Abo bazifica ngokuziphatha vakalala ngolo hlobo ngokucacileyo “bangabakhonzi bokonakala.”—2 Petros 2:19.

Ukongezelela, iintlobano zesini zamafanasini zingamanyumnyezi, zindlongondlongo, ibe zikhohlakele ngokupheleleyo. Umpostile uPawulos wathi: “Kuba izinto ezenziwa ngabo emfihlekweni kulihlazo nokuzithetha.” (Efese 5:12) Ubundlongondlongo obunjalo bubonakalisa umsindo kunye neentlungu ezifihlakele ngaphantsi kwembonakalo yangaphandle yobomi “obonwabisayo.” Liyinyaniso elokuba amanye amafanasini athi akaziphathanga vakalala. Kodwa amafanasini “aneqabane elinye” ambalwa—ibe ulwalamano lwawo ludla ngokuthabatha ixesha elifutshane. Naxa umanyano lwabesini esifanayo lusenokuthabatha ixesha, belungenakuba ngumphumo wothando oluchazwe yiBhayibhile. Uthando olunjalo “alwenzi okuziintloni.”—1 Korinte 13:4, 5.

Imiphumo

UPawulos kweyabaseRoma 1:27 uthi: “Amadoda esenza kumadoda okuziintloni ezamkelela umbuyekezo wokulahleka kwawo.” Ngaziphi iindlela? Phakathi kwezinye izinto incwadi ethi Homosexual Behavior inikela le ngxelo: “Amabhinqa angamafanasini ngokuphawulekayo aba ziindlamanzi ngakumbi kunamabhinqa atsaleleke kwabesini esahlukileyo.” Bambi abaphandi bathi amalinge okuzibulala maninzi ngendlela engaqhelekanga phakathi kwabafana abangamafanasini.

Okona kubangela umonakalo ongakumbi yimiphumo obuba nayo kubumoya bukabani. Amafanasini azifumana ‘enziwe mnyama iingqondo, engazani nobomi bukaThixo.’ (Efese 4:18) Kodwa kuthekani ngolutsha oloyika uThixo oluthi, phezu kwalo nje ulwazi lwalo ngemigaqo yeBhayibhile, luzifumane lutsaleleke kwabesini esifanayo? Ngokucacileyo, lujamelene nomlo wokwenene. Kakade ke, ukwazi indlela uThixo abujonga ngayo ubufanasini kunokubanceda abanjalo ‘bathiye okungendawo.’ (Roma 12:9) Akwakho namanyathelo aliqela asebenzisekayo abasenokuwathabatha ukuphepha ukunikezela kwiminqweno ephosakeleyo. Oku kuya kuba ngumbandela wenqaku elilandelayo.

[Umbhalo osemazantsi]

[Umfanekiso okwiphepha 21]

Ubomi bobufanasini buzaliswe kukuziphatha okuvakalala, ukucinezeleka kweemvakalelo nezifo