Indlela Ukutya Okunesondlo Okunokuyiphucula Ngayo Impilo Yakho
HAYI indlela ekuvuyisa ngayo ukubona umntwana owondlekileyo! Sekunjalo, umntwana akabikho sempilweni ngamabona-ndenzile. UKate, waseKhanada ohlala eBrazil ukhumbula oku: “Ukutya okulula kodwa okunesondlo kwakusoloko kuyinto ebaluleke gqitha kwintsapho yakowethu kungekhona nje kuphela kuqingqo-mali lwethu kodwa kwanakwixesha esasilichitha ekukuphekeni nasekukunandipheni kunye. Ngenxa yokuba umama wam wayengasebenzi ehlala ekhaya, sasidla ngokufika ekhaya sivela esikolweni suku ngalunye sikhawulelwa livumba elimnandi lesidlo sasemini asilungiseleleyo yaye mhlawumbi ivumba lepayi okanye ikeyiki abeyibhakile.”
Noko ke, kunokuba bondliwe ngokutya okunesondlo iThe Economist ithi “malunga nabantu [abazizigidi] ezingama-780 kumazwe ahlwempuzekileyo, ummi omnye kwabahlanu, akafumani kutya kwaneleyo. Abantu abangamawaka ama-2 ezigidi abanokutya okwaneleyo sekunjalo abazifumani iivithamini nezimbiwa abazifunayo.” Umntu ongondlekanga akaneli nje ukuba buthathaka kodwa kwakhona akakwazi ukunceda abanye. Ngenxa yoko, ngokuphathelele abantwana abangondlekanga, isazi ngezoqoqosho uEduardo Giannetti da Fonseca waseSão Paulo University, eBrazil, kucatshulwa amazwi akhe esithi: “Le [nkcitho yobuncwane babantu] imbi kunayo nayiphi na enye into. . . . Ndikholelwa kwelokuba aba bantwana banetalente nobuchule obungahambeli ndawo ngenxa yobuhlwempu. Phakathi kwabo, ukuba bebekwiimeko ezahlukileyo, bekusenokuvela uAlbert Einstein.” Iphephancwadi iVeja lithi: “Ilizwe liphulukana nabantu abanokuba nemveliso abonakaliswa kukungondleki yaye lilahlekelwa ngumthombo wobukrelekrele, ubuchule bokuyila namandla.” Ngenxa yoko, phezu kwazo nje iindleko eziphezulu zokuphila, abazali abanobulumko banika abantwana babo isiseko esiqinileyo ngokuqweba ngokubanika ukutya okunesondlo.
Ukuqweba Ngobulumko
“Ukuqweba” kuthetha “ukusebenzisa into ukwenzela iingenelo okanye ukulungelwa kwixesha elizayo.” Unokuqweba njani ngesondlo? Ukuba kuyimfuneko, ngaba ubuya kuncama izinto zobutofotofo okanye izinto zabantu abanemali uze usebenzise imali yakho elinganiselweyo ekuthengeni ukutya okunesondlo?
IThe New Encyclopædia Britannica ithi: “Izivamvo azihlali zingasebenzi kuba zilinde ukuvuselelwa ngesiquphe ekuzalweni; ubungqina bubonisa ukuba inkqubo yezivamvo isebenza kakuhle ngaphambi kokuzalwa.” Ngaloo ndlela, indlela elungileyo yokuqalisa ukondla usana ikukuba nomama owondlekileyo. Inyathelo elilandelayo—emva kokuzalwa—likukuba usana luncance ibele, ekubeni ubisi lomntu lulondla ngokupheleleyo lude lulukhusele kwizifo ezixhaphakileyo. IFacts for Life, impapasho yeZizwe Ezimanyeneyo ithi: “Kwiinyanga ezimbalwa zokuqala zobomi bosana, ubisi lwebele lukuphela kokona kutya nesiselo esilungileyo esikhoyo. Iintsana zifuna okunye ukutya, ukongezelela kubisi lwebele, xa zineenyanga ezine ukuya kwezintandathu ubudala.”
Nangona umzimba womntu ukwazi ukuzihlaziya ngokuphawulekayo, awufanele uyekelelwe. Kubalulekile ukuwakha ngokutya okunesondlo kusekutsha ebomini. IThe World Book Encyclopedia ithi: “Uthi umntu esiba neminyaka emi-6 ubudala, ingqondo ibe ifikelele kubunzima bayo obupheleleyo obumalunga ne-3 pounds (iikhilogram ezisi-1,4). Inkoliso yeeseli zengqondo zibakho ekuzalweni, yaye ngoko ukwanda kobunzima ngokuyintloko kubangelwa kukukhula kweeseli. Ebudeni beli xesha leminyaka emithandathu, umntu ufunda aze azuze imikhwa emitsha yokuziphatha ngesona santya siphezulu ebomini.” Ngoko ke, kwanokuba umntwana utya ukutya okulungileyo emva konyaka wakhe wesithandathu, ngokwentelekiso zimbalwa iiseli zengqondo ezongezelelekileyo eziya kukhula. UKate uthi: “Ukutya okuya egazini nokunesondlo kusesinye sezona zipho zikhulu abazali abanokuzinika abantwana babo. Kwanokuba izinto ezininzi ekufane kuthiwe ziyimfuneko ebomini, ngokufuthi ezibubunewunewu nje kuphela, abanakuzinikwa, abazali abaqwebela impilo yengqondo neyomzimba yabantwana babo babanika isiqalo ebomini ukususela ebusaneni esingasayi kuze sithatyathelw’ indawo.”
Kutheni Umele Utshintshatshintshe Ukutya Kwakho?
Umntwana ufuna ukutya okuzele ziiprotini ukuze akhule emzimbeni nasengqondweni. Ukungondliwa kakuhle kulibazisa ukukhula kwengqondo yomntwana esikolweni, yaye umntwana usenokunyaba aze ahlale ediniwe, angakwazi ukunikela ingqalelo ithuba elide okanye angakukhumbuli oko akufundiswayo. Ubuncinane ama-25 ezifo ezahlukeneyo zibangelwa kukungafumani esinye sezondlo ezisisiseko—iiprotini, iivithamini, amafutha afunekayo okanye ezinye izondlo.
Khawuqwalasele imeko kaJoaquim. Uthi: “Intsapho yakowethu yayingamahlwempu. Kodwa sasinomhlaba yaye sasiyilima phantse yonke into esasiyitya. Kwisidlo ngasinye sasiba nombona nesonka esenziwe ngomgubo weenkozo ze-rye, yaye oko kwakufak’ isandla kukutya okunesondlo. Phantse suku ngalunye umama wayepheka isuphu awayeyidibanisa neentlobo ngeentlobo zemifuno, kunye neembotyi, yaye oku kwakusinika uninzi lweemfuno zethu zesondlo. Sasingenanyama ininzi, kodwa sasinayo intlanzi, inkoliso iyi-sardines, i-cod ne-herring.” Wongezelela ngelithi: “Umama wayenabantwana abahlanu, yaye andikhumbuli namnye kuthi egula ngaphandle kokuba nengqele nomkhuhlane. Ndicinga ukuba ukutya kwethu okunezondlo kwakufak’ isandla koku.” Omnye umama onabantwana abasixhenxe uthi: “Sasifuna ukulungiselela ukutya okunesondlo ngexabiso eliphantsi. Ngoko satyala imifuno esitiyeni, esathi, nangona sasisincinane, savelisa ukutya okwanele iintswelo zethu.” Wongezelela ngelithi: “Abantwana bethu abazange bakhe bagule kakhulu yaye babesoloko bephuma phambili kumsebenzi wabo wesikolo.”
Umzimba wakho ufuna izondlo ezingama-22 kwimichiza eyamkelwa ngokusemthethweni eli-103. Akunakwenzeka ukuchaza ngokuthe ngqo umlinganiselo wesixa seevithamini, izimbiwa neeprotini umntu ngamnye asifunayo, ukutya okunesondlo kuya kuzanelisa iimfuno zakho. Enye incwadi yathi: “Ukuze wondleke kakuhle kufuneka utye ukutya okwahlukahlukeneyo okunazo zonke iintlobo zezondlo.”
Kuthekani ukuba abantwana bakho abakuthandi ukutya okuthile, njengemifuno enencasa ekrakra? Ngokutsho komnye umpheki onamava, abazali bafanele bapheke “zonke iintlobo zemifuno ezifumanekayo kummandla wabo. Abantu abadala abaninzi abayityi imifuno kuba abazange bayiqheliswe ngelaa xesha babengabantwana. Ekubeni imifuno ine-fiber yaye ineevithamini ezininzi ezifunekayo kuthi yaye ingabizi namali ininzi, abazali bafanele basoloko beyinika abantwana babo.” Ngoko kutheni ungafundi iindlela ezintsha zokupheka ezisebenzisa kakhulu imifuno neziqhamo ezisandul’ ukukhiwa, mhlawumbi ezityiwa nesoufflé okanye nesityu esimuncis’ iintupha? Ngokuphathelele oko kufane kubizwe ngokuba ziikilojoules ezingenasondlo, uthi: “Abazali abafanele babe neelekese endlwini ngaphandle kwaxa kukho izihlandlo ezikhethekileyo. Ukuba [abantwana] abanazo, abanakuzitya.”
Nangona ukutya ngokwaneleyo ukutya okufanelekileyo kunciphisa ingozi yokungondleki, abanye abantu bazenzela iingxaki ngokutya ngokugqithiseleyo. Ukutya iikilojoules ezigqithisileyo kwezo zifunwa ngumzimba kusenokukwenza utyebe, nto leyo enxulunyaniswa nokuba nesifo seswekile neengxaki zentliziyo.a Ekubeni kungekho yeza okanye msebenzi unokuthabathela indawo imikhwa efanelekileyo yokutya, icebiso elilungileyo likukunciphisa indlela owatya ngayo amafutha, iilekese, ityuwa notywala. Kwakhona, enye intyilalwazi ithi, “kufanele kuthatyathwe amanyathelo okunciphisa indlala, ubulolo, ukudandatheka, ukukruquka, umsindo nokudinwa, nganye kwezo zinto enokubangela ukutya ngokugqithiseleyo.”
Imbono Elungeleleneyo Ngokutya Nempilo
IBhayibhile asiyoncwadi ethetha ngezondlo; noko ke, isinceda ukuba silungelelane kwimicimbi yezempilo. Umpostile uPawulos walumkisa ngabo ‘babengavumi ukuba kudliwe izinto ezadalwa nguThixo, ukuze zamkelwe ngombulelo ngabo bakholwayo, bayaziyo inyaniso.’ (1 Timoti 4:3) UThixo ufuna saneliseke size sikusebenzise kakuhle oko sikufumanayo. “Ilungile intwana encinane kunye nokoyika uYehova, ngaphezu kwendyebo eninzi kunye nokuxhalaba.”—IMizekeliso 15:16.
Akukho bani namhlanje unempilo egqibeleleyo. Ngoko kutheni ungenzi ngobulumko, ube ngothobelayo nongazixhalabisi ngokugqithisileyo? Umdla ogqithisileyo okanye wempambano kwisondlo okanye kwimicimbi yempilo usenokusibangela singalungelelani.
Phezu kwayo nje imigudu yokunyamekela impilo yethu, ngenxa yeemeko ezikhoyo ngoku, ekugqibeleni siyaluphala size sife. Noko ke, okuvuyisayo kukuba iBhayibhile isiqinisekisa ukuba uBukumkani bukaThixo buza kukuphelisa ukungondleki nezifo. Nangona amacebo abantu okunciphisa indlala aye asilela, sinokukhangela phambili kwihlabathi elinentabalala yokutya okunesondlo kubo bonke.—INdumiso 72:16; 85:12.
[Umbhalo osemazantsi]
a “Ezinye iingcali zivakalelwa kukuba utyebe gqitha ukuba udlula ubunzima ‘obunqwenelekayo’ . . . isithomo, indlela omile ngayo nobudala bakho ngama-20 ekhulwini.”—IThe American Medical Association Family Medical Guide, iphepha 501. Kwakhona bona uVukani! kaMay 8, 1994, “Abantu Abaselula Bayabuza . . . Ndinokwenza Njani Ukuze Ndinciphe?” neAwake! kaMay 22, 1989, ethi “Is Losing Weight a Losing Battle?”
[Ibhokisi ekwiphepha 7]
AMACEBISO OKUNCEDA UMNTWANA WAKHO ABE NEMIKHWA ELUNGILEYO YOKUTYA
◻ Misela umzekelo omhle.
◻ Musa ukubavumela abantwana batye kuphela oko bakufunayo.
◻ Kuphephe ukuba nokutya okungenasondlo okanye iilekese endlwini.
◻ Qeqesha abantwana baxabise iintlobo ezahlukeneyo zokutya.
◻ Yiba nexesha elimisiweyo lokutya, kuquka nesidlo sakusasa.
◻ Musa ukuvumela izibhengezo zikamabonwakude ziphembelele oko ukutyayo.
◻ Musa ukuvumela abantwana bazithathele ukutya kwisikhenkcisi.
◻ Qeqesha abantwana bakho ukuba bancedise ekuphekeni ukutya.
◻ Hlakulela umbulelo ngamalungiselelo emihla ngemihla.