Ngaba Kufanelekile Ukuzifaka Ematyaleni?

“UNGAZE uyisebenzise imali yakho ngaphambi kokuba uyifumane.” Ekubeni ukuzifaka ematyaleni kuyindlela eqhelekileyo yokuphila kubantu abaninzi namhlanje, ngaba eli cebiso lanikelwa ngowayesakuba ngumongameli waseUnited States uThomas Jefferson livakala liphelelwe lixesha?

Kumazwe amaninzi umvuzo uhlala uphantsi xa uthelekiswa namaxabiso, yaye ukunyuka kwamaxabiso kutya imali. Kwakhona, imeko yezoqoqosho iyayichaphazela indlela abantu abazijonga ngayo izinto ezixabisekileyo. Sekunjalo, ukunyaniseka kubalulekile. Ngenxa yokuba izinto ezifana nokuqhatha kwiirhafu nokusilela ukuhlawula amatyala zandile, eneneni kulucelomngeni ukugcina isazela esilungileyo. Ngoko, akumangalisi ukuba ezoqoqosho ngokufuthi ziyinto engundabamlonyeni, ibe amacebiso okugcina okanye okuzuza imali maninzi kumaphephandaba nakumaphephancwadi kunye nakumabonwakude njengokuba abantu bezama ukufumana indlela yokuhlangabezana neengxaki zezoqoqosho. Kwangaxeshanye, kufanelekile ukuba uxhalabele indlela yokuzondla wena kunye nentsapho yakho.—1 Timoti 5:8.

Ekubeni bembalwa ngokwentelekiso abantu abazinzileyo ngokwezoqoqosho, yintoni onokuyenza ukuze uphephe ubunzima entsatsheni yakho? Phakathi kwezinye izinto, kukho isifundo esibalulekileyo omele usikhumbule.

Phepha Amatyala Amakhulu

Kutheni bambi bezifaka ematyaleni nje? Ukuboleka akusoloko kubangelwa yimeko emaxongo, njengokugula. Umnqweno wokuba nezinto ezithile eziphathekayo unokuba namandla. Kwelinye icala, isizathu sokuzifaka ematyaleni sona sisenokuba asiphosakalanga. Enyanisweni, kulunge ngakumbi ukuhlawula ixabiso lendlu kunokuhlawula imali yengqesho endlwini, okanye kusenokuba yimfuneko ukuba uthenge inqwelo-mafutha. Umondli-lusapho ufuna intsapho yakhe yonwabe. Ufuna ukuba yindoda notata ophumelelayo. Ngokunokwenzeka, uvakalelwa kukuba intsapho yakhe ifanele ibe nezinto ezininzi eziphathekayo abanazo abanye.

Kuyavunywa ukuba kusenokukuhenda ukuboleka imali ukuze uthenge into oyinqwenelayo kodwa engeyomfuneko. Ukuba nezinto kumenza ubani onwabe, akunjalo? Ngubani ongakuvuyeliyo ukuba nelokhwe entle, izihlangu ezitsha, okanye into enjengenqwelo-mafutha entsha kraca? Yaye ngubani ongakuthandiyo ukuba nekhaya elinomtsalane ngakumbi? Sekunjalo, lumka! Oosomashishini basenokukudyobha ngentshongo emehlweni, yaye benza imali eninzi ngokuthengisela abantu izinto abangazifuniyo nabangenakuzifikelela.

Kwakhona, khumbula ukuba ukuhlawula ityala rhoqo kunokubangela uxinezeleko kulwalamano lwentsapho. Umphumo usenokuba kukungavisisani nokucaphuka. Umbhali wemidlalo yeqonga uHenrik Ibsen wayechan’ ucwethe xa wayesithi: “Ubomi basekhaya buphelelwa yinkululeko nobuhle kamsinya bakuba busekelwe ekubolekeni nasematyaleni.” Ukuba awuhlawuli ngethuba, igama lakho elihle liya kungcola. Ekubeni kulula ngakumbi ukusebenzisa imali ebolekiweyo kunokuyihlawula sele inenzala, abaninzi bafumanise ukuba oko bakuthengileyo akuluzisi uvuyo abebelulindele.

Ngokuqhelekileyo, oorhulumente bayaqhubeka bebolekisa nangaphezulu, besandisa ukuhlawulwa kwemali yabo enenzala. Nangona oku kusenokuba kuqhelekile, kutheni ulinganisa iintlanga ezithe phithi ngamatyala? Kunokuba enze abantu babe zizityebi, amatyala amakhulu anokwandisa ubuhlwempu nokunganqabiseki. Njengokuba iqhalo lesiDanish likubeka, “kunzima ukuhlawulela isonka osele usityile.”

Okonwabisayo kukuba ukucinezeleka ngenxa yokusindwa ngamatyala kuncipha kakhulu xa ufunda indlela yokusebenzisa imali ngobulumko. Ngoko chitha ixesha uceba ngenyameko izinto oza kuzithenga ukuze uphephe ingcinezelo yokuboleka. Kwanakumazwe apho amaxabiso ezinto antinge ngokugqithiseleyo, zikho iindlela zokonga imali—ngokuthenga izisulu nangokuthenga izinto eziyimfuneko kuphela. Oku kufuna uphile ngokuvumelana neemeko zakho, ukulungele ukuyilinda okanye ukuhlala ungenayo loo nto uyifunayo.

Khawuzibuze: Ngaba ukuzifaka ematyaleni kuya kuzisa ubunzima entsatsheni yam? Kuthekani ngodumo lwam ukuba andikwazi ukubuyisa imali-mboleko? Kusenokuthabatha ixesha elide ukuphinda uthenjwe! Ngokubhekisele koku, isiluleko esisebenzisekayo nesisengqiqweni siyafumaneka. Kutheni ungahlolisisi iBhayibhile ukuze ubone enoba inokukunceda na wena nentsapho yakho nihlangabezane nombandela wamatyala?

Ngaba IBhayibhile Ingakunceda?

Okubaluleke kakhulu kukuba iBhayibhile ingasinceda sonke sihlakulele ukukholosa ngokupheleleyo ngoYehova. Ngokuqinisekileyo sifuna uncedo kula “maxesha anomngcipheko.” (2 Timoti 3:1) Siyabongozwa: “Isimilo senu masibe sesingathandi mali, yanelani zizinto eninazo; kuba etshilo yena ukuthi, Andiyi kukha ndikuyekele; wabuya wathi, Andiyi kukha ndikushiye; ngokokude somelele sithi, INkosi ilusizo lwam, andiyi koyika; wondenza ntoni na umntu?” (Hebhere 13:5, 6) Hayi indlela ekubaluleke ngayo ukuba sikhulise ukholo olomeleleyo kuThixo njengomLungiseleli wethu!

Nangona iBhayibhile ingaxeleli mntu ngendlela yokuphila, iyalunikela ukhokelo olusengqiqweni. UYesu Kristu wakhuthaza abaphulaphuli bakhe ukuba baqale ngokunyamekela ubumoya babo: “Banoyolo abangamahlwempu ngomoya.” (Mateyu 5:3) Sikwaxelelwa ukuba sizibekele usukelo: “Nizondelele ukuba nizole, nenze ezenu izinto, nisebenze ngezenu izandla, njengoko saniyalayo; ukuze nihambe ngokuzibekileyo ngakwabo bangaphandle, ningasweli nto.” (1 Tesalonika 4:11, 12) Ukuze siphile ngenzolo yaye sinandiphe ukuzola, ngaba akufuneki sibe nenkcitho esilingeneyo?

ILizwi likaThixo linokusinceda silungelelanise ukucinga kwethu. Umbhali weMizekeliso wabonisa imbono elungeleleneyo xa wacela kuThixo esithi: “Musa ukundinika ubuhlwempu nobutyebi; ndihlafunise isonka endisimiselweyo; hleze ndihluthe, ndikhanyele, ndithi, Ngubani na uYehova? Hleze ndihlwempuzeke, ndibe, ndilicukuceze igama likaThixo wam.” (IMizekeliso 30:8, 9) Ngoko musa ukuziva uneentloni ngokuba nezinto ezimbalwa, ubuncinane okwexeshana. Ungaze uvumele ulonwabo lwakho luxhomekeke kwizinto eziphathekayo, njengokuba abaninzi besenjenjalo, bezithelekisa nabanye okanye bezikhathaza ngokungeyomfuneko ngezinto eziphathekayo.—Mateyu 6:31-33.

Ukongezelela koko, iBhayibhile inokukunceda uhlakulele imikhwa elungileyo. Funda ukuba noqoqosho ngaphandle kokuba ligqolo, usaneliseka zizinto onokuzifumana. Ukuba ungoselula, musa ukulindela ukufumana ngephanyazo izinto abantu abadala abaye bazifumana ngokusebenza iminyaka. Kuphephe ukuba likhoboka lezinto eziphathekayo. Ngokufanelekileyo, iBhayibhile ayisilumkisi ngemali, kodwa isilumkisa “ngokuthanda imali,” isithi: “Ke abo banga bangaba zizityebi, beyela ekuhendweni, nasesibatheni, nasezinkanukweni ezininzi ezibubudenge ezenzakalisayo; zona zibatshonisayo abantu ekonakaleni, nasekutshabalaleni. Kuba ukuthanda imali yingcambu yeento zonke ezimbi: abathe abathile, ngokuzolulela kuko, balahlekana nokholo, bazibhodloza ngobuhlungu obuninzi.” (1 Timoti 6:9, 10) Hayi indlela ekubaluleke ngayo ukuba uqonde umahluko phakathi kwezinto ozifuna ngokwenene nezinto ozifuna nje!

Noko ke, ngaba uvakalelwa kukuba umvuzo wakho mncinane gqitha? Kuyinyaniso ukuba akulula ukuthwala iintswelo ngaphandle kokukhathazeka. Sekunjalo, kulungele ukuphila ngaphandle kwezinye izinto ezingabalulekanga kunokuzifaka ematyaleni ngenxa yazo, nto leyo esenokukuthwalisa umthwalo onzima ude ulahlekelwe yimali. Ceba ngenyameko, uze wonge imali. Usenokufumana amacebiso asebenzisekayo ngokuthetha nomhlobo onamava. Ngaba kuya kukunceda ukufunda umsebenzi wezandla omtsha? Khumbula: Ukulandela imigaqo yeBhayibhile, ukubeka izinto zokomoya kuqala, nokukholosa ngokupheleleyo ngoYehova kubalulekile—enoba ziyintoni na iimeko.—Filipi 4:11-13.

Ewe, ukuzifaka ematyaleni kusenokungafaneleki. Kuthiwa: “Indoda esematyaleni ibambiseke emnatheni.” Umthwalo wamatyala usenokubonakalisa ubomi bentsapho, impilo, nobumoya bukabani. Amatyala asenokumenza lowo ubolekayo ahlwempuzeke nangakumbi. IMizekeliso 22:7 ithi: “Isityebi siya kuwalawula amahlwempu; nobolekayo ngumkhonzi endodeni embolekayo.” Ngenxa yoko, waphephe amatyala angeyomfuneko. Sisenokungenelwa kumgaqo obandakanyekileyo koko umpostile uPawulos wakuncomela kumaKristu esithi: “Musani ukuba natyala lanto mntwini, lingelilo elokuthandana; kuba omthandayo omnye uzalise umthetho.”—Roma 13:8.

Kungakhathaliseki ukuba injani na imeko yezoqoqosho elizweni lakho, khangela ngentembelo kwihlabathi elitsha likaThixo. Kungekudala uluntu alusayi kuba ngababoleki nababolekisi. Phantsi koBukumkani bukaThixo, akukho namnye oya kuba lihlwempu. Idinga likaYehova liya kuzaliseka: “Ngokuba uya kulihlangula ihlwempu elizibikayo, nabaziintsizana abangenaluncedo; abenzele inceba abasweleyo nabangamahlwempu, asindise imiphefumlo engamahlwempu.” (INdumiso 72:12, 13) Kunokuba bazabalazele nje ukuphila, abemi bomhlaba baya kwandula “baziyolise ngobuninzi boxolo.”—INdumiso 37:11.

[Umfanekiso okwiphepha 12]

UThomas Jefferson

[Inkcazelo]

Painting by Gilbert Stuart. Courtesy Bowdoin College Museum of Art/Dictionary of American Portraits/Dover

[Umfanekiso okwiphepha 13]

Ukuzifaka ematyaleni ungaveli nangonwele kunokuzisa iingxaki emtshatweni wakho