Ukuxelwa Kwangaphambili Kwesiphelo Sehlabathi
“Kangangeminyaka eliwaka abaprofeti bobumnyama bebexela kwangaphambili ukuba ihlabathi seliza kuphela.”—Premonitions: A Leap Into the Future.
NGOWE-1033, kwiminyaka nje eli-1 000 emva kokufa kukaKristu, abemi baseBurgundy, eFransi, babesoyika gqitha ngenxa yokuba kwakuxelwe kwangaphambili ukuba ihlabathi laliza kuphela kuloo nyaka. Bayilindela ngakumbi intshabalalo xa inani elingaqhelekanga lezichotho ezitshabalalisayo nendlala enkulu zazigqugqisa. Izihlwele ezikhulu zazibonakalisa ekuhleni ukuba zaziguqukile.
Iminyaka embalwa elishumi ngaphambilana, njengokuba unyaka wewaka ukususela ekuzalweni kukaKristu wawusondela (ngokobalo-maxesha olwalwamkelwe ngelo xesha), abaninzi babekholelwa kwelokuba isiphelo sehlabathi sasisemnyango. Imisebenzi yobugcisa neyesithethe kwimizi yoonongendi eYurophu kuthiwa yaphantsa yayekwa. UEric Russell kwincwadi yakhe ethi Astrology and Prediction wathi: “‘Ekubeni isiphelo sehlabathi ngoku sesisondele’ kwakuyindlela eqhelekileyo eyayibhalwa ngayo imiyolelo ebudeni besiqingatha sesibini kwinkulungwane yeshumi.”
UMartin Luther, owaqalisa uHlaziyo lwamaProtestanti ngenkulungwane ye-16, waxela kwangaphambili ukuba isiphelo sehlabathi sasikufutshane ngomhla wakhe. Ngokutsho kwenye incwadi, wathi: “Ngokwendlela endibona ngayo, ndiqinisekile ukuba imini yomgwebo ayifikanga igalelekile.” Omnye umbhali wathi: “Ngokunxulumanisa iziganeko zembali neziprofeto zeBhayibhile uLuther wayenako ukuchaza ukusondela kwentlekele yokugqibela.”
Ngenkulungwanye ye-19, uWilliam Miller, owothulelw’ umnqwazi ngokubanzi ngokumiswa kweCawa yamaSabatha, waxela kwangaphambili ukuba uKristu wayeza kubuya phakathi kukaMatshi 1843 noMatshi 1844. Ngenxa yoko, abanye ngelo xesha babelindele ukuxwilelwa ezulwini.
Kumaxesha akutshanje, unqulo olwaqala eUkraine olwalubizwa ngokuthi yiGreat White Brotherhood lwaxela kwangaphambili ukuba ihlabathi laliza kuphela ngoNovemba 14, 1993. EUnited States, umshumayeli oshumayela kunomathotholo, uHarold Camping, wathi isiphelo sehlabathi sasiza kufika ngoSeptemba 1994. Licacile elokuba ezi zinto zaxelwa kwangaphambili ngemihla yesiphelo sehlabathi bezingachananga.
Ngaba oku kuye kwabangela abantu ababisakholelwa ukuba ihlabathi liza kuphela? Ngokwahlukileyo koko. IU.S.News and World Report kaDisemba 19, 1994, yaphawula oku: “Ukusondela kwewaka leminyaka elitsha ngonyaka wama-2000 kwenza abantu abaninzi baprofete ngomhla wentshabalalo.” Eli phephancwadi lanikela ingxelo yokuba “phantse ama-60 ekhulwini amaMerika acinga ukuba ihlabathi liza kuphela ngaxa lithile kwikamva; phantse isithathu kuwo sicinga ukuba liya kuphela kumashumi ambalwa eminyaka.”
Kutheni kukuninzi nje ukuxelwa kwangaphambili kwesiphelo sehlabathi? Ngaba sikho isizathu esibambekayo sokukholelwa ukuba liza kuphela?