Imbono YeBhayibhile
Ngaba Imilinganiselo KaThixo Kunzima Gqitha Ukuyifikelela?
“UTHIXO AKAWUHLOLI UMGANGATHO WABANTU NGOBUDE BABO.”—IQHALO ELIDALA LASESKOTLANI.
IIMVIWO zesikolo, udliwano-ndlebe lomsebenzi, nokuxilongwa ngabezempilo zezinye nje zezihlandlo zeenguqulelo ebomini bomntu apho ahlolwa khona umgangatho akuwo. Kodwa xa kufikelelwa ekuphileni ngemilinganiselo kaThixo imihla ngemihla, abantu abaninzi bavakalelwa kukuba basenokuthi ngandlel’ ithile basilele ukuyifikelela. Ngaba nawe unaloo nkolelo? Ngaba unokuyifikelela imilinganiselo kaThixo?
Ukuze sinikele impendulo, kuqala makhe sijonge imilinganiselo uThixo ayibekele abanquli bakhe. IBhayibhile iyasikhanyisela indlela esifanele sihambe ngayo ebomini. (INdumiso 119:105) Umbhali weBhayibhile osisilumko uKumkani uSolomon waqukumbela ngelithi “imfanelo yoluntu lonke” kukuthi ‘loyike uThixo, lugcine imithetho yakhe.’ (INtshumayeli 12:13) Umprofeti uMika wathi: “Akubizayo uYehova kuwe, kukuthi wenze okusesikweni, uthande inceba, uhambe noThixo wakho ngokuthozamileyo.”—Mika 6:8.
UYesu Kristu, uNyana kaThixo, wavakalisa ukuba akukho mithetho mikhulu engaphezu ‘kokuthanda iNkosi uThixo wakho ngentliziyo yakho iphela, nangomphefumlo wakho uphela, nangengqondo yakho iphela, nangamandla akho ephela’ kunye ‘nokuthanda ummelwane wakho njengoko uzithanda ngako.’ (Marko 12:30, 31) Ukongezelela, sibonisa ukuba siyamthanda uThixo ngokuthobela yonke imithetho yakhe.—1 Yohane 5:3.
Ngamanye amazwi, abantu bafanele bamthande baze bamhlonele uThixo, bathobele imithetho yakhe, benze okusesikweni, babe nobubele kubantu bonke, baphephe ukuzingca. Ngaba loo milinganiselo asinakuyifikelela?
UThixo Unolwazelelelo
UThixo ngokufanelekileyo ulindele ukuba abantu bayifikelele imilinganiselo yakhe. Kodwa, xa sithetha inyaniso, ngaba ukho nawuphi na umntu oyifikelela ngokupheleleyo ngalo lonke ixesha le milinganiselo? Ngokucacileyo akakho, kuba ukungafezeki sakuzuz’ ilifa kukhokho wethu uAdam. (Roma 5:12) Ngaloo ndlela, sinotyekelo lokona. Sekunjalo oku akusenzi singakufanelekeli ukukhonza uThixo ngokwamkelekileyo.
Ngokomzekelo, khawucinge ngeengxaki ojongana nazo xa ufunda ukuqhuba inqwelo-mafutha. Kufuneka ingqalelo ezingisileyo nexesha ukuze ubani aqhube kakuhle de akwazi ukuphumelela uvavanyo lokuqhuba. Kakade ke, sisamele siphucule indlela esiqhuba ngayo nasemva kokuba sisifumene isiqinisekiso sokuqhuba. Njengoko sisiba namava, siba nobuchule obungakumbi. Kodwa abakho abaqhubi abafezekileyo!
Okuvuyisayo kukuba uThixo unolwazelelelo ngeentsilelo zethu. Akangomntu ungaqiqiyo, ofuna izinto esingenako ukuzenza, engenguye nomntu osoloko ehlab’ amadlala. Uyaziqonda iintsilelo nobuthathaka bethu. UKumkani uDavide, owenza isono esinzulu, wathi: “Akenzi kuthi ngokwezono zethu, akasiphathi ngokobugwenxa bethu.” Ngoba? “Ngokuba injengokuphakama kwezulu phezu komhlaba, ukuba namandla, inceba yakhe kwabamoyikayo.” Nangona uYehova esazi ukuba siyona, ukulungele ukulukhwelelisa ‘njengempumalanga kwintshonalanga’ ukreqo lwethu.—INdumiso 103:10-14.
Musa Ukunikezela
Omnye umnquli onyanisekileyo kaThixo uchaza esithi: “Xa ndidandathekile, maxa wambi ndiye ndigqibe kwelokuba andinakuze ndikwazi ukuphila ngemilinganiselo kaThixo. Kodwa xa ndihlakulela imbono eyakha ngakumbi ndivakalelwa kukuba ndinganako ukuphila ngendlela uThixo afuna ngayo. Kodwa akuyondlwan’ iyanetha!” Musa ukutyhafa ukuba uvakalelwa ngale ndlela. Akungomntu wokuqala, ungenguye nowokugqibela, ukuba nezo zimvo.
Umpostile ongumKristu uPawulos wavuma ngokuphandle esithi: “Kuthi, ndifuna ukukwenza okuhle, kusuke kubekho okubi kum. Kuba ndikholene nomthetho kaThixo ngokomntu ongaphakathi; kodwa ndibona mthetho wumbi, emalungwini am, usilwa nomthetho wengqiqo yam, undithimbela emthethweni wesono . . . Athi ke mna, mntu uludwayi!” Kodwa akazange agqibe kwelokuba oko kwakulindelwe nguThixo kuye kwakunzima gqitha, kuba wongezelela esithi: “Azi, ngubani na oya kundihlangula kulo mzimba woku kufa? Ndiyabulela kuThixo ngoYesu Kristu, iNkosi yethu. Ngoko ke mna ngokwam ngayo ingqiqo okunene ndikhonza umthetho kaThixo; kodwa ngayo inyama ndikhonza umthetho wesono.” (Roma 7:21-25) Ngaloo ndlela waziva ekwazi ukumkholisa uThixo nangona wayesengumoni.
UYehova, uMdali wethu onothando, uyazixolela iziphoso neentsilelo zethu ngesizinzi sedini lentlawulelo loNyana wakhe oyintanda, uYesu. Umpostile uYohane wabhala: “Ukuba kukho kuni othe wona, sinoMthetheleli kuye uYise, uYesu Kristu ilungisa. Yena usisicamagushelo [esigubungelayo] sezono zethu.” (1 Yohane 2:1, 2) Umqobo oziswa sisono nosithintela ekufikeleleni imilinganiselo kaThixo yokuba ngabahlobo bakhe ishenxiswa okanye yaphulwa ngamandla edini likaKristu. Ngaloo ndlela ubudlelane noThixo buyalondolozwa.
Ukulamkela ngokuthobeka eli lungiselelo lothando kusenza sixolelwe, kuba uThixo unabo ‘batyumkileyo, banomoya othobekileyo.’ (Isaya 57:15) Sinokwayama Ngaye ukuze asivuselele emoyeni. Uthembisa ‘ukumvusa eluthulini osweleyo.’ Akuseyomfuneko ukuba sihlale sidandathekile xa sisilela ukuthobela uThixo ngokugqibeleleyo. Kunoko, sinokuqiniseka ukuba uThixo akanakuze awutyeshele umgudu esiwenzayo ukuze siphile ngemilinganiselo yakhe.—INdumiso 113:7; Hebhere 6:10-12.
Nangona oku kungumzamo, uya kufumanisa ukuba wonwaba ngakumbi xa usenza okukholisa uThixo. Ukuzinikela kuThixo kwenza ubomi bunyamezeleke ngakumbi kuwe nakwabo bakungqongileyo. Kwakhona cinga ngekamva. Ukuzabalazela ukuphila ngemilinganiselo kaThixo ngoku kusenza sibe nethemba lobomi obungunaphakade eparadisi.—Isaya 48:17; Roma 6:23; 1 Timoti 4:8.
Abo banamava ekunyukeni iintaba bayaqonda ukuba xa besencotsheni, basekwisiqingatha sohambo. Kusafuneka behle kuloo ntaba bekhuselekile. Ngokufanayo, abo boyika uThixo kufuneka bafikelele imilinganiselo kaThixo baze bandule ukuphila ngokuvisisana nayo.—Luka 21:19; Yakobi 1:4.
Thuthuzeleka kukwazi ukuba imilinganiselo kaThixo akunzima kakhulu ukuyifikelela. Xa ngamaxesha athile usilela ukuyifikelela ngokugqibeleleyo, cela uxolo kuye. Thembela ngenkxaso yakhe enothando. (INdumiso 86:5) Ngoko ke, unoYehova noNyana wakhe njengaBancedi bakho, unokuyifikelela imilinganiselo kaThixo uze ufumane inkoliseko yakhe.—IMizekeliso 12:2.